Read Karbi ISAIAH 30 Bible Online

ISAIAH 30 - Karbi bible

ISAIAH 30

¹HEMPHU-si ningjelo, “Judah kepangri atum kevirlo, pima latum nebethur lo. Ne kethanthe akam si latum klemlo, lapen neningkehanghe akam-heihei keklemji si loh chetok lo, isi apap athak isi builo.

²Ne kepareji alam ne arjujepin si kerap kelongji aphan latum Ijip damlo. Latum aphan Ijip keparaiji. Latum ninghang-lo, lasi latum Ijip arecho aphan chikilo.

³Bonta latum aphan kerapji recho ajakong avedet po, lapen Ijip akerai kevir ansi jutkok-po.

⁴Halatum kechotoi atum Ijip arongsopi Zoan lapen Hanes along nanglelo seta,

⁵Judah arat atum kechikino akhei, latum kenangji akerap kepi thekthe akhei aphan kechiki apot aning che-oi ji.”

⁶Nitur akejejangtang ajo api-heihei aputhak Arnam abirta la helo: “Kechetoi abangphu atum kepherememe adet ajosi dam lo, hadak hingho-heihei, lapen abi kedo aruiphe lapen kangjar apherui-heihei do. Halatum agadha lapen aka-ut athak latum aphan kerap kepi un-e adet aphan kepajirji adan-heihei arthang-lo.

⁷Ijip kepiji akerap ke ningjoino. Lasi Ijip aphan ne amen kaprek hang-lo, ‘Dojoi apherui’ pulo.”

⁸Rat atum kopi ason ma loh epak along ketok et jisi Arnam neliphan nepulo, anke latum ko-an hingno ma isi tok-bi dopo.

⁹Latum kaiketa nebe thurver, kaike pachobeiver, kaiketa HEMPHU kethan alam-heihei karjuji molo.

¹⁰Montri atum aphan kepadojoijisi latum pulo. Latum pulo, “Kopi akeme keklemnangjima netum aphan nang than nangne. Netum karjuji ningkehang alam le, nethan non. Netum mekbin pabilong non.

¹¹Netum atovar pen dam non lapen netum atovar nangkhang dunri. Nang Israel Kangthir Arnam alam netum arju ingtungte.”

¹²Bonta Israel a-Arnam Kangthir lasonsi ningje lo, “Ne nangkethan alam nangtum dengmolo, lapen kephangno lapen kechobei aphansi chikilo.

¹³Nangtum nangdai do. Nangtum ke kechinghangset apaisong kangtui asonlo; menmen nangtum ruraipo.

¹⁴Inghan atibuk asonsi pachet-i po, lapu-an ingje-i mate langchething kesok vokji aphan anta achet kethe longle detji.”

¹⁵Muluk a-HEMPHU, Israel a-Arnamsi rat-aso aphan pulo, “Nangchevoira nephan nechikijoi non. Anke nangtum ingtangrak po lapen jokvan po.” Bonta nangtum la keklemji molo!

¹⁶La kali lesi, keprap alosei ardonsi nangtum hotur pen kekatji chesik lo. Lapen nangtum ahok-lo, kekat helo nangtum keklem nangji akam lo! Nangtum mathalo nang losei atum prap pik, bonta nangtum aphan nangkehung dun atum nangprap muchot ji lang!

¹⁷Inut aron-aso aphan thek long lote nangtum bangsuri isi katpo, lapen bangpho aron-aso anta nangtum aphan kephlung etji aphan dorphlup ji. Nangron-armu along thangnat ta dode detji, inglong angsong athak lamasi dochotji!

¹⁸La an seta HEMPHU ke nangtum aphan kangjinsojisi inghongdinglang. Alangli nangtum aphan aning duk pik pima alangli kopisi kechokpetma, lasi keklem. HEMPHU aphan kechiki atum rengme.

¹⁹Nangtum Jerusalem along kedo atum chiru jokphlot po. HEMPHU kangjinso thepik, lapen kerap kelongji aphan nangtum alangliphan hang-lote Alangli nang thakji.

²⁰HEMPHU nangtum aphan kesung ajo nangpadamji bonta nangtum aphan nang kethan jisi alangli hadak doji, lapen alangliphan nangtum ri jokphlot po.

²¹Nangtum jongsi ar-e arvi tovar manghu lote nangtum alangli se nangtum adung keningje arjulongji, “pusi tovar la le dunnon.”

²²Rup pen ketop akumlin lapen ser pen kepachor akumlin-heihei nangtum ponsi keningjoinodak asonsi var chorpo, lapen hangpo, “Nemek angden dori!”

²³Nangtum chili kerik ahut, arong kepavang jisi HEMPHU arve nangtoipo, lapen nangtum sok chorot long-o po, lapen nangtum api-heihei kechopan ji adim dorphlup doji.

²⁴Hidi hai kebai-i achainong lapen agadha-heihei akemenei asokpun cholongpo.

²⁵Nang hotur atum akut-heihei kecherai arni lapen halatum aphan kepathilong arni anglong tin, lapen inglongso do-an pen lang nangli prekji.

²⁶Arni asonsi chiklo phlan pik ji, lapen arni ta kai apar phan throksi phlanthu musi ji, nithroksi atur isivet akethe-ang ason. Arat-aso aphan HEMPHU areng kepasotang amek alangli kephan, kepame arni la plangji.

²⁷HEMPHU ajakong lapen adak-atur heloving adim penta thek-long ji. Me lapen mehi alangli ningkethi paklangpo. Alangli ningje, lapen alangli lam-heihei me ason cholo.

²⁸Alangli la angno kadokave kepon-et alangthepi asonsi tomon toilo. La det-heihei aphan kepavirjisi arkok lorpo lapen halatum akehingno akemang-heihei pajutkok po.

²⁹Bonta, nang Arnam arat-atum arong-aje kangthir aningve nangtum kelun keklem asonsi ning arongji. Nangtum Israel aphan kerai abang, HEMPHU Kardomhemthepi anat muri-pongsi pen aning-arong pen kedam atum ason ning-arongji.

³⁰Abangphutin aphan HEMPHU jumepik ase parjupo, lapen jasemet alangli ningkethi prungchop po. Me ade dopo, bongkok ingthudak arve, herai-heihei, lapen kekloplak-plak arve dopo.

³¹HEMPHU ase arjulongsi Assiria atum pherepik po lapen alangli aduk kepi alam latum aning plengset po.

³²Latum aphan HEMPHU aphong aphong karbu ahut alangli rat-aso atum acheng lapen akumbeleng-heihei ketheng kardeng arki pen pen pachi-i rap-rap po. Arnam amethangsi Assiria abe thursi chedanpo.

³³Penang an ajir keding ahut pen Assiria arechokethe aphan kephrinji ame-a-hilik kethiktang do. La arnukpik lapen ajam thepik lapen theng abui angsom ingtuipik. HEMPHU la me kepachojisi mede aroi achethe vangpo.