Read Karbi ISAIAH 28 Bible Online

ISAIAH 28 - Karbi bible

ISAIAH 28

¹Israel adet kevirlo! La anong horkangri ajalin aphuthak mir avaikang kechekedu ason lo. Halatum anekethe aphu-heihei jangthu nempru chehipame, bonta hadak latum hor ingri si kethi titan lo.

²Halatum aphan ketengkhengji kechesikding abangphu HEMPHU do, mane abang herai kevan asonsi vangpo, arve kevan ason, kelivoi alangthepi ason vangpo, lapen det adang paklothip po.

³Horkangri ajalin atum anekethe keng aber dosi dong po.

⁴Jalin atum anong kepathecheng botor athebo athe asonsi avedetji, kemenpen liksi chodet po.

⁵Kerenglang arat aso aphan Jakong-kethe HEMPHU ke anong kedo mir aphu vaikang ason plangpo.

⁶Alangphan kangduk akangsai aning pipo lapen ketengkheng pen rongsopi anghap kerai atum aphan angthin pathepo.

⁷Montri atum lapen kurusar atum ta la an kangri latum krep-ring-rang lo. Latum lapu an drakha ahorlang lapen arak junlo, latum patekungsi mong-loilai lo. Montri atum lapu an kangri Arnam ketoi akepathek-long alam chini thekthe det lo, lapen kurusar atum ta lapu an kangri lo, latum along kevan alam kangsaiji un-e det lo.

⁸Latum kangri adim atebul ta keching-ok tang asonsi plengset, lapen pangthirthesi bilun lo.

⁹Latum nephuthak pasimu lo. Latum pulo, “Komatsi kethanabang pu kechematha lo? Komatsi la abirta akenang dolo? Lake mokchukak a-oso atum aphansi meji!

¹⁰Labangso abang ephan athetin amek, aren-aren, angdeng angdeng aloh ekethanjisi kebor-i.”

¹¹Nangtum jongsi nelam arjuje pulote, Arnam adet kaprek amonit kechininepin alam nangtum aphan kepathangjisi paningje toi po.

¹²Alangli nangtum abangphutin aphan kesang lapen kerengme nangpilo, bonta nangtum alangliphan karjuji molo.

¹³Lasi HEMPHU nangtum aphan athetin amek, aren-aren, angdeng-angdeng nangkethanjisi dolo. Anke nangtum kechejor akengkamtin nangtum patekungpo. Nangtum amek do po, pham chedanlok po, lapen nangbeng pon det po.

¹⁴Non nang kesedeng Jerusalem kepangribang lahei arat aputhak HEMPHU kopisi kepuma arjuduntha.

¹⁵Nang kethi pen lapen kethitang atum apirthe pen isi kecheparai dolo pusi kechepindak. Nang chechini pame non, kephangno akesung kevang ahut la nangphan nangbanvak po, pima nang kechobei lapen kechorei aputhak kejokji aphan chiki lo.

¹⁶Non, la Muluk a-Hemphu-si pulo, “ Zaion athaksi Ne kethirklong lapen kangtang aputah lo. Laso alongsi ne arlong-angkleng bilo, laso athak lasonsi ketok alam do, ‘Kethirklong akekroi ke aningta ding-o.’

¹⁷Putah kepun iji ke ahok-akangsai helo, lapen ahokpet ke la arpong kepakeng apholong lo.” Nang kechiki achorei aphan herai-heihei arkok pon etpo, lapen langthepi si nang raikom pavir det po.

¹⁸Kethi pen nang kechechak ason pavedet po, lapen kethi atum apirthe pen nang kechechak asonta pave det po. Kesung kevang un ahut nangphan nanghai det po.

¹⁹La nangphan aphong aphong nangtong po, adap vang ta. Ajo-nerlo ta nang chechak nangpo. Arnam pen kevang abirta kemi athetin akepherememe plangpo!

²⁰Sarlamthe along kedo akeng kephajong dorde ahongplang athak ke-i lapen kechephalom dorde keche-um ape kelong abangpo asonpo.

²¹Perazim Anglong athak lapen Gibeon arlok along HEMPHU kechedan pi asonthot alangli aning kehang ateng keklemji kemang akam prekjek seta klemsi chedampo. Alangli kam, manghumeme akam klem pachunvek po.

²²Ne nang kepi kepacheretoi alam aputhak ingnekchoi ri! Jongsi nang klemlote, nangphan kejokji sung muchotpo. Det adang kepavirji aphan Jakongkethe HEMPHU kepha neli arjulong-lo.

²³Neli kopima kepu arjutha. Nang-litum aphan neli kopisi than loma no chedentha.

²⁴Badu asai ketiki abang seta chili kerik an haibaivaret-re.

²⁵Alangli ephong longle baidet aphi alangli jira, jira ke-ik aklim paripo lapen soktipli lapen tipliso asok aren aren paripo. Arit akung alangli ajat jat asok paripo.

²⁶Amethang akam alangli chechini, pima Arnamsi alangliphan thanlo.

²⁷Jira lapen jira ke-ik kesiji aphan kaibong kethe pen alangli pampe bonta chingbarchit akaibong pensi pamji.

²⁸Aduk patep-i an alangli soktipli sise bonta patep-i-e pinji aphan athak hemkonglong padam thek.

²⁹La kedo-an abidi Jakongkethe HEMPHU pen vang-lo. Arnam keklem akam kaiketa reset, lapen lahei kaita plangver!