Read Karbi ISAIAH 38 Bible Online

ISAIAH 38 - Karbi bible

ISAIAH 38

¹Lason apor ahut Hezekiah recho aphu sodet lo, lapen thiji dok-dok lo. Amoz asopo Isaiah montri alangliphan kelang damjisi damlo lapen alangliphan pulo, “HEMPHU nangliphan pulo, nangli keklem nangji ason an chethik et non pima nangli keso memelo. Kethiji aphan chesik non.”

²Arpong anat Hezekiah pangnosi ardomlo:

³“Chematha tha, HEMPHU nangphan kekroithirklong lapen ahok pet pen ingduk lo, lapen nang nephan kopisi nepaklemji nang ninghang-loma ne kaita klem bor-i lo.” Lapen alangli aningdukpiksi chirulo.

⁴Ansi Isaiah aphan HEMPHU hukum pilo,

⁵Hezekiah along damra alangliphan than dam non, “Ne HEMPHU, nangphusar David a-Arnam nangkardom arjulong-lo lapen nangmekri thek long-lo. Ne nangphan ningkan krepho an nang padolongji lang.

⁶Ne nangphan lapen Assiria arechokethe arideng pen laso arongsopi aphan ta pajok po, lapen rongsopi aphan kaita rai bompo.”

⁷Isaiah pulo, “HEMPHU kechechak alam kechebiji aphan alangli isi angthek nangliphan paklangpo.

⁸Ahaz recho kekim adongkam along HEMPHU-si harchi kengkam kep aphi pachirui po. Lapen harchi kengkam kep aphi chiruilo.”

⁹Hezekiah keso pen me si alangli laso akero alun tok lo:

¹⁰Ne mathalo sar-ang-lok ahut Ne kethi apirthe anat dampo, Ne kaike aphan reng-relo.

¹¹Laso kedo apirthe ne mathalo, Ne HEMPHU aphan puthot thek longle pin po mate kerenglang badu aphan ta.

¹²Ne chethe chorpet lapen jut kok lo isi apehem kephri ason, Pe le therang pen keteng ason ne mathalo Arnam nechethe pajut lo.

¹³Jopangthang keso ne ar-em lo, Hingho si nereppi nekelok ason thak-thak ne mathalo Arnamsi nekai pajut lo.

¹⁴Nese roptak lo lapen ainihak lo, Lapen vothung asonsi ne ar-em lo. Sining kelangji nemek so-ang-lo. HEMPHU, lahei akesung do-an pen nepajoktha.

¹⁵Ne kopisi pupo? HEMPHU-si la klemtang-lo. Nening hodak lapen nemek-jang thekthe.

¹⁶HEMPHU, nangphan ne rengpo, nangphan chot; Nepame non lapen nepareng-long non.

¹⁷Nening keduk ningkangsam plangpo. Nang kedo-an akesung pen nepajok lo; Nang nepap do-an nediya lo.

¹⁸Kethitang apirthe along baduta nangphan nangro thekthe; Kethitang atum nang kekroithirklong aputhak chikithekthe.

¹⁹Kereng-et atumsi nangphan ro thek; Non ne nangphan kero ason apo atum nang ko-an kekroikethir ma Asomar aphan chethan.

²⁰HEMPHU, nang nepamelo. Netum kumbeleng rotji lapen nangphan kero alun lunji, Netum rengtik-an nang Kardomhemthepi along kero alun lunji.

²¹Recho aphan Isaiah thebo athe pen ingthum athak pahitoi lo, lapen alangli medet po.

²²Anke Hezekiah recho arjulo, “Neli Kardomhemthepi anat dam unpo pu angthek kopilo?”