Read Karbi ISAIAH 36 Bible Online

ISAIAH 36 - Karbi bible

ISAIAH 36

¹Judah arecho Hezekiah recho kecho ningkan krephli ahut, Assiria arechokethe Sennacherib abang Judah apaisong kedo arongsopi-heihei tengkhengsi lahei cherai lo.

²Anke alangli ban kethenei abangphan Lakish pen ha Jerusalem ongdung aron-armu pen pen padamtoilo lapen Hezekiah arecho aphan pachehodai toi lo. Pe-keroi atovar ban kethenei abang cherai det lo, la athak alangteng pen lang kevan akung.

³Hadak Judia aso atum alangliphan kechetongji vang-lo: rechohem honbang Hilkiah asopo Eliakim, Kangsaihem achunbang, Shebna; lapen tok-kebi ahemphu atum, Asaph asopo Joah atum vang-lo.

⁴Assiria a-saihemphu abang halatum aphan pulo, kopisi Hezekiah recho pu-an aning kethir loma rechokethe keningje aninghang.

⁵Alangli hang-lo, “Ron-aso asai lapen ajakong adim elam pen klem un putong nangtum kematha ma? Assiria abe thursi mane nangrap dun unji putong kematha ma?

⁶Nangtum aphan Ijip nangrap dunpo pu nangtum matha ma, bonta lake arpik ahong kedam ahut kechepachin asonpo, la ching-loksi ari krong ak po. Lasonsi badutame Ijip arecho aphan kechiki atum plangpo.”

⁷Assiria a-saihemphu ningje bom-lang; “Mate nangtum, nangtum a-Arnam HEMPHU aphansi chikilo pu nephan nethanji ma? Judah lapen Jerusalem aphan elongvet adovan alongsi archo nangji pu Hezekiah kethan ahut la amethangsi HEMPHU kangtui adim-heihei lapen adovan-heihei kepavirlo kalima.

⁸Rechokethe amen ne nangtum aphan nang arju-lang. Ne nangtum aphan jon suri hini alosei nangpilang nangtum angbong lahei pangplong thekjima.

⁹Assiria a-saihemphu kemanmenei abang pen seta nangtum pangbar un-e, la anta nangtum Ijip atum pen ronhemkonglong, losei-heihei nangkelongji ningchethe bomlang.

¹⁰Nangtum adet HEMPHU akerap kali pen pen ne tengkheng-lo lapen pavirlo pu matha ma? HEMPHU amethangle tengkhengnon lapen pavirnon pu nephan nethan lorlo.”

¹¹Anke saihemphu aphan Eliakim, Shebna, lapen Joah pulo, “Aram alam pen le nelitum aphan ningje ik non. La nelitum chini. Ibri alam ningje ik-ri; paisong athak kedo arat atum nang arjudunding lo.”

¹²Alangli thak lo, “Lahei alam nangtum lapen recho aphan det tong rechokethe nephan nangpathan toi pu nangtum matha ma? Kali, paisong athak kedo arat atum aphan jokta pathan toi lo, nangtum asonsi latum anta abarpi checho nangpo lapen abarso alang chejun nangpo.”

¹³Anke saihemphu abang arjapsi Ibri alam pen hang asepathelo, “Nangtum aphan Assiria arechokethe kopisi kepu ma arjutha”

¹⁴Nangtum aphan Hezekiah nangpachobei longle detjisi pacheretoilo. Hezekiah nangtum aphan pajok un-e.

¹⁵Nangtum HEMPHU aphan pachikiji aphan nangpaja longri. HEMPHU nangtum aphan nangpajokpo pu nangtum mathasi lapen la nangtum arongsopi aphan Assiria aron-armu kecheraidet pen khang un-e.

¹⁶Hezekiah aphan arjuri! Assiria arechokethe nangtum nangbarra kechehodai detjisi nangtum aphan hukum pilo. Nangtum adrakha-aberi pen drakha alang junlongji, lapen thebo arong pen athe checho longji, lapen nangtum methang alangtuk-heihei pen lang chesok longji,

¹⁷nangtum adet asonthot nangtum aphan rechokethe puthot along kaprek nangtoitetik; hadak drakha-beri along longji lapen him kepaplengji aphan sok-sang doji.

¹⁸Hezekiah nangtum aphan HEMPHU-si nangpajok lo pu nangpamatha longri. Assiria arechokethe arideng pen halatum a-arnam adet aphan rai dun un loma?

¹⁹Halatum non konat lo, Hamath lapen Arpad a-arnam-heihei konat-lo? Shepharvaim a-arnam-heihei konat lo? Samaria aphan inutbak rai dun un loma?

²⁰Rechokethe arideng pen komatsi halatum aphan arnam-heihei atum kepajok kethek long-lo? Tangte Jerusalem aphan HEMPHU pajok un pu kematha loma?

²¹Rat-atum doklip lo, halatum aphan Hezekiah recho kepu ateng lo; latum lam ethe ta ningje je.

²²Anke Eliakim, Shebna, lapen Joah atum aningduksi ape chingsek lo lapen Assiria a-saihemphu kopisi kepuma recho aphan than damlo.