Read Karbi ISAIAH 27 Bible Online

ISAIAH 27 - Karbi bible

ISAIAH 27

¹Leviathan, keklimprap apherui aphan HEMPHU ajakongkethenei lapen kepherememe anokjir rimsi aduk kepiji arni nangle tang-lo, lapen talo along kedo pherui thepi aphan pathiji.

²Halabangso arni HEMPHU aningkedoknei adrakha-aberi aphan pupo,

³“Ne la aputhak hon lo, lapen lang chorbomlo. Laphan kephangno un-e detjisi ajo nerlo ne honlo.

⁴Ne drakha-aberi aputhak ning keso ave. Hadak jongsi bapsudo-ingsu-heihei pen kechedan nangji dolang pulote, ne lahei me kei detji.

⁵Bonta nerat aso-atum jongsi ne akerai nangji pulote, latum nepen chepangsam non. Ahok-lo, latum ne pen chepangsam nangpo.”

⁶Kevangji arni Israel arat Jakob asomar atum thengpi arong asonsi angkur ponpo, lapen lahei chingjoksi papu po. Latum kelong athe pen pirthe adang dipthip po.

⁷Israel aphan HEMPHU ko-an ma hotur aphan aduk kepi la an aduk pipelang, kalite halason an monit virvelang.

⁸Arat aso aphan ban ketoi ajok HEMPHU latum aphan aduk pilo. Nihang kepherememe atomon pen alangli latum aphan pon et lo.

⁹Bonta Israel apap kedo-an diya detji jongsi latum karchotap adovan saini arlong ason koi pangje-i-lote, lapen mephik kethor adovan mate Asherah arnampi angthek rim-re det lote.

¹⁰Kethirklong arongsopi rutang lo, la kejejangtang kangthaidang ajo ason ojap po. La chainong kechopan adim plangpo, hadak latum sang longpo lapen chopan longpo.

¹¹Thengpi aro-heihei chekedulo lapen ing-lok-et lo, lapen so-arlo atum me kethorji si chopangrumlo. Pima monit atum thangnat ta kechini ave, halatum Arnam kepinchong abang ta latum aphan jinsoselo mate langlelo.

¹²Halaso arni, Euphratis pen Ijip ahoi an, HEMPHU arat aso aphan inut-nut pangrumpo, mane abang la sok pen aphe-e kangkrung ason.

¹³Halaso arni nangkele ahut, Assiria lapen Ijip adet along ban kedo Israel aso an aphan kehangjisi pong-ut vut ji. Latum vangsi Jerusalem Kangthir Anglong athak HEMPHU aphan archo po.