Read Karbi ISAIAH 34 Bible Online

ISAIAH 34 - Karbi bible

ISAIAH 34

¹Vangnon, det kedo-an arat atum chingrumpet ra arjutha. Pirthe athak kedo abangphutin ta pavangpet nang lapen parju hur lonang.

²Det kedo-an aputhak HEMPHU aningthilo lapen halatum aron-armu aputhak ta. Halatum aphan alangli kepavirjisi pathiktang-lo.

³Halatum kethi abang arpum pip-pe, bonta hadak thusi nemthu prung po, lapen inglongpi vi pen prungdop po.

⁴Arni, chiklo, lapen chiklolongso-heihei aduk-aprot plangpo. Inghun sining ave det po, la kethui ason lapen chiklolongso-heihei jit mate thebo arong pen arvo kangjui asonsi nangklopre po.

⁵Sining angsong HEMPHU anokjir chesik ding-lo lapen non la Edom alangli kepavirji kepathiktang arat aphuthak arbupo.

⁶Alangli anokjir ke halatum avi lapen athu pensi chinglu kung po, kethi ahut biresak aso lapen bi avi lapen athu-heihei ason. Laso athok ke Bozrah arongsopi alongsi HEMPHU arklipo; Edom adet alangli laso akethenei akepathi klempo.

⁷Chai lapen chainong aloso-heihei asonsi rat-atum kreppo, lapen pirthe adang vi lapen athu pen prung-angsi dipthip po.

⁸Lason ahut Zaion aphan HEMPHU pajokpo lapen la ahotur aputhak alar huipo.

⁹Edom aroi-heihei alkatra plangpo, lapen longle ta me-aplum plangpo. Alkatra me kecho asonsi det adang bithe me chopo.

¹⁰La ajo-nerlo me chopo, lapen la pen kaiketa mehi sumonpo. A-ove-ove longle kejoi titanpo, lapen baduta la angbong hat pet abang avedet po.

¹¹Vo-inghu lapen vo-ak atumsi det dothip po. HEMPHU-si la puthot aho-or pavedet po, ha kepinchong aphrang asonthot.

¹²Hadak det kepangri arecho avedet po, lapen kejalin atum dam-et po.

¹³Ingsu lapen bapsudo-heihei si rechohem-heihei lapen keparpong arong-heihei an along jirhup po, lapen sirung lapen vo-inghu atumsi hadak dothip po.

¹⁴Hadak nampi-api atum juipo, hi-i atum pu pu chehang seroi po. Hadak ajo ahi-i-pi vangsi kesangji adim chori po.

¹⁵Vo-inghu-heihei atar chepatar po, ati patipo, aso vangpo, lapen hadak halatum aphan chelana po. Takun atum hadak ejon ejon chingrum po.

¹⁶HEMPHU aloh ingchap non lapen porhe non hadak kopisi kepuma. Hadak kedo api ejon nat ta hadak avedetji pupe; lapen ejonbak ta achor avedet lo pupe detji. Lason keplangji aphan HEMPHU hukum pidet lo, alangli methangsi lahei van rappet po.

¹⁷La HEMPHU-si halatum angbong longle thakji lapen halatum apharman long-repji. Halatum a-ove-ove anta hadak dolongverji lapen kaike aphan latum chepahemphu longverji.