Read Karbi ISAIAH 35 Bible Online

ISAIAH 35 - Karbi bible

ISAIAH 35

¹Kejejangtang lapen kekrenghak ajo chehokpo lapen sangti ajo mir-heihei papu po.

²Aning arongsi kejejangtang chehok po; la Lebanon Anglong ason langmepik po, Karmel lapen Sharon ahidi-heihei ason aho-or dopik po. Abangphutin ta HEMPHU adak-atur, alangli kethe lapen ajakong thek longpo.

³Ke-ainilai ari-heihei aphan jakong pitha lapen ke-aini ra keklemhur akeng-heihei, aphan ta jakong pitha.

⁴Aning kebi abangphutin aphan thannon, “Chepangtangnon lapen phereri! Arnam nangphan nangrap po, lapen nang hotur aphan aduk kepiji vangpo.”

⁵Selok abang thek longpo, lapen nothong abang arju longpo.

⁶Kengkok abang chonsi kanpo, lapen keningje thekthe abang kechehok pen hangser po. Sangtimili ajo langroi alang-heihei lipo;

⁷kesodak asangti langbi plangpo, lapen kekrengtai ajo lang amek-heihei dothip po. Serung kedo adim, sokphi lapen arpik arong vangpo.

⁸Hadak tovarpi akrong dopo, amen “Kechepangthir Atovar” pupo. Halaso atovar papi inutbak ta helat le det po; Kejok lu atum badu aphanta ja pachobeibe det po.

⁹Hadak hingho ave detji; kehai api-heihei hadak helat le detji. HEMPHU kepajok atumsi ahem pen halaso atovar helatji.

¹⁰Kechehok pen latum Jerusalem leji, aning arong pen lunpo lapen hangji. Latum kaiketa do rengmeji, kaiketa ningri-ninglak pen jokji.