Read Karbi ISAIAH 21 Bible Online

ISAIAH 21 - Karbi bible

ISAIAH 21

¹Bebilon aphan birta lahelo. Kejejangtang ajo mongve karkok ponlir asonsi kepherememe adet pen kevir vangpo.

²Isi kangjinsose pin akam ingdeng isi ne thek-long-lo, isi kechobei lapen kevir akethek-long. Elam aron-armu tengkheng non; Media aron armu rongsopi-heihei kompet non! Bebilon keklem kepasung akam Arnam pajut kok po.

³Ne kethek-long lapen karjulong ason nephan kepaphere lapen keso si paplengthup lo, arloso oso chopathe ahut akeso ason.

⁴Nephu arting lo lapen ne kephere pen ne-ok klemhur lo. Komantusi arni kechijima pu ne cholangding-lo, bonta la nephan thang-nat vanve det lo, bonta ne kepheresi vanchot.

⁵Isi kecho ahormu thek-long-lo, pe-um karthat-heihei limlo alohi kepangniji aphan. Latum chobom lapen junbom lo. Men men hukum vang-lo, “Saihemphu atum! Nangchong-heihei chesik non!”

⁶Aphi HEMPHU pulo, “Damra inut tonbang patondam non, lapen la ko-pima kethek long nang pathan lonang.

⁷Alang jongsi losei athak kardon banghini ni amonit atum kevang thek-long-lo tangte lapen gadha-heihei lapen ka-ut-heihei athak kardon amonit thek-long lote, la halatum aphan palang pame nang.”

⁸Lapen tonbang hangser lo, “Akehai, neli ajo-anerlo ta neli keton adimsi arjap verlo.”

⁹Menmen latum ladak vangham lo, banghini ni. Tonbang birta pilo, “Bebilon virtang-lo! Latum kardom akumlin do-an longle athak tichelo.”

¹⁰Nerat-atum Israel, ta sok tipli ason nangphan nangsitang-lo, bonta Israel a-Arnam, Jakongkethe HEMPHU pen karjulong abirta keme ne nangtum aphan pachini tang-lo.

¹¹Edom aphan birta lahelo. Mane inut Edom pen nephan nehang-lo, “Tonbang ajo komantusi kepar poma? Nephan nethantha komantusi la kejut poma?”

¹²Ne thak lo, “The-ang dap po, bonta ajo nangle thuji. Nang jongsi arjuthu ingtung pulote vang ra nang arju non.”

¹³Arab aphan isi abirta la helo. Nang Dedan arat-atum, Arab adet kekrengtai ajo songdam amukam kekim atum,

¹⁴nanglong kevang kangit arat aphan lang pitu. Nang Tema arat atum ahemkave atum aphan an pitu.

¹⁵Latum aphan nokjir pen kepathi ji pu chesikding atum pen, ke-apji athai pen, ron akesung-heihei pen kechepajokjisi rat atum kat lo.

¹⁶Anke neliphan HEMPHU pulo, “Ningkan isi chokpamesi Kedar akhei kethe jut kokpo.

¹⁷Thai kejo atum Kedar angbong angthin-kethenei atumlo, bonta ajehak ong-e aphaisi bichotji. Ne, Israel a-Arnam HEMPHU-si keningjelo.”