Read Karbi ISAIAH 37 Bible Online

ISAIAH 37 - Karbi bible

ISAIAH 37

¹Halatum kethan alam Hezekiah recho arjulong-lok pen, la aningduksi ape chingsek lo, lapen pethoila che-umlo, lapen HEMPHU Kardomhemthepi anat damlo.

²Alangli rechohem kehon ahemphu Eliakim, Kangsaihem achunbang Shebna lapen arta kedo akurusar atum aphan Isaiah montri, Amoz asopo anat toi lo. Halatum anta pethoila che-um lo.

³Alangli halatum laso abirta si Isaiah aphan papidam toi lo: “Pini ke kesung arnilo; etum aphan aduk pilo lapen epinremtang-lo. Eli ke asomahang kepathekji kechesik a-arloso ason lo, bonta la keklemji ainipik.

⁴Kereng-et a-Arnam aphan kangtonjisi Assiria arechokethe ke abankethenei nangchetoilo. Nang Arnam HEMPHU laso akangton alam-heihei parjunang, lapen lahei keningje abangphan aduk papinang. La apotsi erat-aso kerenglang atum aphan Arnam ardompitha.”

⁵Hezekiah recho abirta Isaiah arjulong-lok pen,

⁶alangli labangso abirta voithulo: “HEMPHU nangpajok un-e pu Assiria atum kepu alam pen nangli pathir longri pusi alangli pulo.

⁷Rechokethe aphan HEMPHU-si kechethantap arki parjulongpo la pen ajok la amethang adet chedam jui po, lapen HEMPHU-si hadak amat pathi lot po.”

⁸Assiria asaihemphu arjulong-lo rechokethe Lakish o-et lo lapen Libnah arongsopi adungsi ronchedan lo; lasi la hadak alangli pen kechingvaijisi damlo.

⁹Ijip aron-armu, Sudan arecho Tirhakah japonsi latum aphan ketengkhengjisi vang bomlo pu Assiria atum arjulong-lo. Rechokethe la arjulongsi, alangli Judah arecho Hezekiah aphan loh epak lolo.

¹⁰Lapen laphan paputoi lo, “Nangkechiki arnamsi nang rideng nanglele pu nangphan pulo, bonta la nangphan pachobei longri.

¹¹Nang arju long-lo kosonma Assiria arechokethe ke pavirji kematha adet aphan klemloma. Nang jok unji pu tong chematha ma?

¹²Gozan, Haran, lapen Rezeph arongsopi aphan nephusar atum pavirlo lapen Telassar kedo Betheden arat aphan pathi lo, lapen halatum aphan halatum a-arnam-heihei pajok un-e det lo.

¹³Hamath, Arpad, Sepharvaim, Hina lapen Ivvah arongsopi arecho atum konat lo?”

¹⁴Pherangke atum arideng pen Hezekiah recho loh enlo lapen la porhelo. Lapen alangli Kardomhemthepi anat damsi HEMPHU angno loh purdaksi bat lo,

¹⁵lapen ardomlo,

¹⁶“Jakongkethe HEMPHU, Israel a-Arnam, arvengkedo api athak anghoi kedo abang, nang inutpetsi Arnam chot, pirthe adang an pangrilo. Nangsi pirthe lapen sining inghun pinchong-lo.

¹⁷Non HEMPHU netum aphan no chedenduntha lapen netum kopi plang-loma nelangtha. Nang kereng-et Arnam aphan ko-an Sennacherib pinremloma arjutha.

¹⁸Netum kadokave chini lo, HEMPHU, Assiria arechokethe ongdung adet aphan pavirlo, halatum alongle parongman det lo,

¹⁹lapen halatum a-arnam-heihei me phrin et lo, halahei ke arnam kalipin, monit ari-heihei pen keselam thengpi lapen arlong akumlin chot.

²⁰Non, netum Arnam HEMPHU, Assiria atum pen netum aphan nepajoktha, anke pirthe adang adet atum ta nangsi Arnam chot pu chini po.”

²¹Anke Hezekiah recho akardom kethak alam than pachinijisi isi abirta recho aphan Isaiah lolo,

²²HEMPHU putang-lo, “Sennacherib, Jerusalem arongsopi nangphan nang ingnekchoi-tang-lo, lapen nang pinremlo.

²³Nangkangton lapen kepinrembom komat pusi nang kematha lo? Nang nephan nepinremlo, Israel Arnam Kangthir aphan.

²⁴Kecheparokajisi nang nenat nangban nangtoilo, nang kedo-an ronhemkonglong pen Lebanon kangtuinei anglong aphan haidet lo. Hadak kangtuinei a-Kedar arong-heihei lapen kemenei Saipras arong-heihei chor pakrep-lo, lapen ingnampi arlo anta nang ledamlo pu nang chepindak lo.

²⁵Nang langtuk-heihei hut lo lapen bidet alang junlo lapen Nil Aroi nang ron-aso atum patekungsi alang pakrenghak lo pu nang chepindak lo.”

²⁶Nang arjulongle langma lahei ne aphrang pen pathik tang-lo? Lapen non la Ne klemlo. Paisong kedo arongsopi kerupangsom un ajakong Ne nangphan nangpilo.

²⁷Hadak kedo arat atum ajakong chelongle det lo; latum phere-ot si dothing-thang-lo. Latum hidi abap asonle mate sarnung angsong kechingjok abap nihang atomon kero jap lote lahei jappon phit po.

²⁸Bonta nanglam Ne chinipame, nangkopisi keklem loma lapen nang konatsi kedam ma. Ne chini, nang ko-an nebethursi cherdak loma.

²⁹Halaso akecherdak alam Ne arjulong lo, lapen nang kecheparoka-heihei, non ne nangphan nangnokan arhi pen nangkrongsi nangno pavur lok po. Lapen nang kevang atovar lethot nangponthu det po.”

³⁰Anke Hezekiah recho aphan Isaiah pulo, “Lahelo kopi plangjima angthek lo. Pening lapen aphi nangli amung asok chopo, bonta adun aningkan nangtum sok var longji lapen la chorot longji, lapen drakha tiki si athe cholongji.

³¹Judah adet kerenglang atum thengpi arong asonsi thevur-vur po, angkur longle karnuk an lepo lapen athe pathe po.

³²Kerenglang rat-atum Jerusalem lapen Zaion Anglong athak ta doji, pima Jakongkethe HEMPHU la kepaplangji aphan mathathip lo.”

³³Assiria arechokethe aphuthak HEMPHU lasonsi pulo: “Laso arongsopi arlo la lut-le detji mate la anat thai aso eso ta ap-e detji. Rongsopi adung chong pen badu aron-aso ta vangve detji, lapen la akung longle bui be detji.

³⁴Laso arongsopi la lut-le pin pen kevang atovar amat chedamthujuiji. Ne HEMPHU-si ningje lo.

³⁵Laso arongsopi aphan Ne chedanpiji lapen la raiji, nemethang anong aphan pima neban David aphan ne chechak-lo.”

³⁶Assiria amukam HEMPHU apherangke damsi bang 185,000 aron-aso aphan pathilo. Puthot adap hadak halatum tiche lo, kadokaveta thi et lo!

³⁷Ansi Assiria arechokethe Sennacherib damde detsi Nineveh chiruijui lo.

³⁸Arnisi la amethang arnam Nisrok aphan kardomhem arlo karchobom ahut, asopo banghini, Adrammelek lapen Sharezer, laphan halatum anok pen pathilot lo, lapen latum Ararat adet katjui lo. Asopo anut kaprek, Esarhaddon, si la alar rechokethe cholo.