Read Karbi ISAIAH 3 Bible Online

ISAIAH 3 - Karbi bible

ISAIAH 3

¹Non, Jakongkethe HEMPHU, Jerusalem lapen Judah pen asontin lapen abangphutin monit kechiki amar an kepon etji si chesik ding lo. Latum a-an, lapen alang,

²latum anokbe, lapen aron-aso, latum akangsai abang lapen latum amontri, latum paludep atum lapen ajalin,

³ron along lapen rat-ajalin, latum pangribang lapen ahut kekhangji aphan mekbin keklem atum an aphan pon et po.

⁴Rat-atum aphuthak HEMPHU-si kethekthe a-osomar papangritoi po.

⁵Abangphutin ta lahin lahin aphuthak cheber seroipo. Riso-ejang atum arlengkesar atum aphan man pipelo lapen arlengkethe atum aphan kelu atum ta man pipelo.

⁶Arnisi lason ahut nangleji, ero abangphu abang halatum inut bak aphan ingvaisi pupo, “Nang keching-thangji aphan anke dolang apot non ason kesung ahut nang netum ajalin nangplangnon.”

⁷Bonta halabangso abang thak po, “Nephan kali! Ne nangrap dun thekthe. Ne an ta ave, pe-ri ta ave. Nephan nangtum ajalin nebak-ri!”

⁸Ahok lo, Jerusalem ke virpo! Judah ke ru bomlo! Lahei keningje athetin lapen keklem asontin ta HEMPHU abe si thurlo; lapen Arnam methang aphan patutepin pen pinremlo.

⁹Latum akechokche latum methangsi cheneppo Sodom arat keklem asonthotsi latum thek-lor pap klemlo. Latum virlo lapen la latum amethang aputhak chevanlo.

¹⁰Dhoromi amonit atum ke aning-arong po, latum aphan ke jat asonta mesenpo. Latum keklem athe latum checholongpo.

¹¹Bonta kehingno amonit atum virji, bang atum aphan latum kosonsi keklem ma lasonthotsi latum aphanta non klempo.

¹²Tangka keparam atum nerat aso aphan chenektha, lapen halatum along kechoram atum chobei det non. Nerat aso atum, nang jalin atum nangtum aphan kalile atovar si nangja lo, anke nangtum koloso atovarsi sui nangjima nangtum chechininelo.

¹³HEMPHU ke amethang alam keche-thanjisi chesik et lo; alangli amethang arat aphan kangsaijisi chesik tang-lo.

¹⁴Kangsaijisi HEMPHU arlengkesar lapen ajalin atum aphan vanlo. Alangli laso alam bok-lo: Nangtum drakha aberi chonghu lo, lapen nangtum ahem nangtum keduk atum pen kethipon amarsi plengset lo.

¹⁵Nangtum Nerat aso lapen keduk aphan keberlamji ajakong ave. Ne Jakongkethe HEMPHU kepangripet abangsi ningje lo.

¹⁶HEMPHU pulo, “Langtha, Jerusalem a-arloso atum ko-an ane chepathe loma! Latum anokan angsong urongsi kedam. Latum kaiketa kechongthui. Latum akengkam chejor joi-joisi dam, lapen dong-chon-chan si kedam.

¹⁷Bonta latum aphan ne aduk piji-Latum aphan ne soilunsi latum aphan paphukoijoiji.”

¹⁸Lason arni vangpo, asontin latum kecheparoka-i ason latum adorson-heihei aphu lapen achethok along lapen ari along kepang-e ason apu-thak cheparoka Jerusalem a-arloso atum an aphan HEMPHU pon et ji.

¹⁹Alangli latum ape-kurki pon et ji,

²⁰lapen latum ahemso-heihei aripong lapen avam along alirlir alor-lor;

²¹arimunjong a-arnan-heihei lapen anokan kechethon anorik;

²²ape-ari keding, achoi keding, pe-phangvar-heihei lapen poisa athia-heihei,

²³latum chepaklang ape keding, pe-kanglit apevenso-heihei, lapen apoho, chekurki ape-heihei pon et ji.

²⁴Kenempru angnim en esi, latum nemthuhai po, avamkok keme adim phamri si en po, achukeding adim phukoijoi po; pe-ri keme adim pekerak si enpo, halatum akelangme arje theraknangkok po!

²⁵Rongsopi apinso atum, ahok-lo, kangtangnei abangta ron along thinang lot po.

²⁶Rongsopi anghap along kechiru si dulurlar po, lapen rongsopi amat ta arloso ape ari avepin pen longle ketotbor ason po.