Read Karbi ISAIAH 40 Bible Online

ISAIAH 40 - Karbi bible

ISAIAH 40

¹“Ning paplitha nerat-atum”, pusi netum Arnam pulo. Latum aphan ning paplitha!

²Jerusalem arat aphan ningparungtha. Halatum aphan than non latum sungpik lo, lapen latum apap-heihei non diya-tang-lo . Ne halatum aphan apap-heihei apot dorphlup aduk pilo.

³Isi ase hangtang-lo, “Kejejangtang ajo HEMPHU aphan atovar soipinon! Sangtimili ajo netum a-Arnam aphan tovar soipinon!

⁴Arlok tin or non; Inglong tin paklam non. Inglongso-heihei thoi plangpo, lapen kesophrok ajo neilor po.

⁵Anke HEMPHU adak atur klangpo, lapen kedo-an monit aso atum la thek longpo. HEMPHU amethangsi la chechak-lo.”

⁶Isi ase hangtang-lo, “Isi abirta pachethang non!” “Kopi abirtasi ne pachethangpo!” Ne arjulo. “Pachethang non, monit an bap ason; nampi amir apar latum ajir dingde.

⁷Bap chekedu lapen mir apu-heihei kreng, HEMPHU tomon nangketoi ahut lahei athak jap po. Rat-atum bap apar achethe dingde.

⁸Kalang, bap chekedu lapen mir apu-heihei kreng-lo, bonta netum a-Arnam alam kaike dover.”

⁹Jerusalem, inglong kangtui athak arlunon lapen birta keme pachethang non! Ase kethe pen hangnon, Zaion: Birta-Keme pachethang non! Ningje non, phereri. Judah arong-heihei aphan than non halatum a-Arnam vangbomlo!

¹⁰Jakong pen Muluk a-HEMPHU vangsi pangripo, alangli kepajoktang arat alangli chevanpo.

¹¹Biresak kevi-abang asonsi alangli pi ahur ora-po; alangli kedo-an abiresak aso pangrumpo lapen arbaksi lahei ponpo; halatum apei aphan alangli japonjoipo.

¹²Ari chekip pen mane talopi pun un ma mate ari pen sining inghun pun-un ma? Mane pirthe alongle harlung arlo thap-et un ma mate thuli pen inglongpi lapen inglongso-heihei lin un ma?

¹³Mane abang HEMPHU aphan kopi klemnangji than hai ma? Komatsi alangliphan thanpo mate pare po?

¹⁴Kethek ji aphan lapen kechini ji aphan lapen kam kosonsi keklem ma kecharliji aphan, Arnam komat pensi charjupo?

¹⁵Det-heihei HEMPHU aphan thangta kali lang emu alonrek ta ave; kehelo alanglom-heihei longle aduk ason karjang.

¹⁶Lebanon Anampi-heihei api kedo-an etum Arnam aphan kethokji dorde, lapen la athengpi-heihei kethorji aphan ong-e ong lang.

¹⁷Alangliphan det-heihei thangta kali binong.

¹⁸Arnam komat pensi pangbarpo? Alangli kosonsi nang kopusi than pajirmipo?

¹⁹Kamklembang atum keselam akumlin ason alangli ke kali; lapen tasam kepachor atum ser ketop lapen rup aklong athak kebi amar asonta kali.

²⁰Rup mate ser kelong un-e amonit atum angru kebonbe athengpi chongvai. Alangli kethekser kerot abang risi kekli un-e pin akumlin paselampo.

²¹Nang chinine det ma? Nangphan aphrang pen nangthakthe langma? Pirthe kosonsi cheng-loma nang arjulongle langma?

²²Amethang recho anghoi athak kangni abangsi la pinchong-lo pirthe athak lapen sining inghun apar anta; aber kedo amonit atum miso asonsi kelang bihek-hak. Kehing ape asonsi alangli sining inghun sangjailo, eli kedo apehem ason.

²³Jakongkethe pangri atum aphan alangli pasunlo lapen latum aphan pabiheksi thangnat ta kalidet paplang-lo.

²⁴Latum athengpi arongsomar ason, kechingjok mi, angkur chesak-o-elang. HEMPHU tomon nangtoi lote, lahei krengtaiji lapen sok-anar aphan ason vutphit po.

²⁵Komat pensi Kangthir Arnam pangbar mepo? Alangli ason mane do ma?

²⁶Sining inghun langtha! Nangkethek long achiklo longso-heihei komatsi pinchong-lo? Inut ron-aso asonsi lahei aphan kejapon abang, hadak ko-an ake-ong ma alangli chini lapen amen hang! Alangli jakong pu-an kethe-halatum isi ta ingbobe!

²⁷Israel, tangte nangtum kopi athesi HEMPHU nangtum akesung chinine mate ahok akangsai se akesung kepho ahut nanglangle pu pasimulo?

²⁸Nangtum chininema? Arjulongle det ma? HEMPHU ke kaike dover Arnam; Pirthe kedo-an alanglisi pinchong-lo. Alangli lak-le mate ainine. Baduta alangli kematha chini un-e.

²⁹Ke-aini lapen kelak atum aphan alangli jakongpi.

³⁰Riso atum aini hakji Risomar-atum ajakong ik detji.

³¹Bonta HEMPHU aphan kerap-kelongji pu kechiki abang halatum ajakong chepami longji. Latum vomu atum asonsi ingjarji; latum katji bonta lak-le latum damji bonta ainine.