Read Karbi ISAIAH 22 Bible Online

ISAIAH 22 - Karbi bible

ISAIAH 22

¹Laso abirta ke kethek-long a-Arlok abirtalo. Kopi plang-loma? Kopi athesi rongsopi arat atum hem asarnung-heihei athak talon loma?

²Rongsopi kangthim hangjolo, kehangjo ase lapen ning-arong akehang pen umphlup lo. Nangmonit laso aron along kethi kechedanle kethi kali.

³Nangjalin atum an latum thai aso joje aphrang bang nepchek lo.

⁴Lasi kethitang nerat aso aphuthak un an kechirujile nephan inut pet nangpado longnon. Nephan nening kepangsamji bor-i-ri.

⁵Lake isi ningke-oi, kerem, lapen kemanghuphrong apor Arlok Akethek-long, lapen keklem un Jakongkethe HEMPHU ephansi la nangkelo-lo. Etum arongsopi apaisong-heihei klohamlo lapen inglong-heihei along kerap kehang akechiru hangjolo.

⁶Elam adet pen ron-aso atum losei athak ardonsi vang-lo, thai lapen aso chevanlo Kir aron-aso atumta achong-heihei chesikdingdang-lo.

⁷Judah aho-or kedo arlok-heihei ta ron ahemkonglong pensi plengthup lo; losei kardon aron-aso atum Jerusalem anghap-heihei athengno arjapphrong-lo.

⁸Judah aphan kerai-i ason-heihei thangta kalidet lo. La plang-lote nangtum si, puru pen risim-heihei nangpabar lo.

⁹Jerusalem apaisong-heihei keselamthunangji adim-heihei nang thek-longpo.

¹⁰Jerusalem ahem kedo-an nang lang et-lo, lapen rongsopi apaisong-heihei keselamthuji aphan arlong ke-enjisi lahei ajehak nangparupo. Lang kepangpen ji aphan,

¹¹langtap ban pen lang kepaliji si rongsopi arlo langpen selampo. Bonta aphrang pen kepaplengji kemang abang, lapen la kepapleng abang Arnam aphan nang no chedende lo.

¹²Keklem un Jakongkethe HEMPHU nangphan kechiruji, kecharnapji, nangchu kechesoiji lapen pethoila keche-umji aphan nanghang-lo,

¹³bonta nang ingnek choi lo lapen talon lo. Kechojisi nang biresak lapen chainong thulo, lapen drakha ahorlang junlo. Nang pulo, “Etum chonangji, jun nangji! Penap eli thilot tahai.”

¹⁴Jakongkethe Muluk HEMPHU amethangsi neliphan ningjesi pulo, “Latum rengtik an laso akehingno latum aphan akai isi ta diya un-e lo. Ne Jakongkethe Muluk a-Hemphu-si ningje lo.”

¹⁵Lasonsi Jakongkethe Muluk a-HEMPHU, rechohem kelang abangphu, Shebna aphan kepathandamji si neli-phan pulo,

¹⁶“Nang komat putong chematha ma? Arlong anglong akung nangmethang aphan thiri kechehongji konatsi jakong kelong-lo?

¹⁷Nangthedung tahai, bonta HEMPHU nangphan nanghumjoksi nangvar chorji.

¹⁸Bol asonsi alangli nangphan nanghumjok po lapen kethedung adet arlo nangvarchor po. Nangning kechethe aronhemkonglong-heihei adung hadak thinangji. Nanghemphu ahem aphan nang nong juno lo.

¹⁹Saihem pen nangphan HEMPHU nang terek chor po, lapen kangtuinei nang inghoi pen pasuntuk po.”

²⁰Shebna aphan HEMPHU pulo, “La plang-lote, Hilkiah asopo Eliakim, neban aphan ne nanghang po.

²¹Nang kechepindeng ape achoi, Ne alangliphan pangchoi po lapen nang kelong tang ajakong an alangliphan pi det po. Jerusalem lapen Judah arat-aso aphan alangli po ason plangpo.

²²David aso recho aber alangliphan Ne dorphlup ajakong piji. Saihem aphlok-heihei alangli long dopo; alangli kangpu ason baduta ingkir un-e lo, lapen alangli kangkir ason baduta ingpu un-e lo.

²³Khuti aso ason thak-thaksi Ne pathirhet po, lapen alangli hemtun aphan isi man kelong atiri plangpo.”

²⁴Bonta alangli donrap lapen kedodun atum an pen apot alangliphan isi anghor plangpo. Nujok pen kevekpajang aphule-aharlung-heihei asonsi latum alangliphan vek-ling po!

²⁵La plang-lote kepathirtang akhuti haiduk po lapen krep po. Lapen la athak kevek-ling amar an akejut la an helo. HEMPHU-si keningje lo.