Read Karbi ISAIAH 2 Bible Online

ISAIAH 2 - Karbi bible

ISAIAH 2

¹Judah lapen Jerusalem aputhak Amoz asopo Isaiah aphan Arnam kepi abirta lahelo:

²Kevangji arni Kardomhemthepi karjap anglongpi along kangtuinei plangpo, inglong kedo-an aphan lit songpo. Ongdung akhei atum vangtoipo

³lapen halaso arat atum pupo, “HEMPHU anglong eli damlonang Israel Arnam a-Kardomhemthepi. Ili keklem nangji ason alangli ethanpo. Alangli kangvaitang atovarle eli kengkam chejor lonang. Pima HEMPHU akethan Jerusalem pensi kevang; arat aso aphan alangli Zaion pen ningjelo.”

⁴Kethedung adet angbong kechehilisai alam alangli pathirpo. Halatum anokjir-heihei selamsi langnoi aphan pinchongpo lapen halatum achir-heihei nokekso selampo. Khei atum ron chethurthe det po, ron kechedanji aphan puthot chesikse lo.

⁵Non, Jakob asomar atum, HEMPHU ekepi akethe-ang atovarle, eli kengkam chejor lonang!

⁶O Arnam, nang nangrat Jakob aso aphan obub-lo! Det adang bithe nihang lapen Philistia pen mekbin akam keklemsi plengset. Rat-atum bang adet ajutang-heihei rimdun rong-lo.

⁷Halatum adet rup lapen ser pensi plengset, lapen latum akhi lakha un-e. Lahei adet losei si plengset lapen ronhemkonglong lakha un-e.

⁸Halatum adet kumlin si plengset lapen kethitang amar latum archolo, lahei latum ari pensi selamlo.

⁹Anut tin aphan patherakpo lapen pinrempo. Latum aphan diya ri O HEMPHU!

¹⁰HEMPHU aningkethi pen chepa-jokjisi latum lapen alangli ajakong lapen adak atur pen kechepatujisi latum longku-longdang-heihei ajo alongku mate longle hutsi arlo chepatu po!

¹¹Monit anekethe kejut arni lapen kecheparoka kevir arni nangleji. Anke HEMPHU inut pet aphansi pathe chotpo.

¹²Halaso arni jakong kethe abangphutin aphan lapen anekethe lapen kechepindak abangphutin aphan Jakongkethe HEMPHU pabihekji.

¹³Lebanon adet a-Kedar athengpi kangtui lapen Bashan adet kedo-an aphongrong alangli pavir etji.

¹⁴Inglongpi-heihei lapen inglong-heihei,

¹⁵hemthengsong an, lapen paisong arpong an alang paklam et ji.

¹⁶Kethenei lapen akelangmenei atelongpi-heihei seta alangli panglim ji.

¹⁷Monit anekethe jutkok po lapen cheparoka pavir detji.

¹⁸Kumlin ave det po lapen halabangso arni HEMPHU aphansi pathechotpo.

¹⁹Alangli vangsi pirthe kehijukji ahut monit atum HEMPHU aningkethe lapen alangli jakong lapen adak atur pen kechepajokji aphan longku-longdang-heihei ajo mate kehut alongle arlo chepatu damji.

²⁰Halabangso arni halatum keselam aser-arup akumlin-heihei chevar etsi phiju-karle lapen vo-arplak-heihei aphan o-tekangji.

²¹HEMPHU vangsi pirthe kehijukji ahut alangli ningkethi pen kejokji aphan lapen alangli ajakong lapen adak-atur pen kechepatuji aphan monit atum hilik ajo lapen longku-longdang ajo chepatu damji aphan bor-i-ji.

²²Kethitang amonit atum aphan chiki nangne. Latum kopi ador kedoma?