Read Karbi ISAIAH 33 Bible Online

ISAIAH 33 - Karbi bible

ISAIAH 33

¹Etum ahotur atum kevirlo! Latum aphan baduta inghuhe lapen pachobeibe seta latum inghulo lapen pachobeilo. Bonta latum kanghu lapen kepachobei apor juttang-lo, lapen latum aphansi bang inghupo lapen pachobeipo.

²HEMPHU, netum aphan ingjinsotha. Netum nangphan ningchethelo. Netum aphan arnivangta ne raitha lapen kesung ahut ta netum aphan nepajoktha.

³Nang netum aphan nangchedanpilote ron arki pen det atum kat lo.

⁴Halatum ahormu-heihei kethi pon amar asonsi pangrumpo.

⁵HEMPHU ko-an kethe! Alangli asontin aputhak pangrilo. Jerusalem aputhak ahok akangsai lapen isipet pen paplengset po,

⁶lapen det pathirpo. Alangli amethang arat-aso aphan kaike raipo, lapen latum aphan bidi lapen gian pipo. Halatum akhi kethenei ke HEMPHU aphan man kepi helo.

⁷Angthin kethe amonit atum kerap chohang-lo. Ningkangsam kevanji kebor-i apherangke atum aninghodaksi chiru lo.

⁸Tovarpi-heihei pherememe apotsi baduta dam hai abang avedet lo. Kechechak aloh ketok-heihei chephri et lo, lapen kechepathik alam ingdi det lo. Badu aphan ta man pipe det lo.

⁹Longle bitan lo lapen tiki abang avedet lo. Lebanon angnam chekedulo, Sharon aho-or kedo a-arlok ta kejejang-tang ajo asonlo, lapen Bashan lapen Karmel Anglong athak athengpi pen arvo-heihei ingjuiprelo.

¹⁰Det-heihei aphan HEMPHU pulo, “Non ne klempo. Ne ko-an jakongthema ne paklang po.

¹¹Nangtum alekave pin ason mang-lo lapen nangtum keklem asontin thangnat akam vangve det lo. Ne karjong ke kepavirdet ame ason.

¹²Nangtum arlong me chosi saini keplang asonthotsi plangpo, ingsu me chosi thek lo kecheplang asonthot

¹³adung lapen kehelo kedo abangphutin ne kopi klemtang-loma parjulongnang lapen ne jakong pachini nang.”

¹⁴Kepherepen pap keplengset Zaion arat-atum klemhur lo. Latum chepulo, “Arnam akangsai ke kaike me kecho ason. Halason ame pen etum angbong inutbak reng-un jima?”

¹⁵Nang kopima kepu ahok pen klemlote reng-longji keduk aphan kechobeijile nangjakong phangnori lapen tangka chori pran karmutji kemang atum pen mate kehingno keklem atum pen chelangri.

¹⁶Anke nang jokpo; nangle paisong akut arlo kedo kejok ason thak-thaksi nang jokvan po. Kechoji aphan nang an lapen kejunji aphan lang longpo.

¹⁷Puthot inut arecho ahir-asang pen, kona phli ahin ahoi kepar isi adet kepangri thek longpo.

¹⁸Det kaprek amidu kerung atum lapen kelangjoi atum aphan hako ahut ke mangmun asonchotpo.

¹⁹Nangtum karjudam thekthe bidet alam keningje ketarhang mononphi seta thek-longle detji.

²⁰Zaion aphan langtha, hadaksi eli dhorom amei-heihei talonlo. Jerusalem aphan langtha! Hadak kedo ko-an kejokvanji! Lake keterek un-e pin apehem ason, la anujok kaita sat un-e det po lapen la ari kaita dakde lo.

²¹HEMPHU-si amethang ahir-asang epaklang po. Eli ajamkethe aroi-heihei lapen alangjeng-heihei akung dolongpo, bonta halahei along kethurkrap atelongpi-heihei vekve det po.

²²Halahei atelongpi along kedo kechesik amar an thangta kali detji; la dam-o un-e detji!

²³Hotur aron-asong akhi an eli thi pon-et po, lapen lapu-an ke-ongji, kengkok atum anta apharman longdunji. HEMPHU-si etum arecho po; alangli ephuthak pangripo lapen erai po.

²⁴Edet arlo kedo baduta hingno pu kepasimuji abang avelo, lapen do-an apap ta diya et po.