Read Karbi ISAIAH 26 Bible Online

ISAIAH 26 - Karbi bible

ISAIAH 26

¹Judah adet rat-atum laso alun kelun hurji arni nangletang-lo: Etum arongsopi ingtangrak! Arnam amethangsi la bangso apaisong cherailo!

²Rongsopi anghap ingpu non lapen ahok akam keme keklem kekroithip akhei arlo palut nang.

³Nangphan aning kedo-e lapen kechiki abangphan nang HEMPHU-si kechok-lim aningkangsam pilo.

⁴Kaiketa HEMPHU aphan chiki non; alangli kaike erai verpo.

⁵Anekethe aphan alangli pabihek lo; latum kedo kethirklong arongsopi alangli pavirlo, lapen la apaisong-heihei aduk aprot pinchong-lo.

⁶Kechenek kepho atum non ta athak dong-lo lapen akeng pen la patekung-lo.

⁷HEMPHU, kemesen amonit atovar nang panaibot lo; latum kehelat atovar nang paklam et lo.

⁸Nangning kehang aling netum klemlo lapen nangphan netum ning chethe lo; netum ning kar-i an nang helo.

⁹Ning kedo-an pen ajo nangphan rilo; nang pirthe lapen la arat aphan kangsai ahutsi, ahok-akangsai kopima latum chini po.

¹⁰Nang, kehingno abangphan jinso seta; latum kopima akeme keklem ji charli thekthe. Ladak dhoromi arat adet along seta latum kehingnosi klemji; Nang kethedung latum chini ingtungte.

¹¹Nanghotur aphan nang aduk piji pu latum chechini ne. HEMPHU, latum aphan patherak non lapen latum pasungnang; latum aphan kesiktang aduk latum paphonang. Nang rat aso aphan nang ko-an chinghon loma paklangnon.

¹²Nang netum aphan pachingthur long non, netum keklem kepachun ason an nangsi keklem lo.

¹³Netum Arnam HEMPHU, netum aphuthak bangsi nepangrilo, bonta nang inutnatsi netum a-HEMPHU lo.

¹⁴Non netum thi-et lo, lapen rengthuthelo, latum akarjong thuthuthelo; athema nangsi latum aphan aduk pilo lapen pavirlo.

¹⁵HEMPHU, netum adet nang pachanlo, ahintin anat ta la ahoi parbomlo, lapen la nangphan man nangvanpilo.

¹⁶Nang rat aso aphan nang aduk pilo, HEMPHU, lapen latum aning aduk pen nangphan cho-ardomlo.

¹⁷HEMPHU, nangsi netum aphan chiru pahangjo toi lo, oso chopathe a-arloso keso kar-em ason.

¹⁸Netum so-o si ar-emlo, bonta netum oso chopathenak lo, netum adet nangphan thangnat ta netum akehai avedet lo; netum thangnat ta pachun un-e det lo.

¹⁹Netum monit kethi atum puthot rengthujilang! Halatum abang-arpum achethe dothuji. Athiri along amek kejangklip atum amek prangthusi ning-arong alun lunjoji. Pirthe athak ketokbor a-ar-e kepacham-e asonthot, lasonsi kethitang atum aphan HEMPHU parengthuji.

²⁰Nangtum ahem chedamrep non nerat atum, lapen inghap chinghap thip non. Nangmethang Arnam aning-kethi hamhetik chepatuklip non.

²¹Pirthe amonit apap-heihei apot rat aphan aduk kepijisi HEMPHU kedo adim sining pen vangbomlo. Pirthe athak monit kepathijoi abangphan paklang dakpo, lapen thitang atum aphan longle patu un-e-lo.