Read Karbi ISAIAH 24 Bible Online

ISAIAH 24 - Karbi bible

ISAIAH 24

¹HEMPHU pirthe pangsamripo lapen la parongmansi bikok po. Alangli pirthe amonit aphan partingsi papratsei po.

²Kurusar atum seta, lapen rat atum seta, ban tame, hemphu tame, kejor atum lapen kenam atum tame, keparam lapen kechoram atum tame, keplang lapen keduk atum setame, abangphutin ta isi nat akopai chetongpo.

³Pirthe adang chehijik jamsi ru-et po. HEMPHU-si ningjelo, lapen la plang vek po.

⁴Pirthe krengtai si chekedu lo; pirthe adang aini hak bom lo; pirthe sining anghun ta thu.

⁵Arnam aron-heihei kangdi pen ajok lapen alangli kaike pen ajok lapen alangli kaike padover aphan akechejok kangdi pen ajok rat-atum pirthe pasa-ur lo.

⁶Lasi pirthe aputhak Arnam hirjuno hang-lo. La amonit atum keklem athe phonang-lo. Ong-e atumsi rengchot bomlo.

⁷Drakharikang chekedu, lapen drakha ahorlang long athai ave. Abangphutin aphrang aning-arong atum an non aningke-oi saide,

⁸lapen halatum akumbeleng lapen achong-heihei aning-arong kehangjo arki sa kok lo.

⁹Drakha ahorlang aputhak aning cheparong alang baduta ave; badu ta la akedok chomat abang ave.

¹⁰Rongsopi asontin ta manghuphrong, kejokvan vanjisi rat-atum amethang ahem-heihei chinghapkling.

¹¹Tovarpi along rat-atum hangjo lo, pima hadak drakha ahorlang ave, Kedorengme kaike aphan damjui lo; laphan det pen phlungjui lo.

¹²Rongsopi kerulo, lapen la anghap-heihei ching-lok-et lo.

¹³Lasonsi pirthe adang adet tin aputhak nangplangpo. Lake kerot-kerim kejut apor asonlo, jit arongtin-heihei kardep apor lapen drakha athe keterek apor.

¹⁴Kereng-long atum an aning cheparongjisi lunpo. Nichi kedo atum an HEMPHU ko-an kethe ma chethan sai po,

¹⁵lapen nihang kedo atum alangliphan ropet po. Talo akung kebonren arat atum an Israel a-Arnam HEMPHU aphan rohur po.

¹⁶Pirthe kehelo adim-heihei pen Israel, dhoromi adet aphan kero kelun ase arjulongji. Bonta nephan kethe-ang ningkethe ave! Ne chepakon chot! Kechobei atum pachobei bomlo, lapen halatum kechobei lit thumusi lo.

¹⁷Bangphutin ta neliphan arjutha! Hadak kephere-meme do, pham nangphan tot krei lo.

¹⁸Abangphutin kepherememe pen kekatji pu kebor-i atum an hilik jangpo, lapen hilik pen kejok atum an pham chedanpo. Inghun asining pen kethedung arve nangklo po, lapen pirthe aputah hijuk po.

¹⁹Pirthe chinghangsi chingpudang po.

²⁰Pirthe amat ta horkangri abangpo asonsi kreppeng po, lapen hemso tomonpi kejap ason po. Apap apotsi pirthe chelinrong lo, la runhupji lapen kaita arjapje lo.

²¹Angsong ajakong-heihei lapen pirthe pangritum aphan HEMPHU aduk kepiji apor nangle tang-lo.

²²Hilik isi arlo phatek-kebeng asonsi HEMPHU recho atum an aphan pangrumpo. Halatum aphan aduk kepi ahut nangleletik alangli halatum aphan bengthip po.

²³Chiklo ingting-kuk po, lapen arni atur avelo, thangbak ma Jakongkethe HEMPHU-si recho chopo. Zaion Anglong athak Jerusalem alongsi alangli pangripo, lapen alangli rat ajalin atum alangli adak-atur thek-long po.