Read Karbi ISAIAH 41 Bible Online

ISAIAH 41 - Karbi bible

ISAIAH 41

¹Arnam pulo, “Dojoira nephan no cheden non, nang kehelo adet atum! Kangsaihem nanglam kevangjile chesik non; nang lam ethe keningje apor longji. Komatsi ahok ma vang pet ra eli phar lonang.

²Nihang pen kehaidong abangphan la kevan abang komat lo, la kedam aling pahai thor nang ma? Komatsi recho atum lapen det-heihei aputhak kepahai lo? Halatum aphan alangli nok pen arbulo halatum longle aduk-abun ason. Sok-anar le tomon along kangjar ason Alangli thai aso halatum aphan hijikjam lo.

³Kehungdunjisi la dambomlo lapen jokvansi damlong bomlo. Lapu-an keprap la longle paphore lo.

⁴Komatsi la paplangpo? Komatsi phurkimo paplangpo? Ne, HEMPHU-si, kechengsi ta dolo, lapen Ne HEMPHU-si kejut anta doji.

⁵‘Kehelo adet atum Ne kopi klemloma thek longpet lo; latum pherepik lo lapen kephere a-ok klemhur lo. Lasi latum kedo-an ta chingrumlo lapen vang-lo.

⁶Risai klembang cherap lo, lapen lahin lahin aning cheparung-lo.’ ”

⁷Serpachor abangphan thengpi akimbang pulo, “Keklem me-o-lo!” Kumlin kesoi panai abang asak kesak rap-rap aphan aning parungpo. Latum pupo, “Kepabon me-o-lo” lapen latum kumlin asak-heihei pen sak het-lo.

⁸“Bonta nang, neban, Israel, Nangtum helo ne kangvaitang arat Abraham nejirpo asumar lo.

⁹Pirthe kejut pen ne nangtum aphan nangvanlo; la kehelonei ano pen ne nanghang-lo lapen nangpulo, ‘Nangtum nebanlo.’ Ne nangtum aphan varve, bonta ingvailo.

¹⁰Phereri- Ne nanglong dolo! Ne nang Arnamlo-jat ta nangphan paphere longri! Ne nangphan pangtangpo lapen nangrap po; ne nangraipo lapen nangpajokpo.

¹¹‘Nangphan aningkethi atum kerem aketherak chechini po. Nangpen kechedan abang thiji

¹²Lapen pirthe pen avedet ji.

¹³Ne helo HEMPHU, nang Arnam lo;’ ” ne nangphan jakongpisi pupo, “phereri, ne nangrap po.”

¹⁴HEMPHU pulo, “Kebi lapen ke-aini nang, Israel, phereri; Ne nangrap ji. Ne, Israel a-Arnam Kangthir, si nang phan nang kepajok a-Bang lo.

¹⁵Ne nangphan sok-kesi ajar-op ason nangpinchongji, akemi lapen kereset aso. Inglongpi-heihei nang si-po lapen halahei pavirpo, nang inglongso-heihei ta paduk-i po.

¹⁶Nang lahei aphan tomon pangjar-et po; tomonsi lahei pon et po, lahei tomonpi pen ajok papratsei po. Anke nangtum ning arong-o po, pima Ne nang Arnam; Israel Arnam Kangthir aphan nang rovekji.

¹⁷‘Nerat aso-atum halatum lang kenangji aphan chori vung ahut, halatum lang kangit si alangjoi kreng-et ahut anke Ne, HEMPHU-si halatum akardom thak lo Ne, Israel a-Arnam, latum aphan kai seta o-e.

¹⁸Ne kekrengtai anglongso-heihei angbong, langroi-heihei lang paliji; lapen arlok-heihei along langmek paliji. Sangtimili ajo Ne langteng-heihei paplengji lapen kekrengtai ajo langmek paliji.

¹⁹Sangtimili ajo seta Kedar athengpi arong-heihei pavangji. Kekrengtai ajo ingnam athengpi arong vangji, thengjangthu anampi, Juniper lapen Saipres vangji.

²⁰La rat-atum thek longpo, lapen chinipo, Ne, HEMPHU-si la klemlo. La Israel a-Arnam Kangthir si paplanglong lo pu latum chini po.’ ”

²¹Israel arecho, HEMPHU-si la pulo: “Nang det-heihei a-arnam atum, nangtum kekhinde alam chevan non. Nangtum kekhinde akemenei alam chevan non!

²²Ladak vangnon lapen kopi plang poma pumek-et non, anke la komantu plang poma netum chini po. Aphrang keplangtang alam-heihei kangsaihem along than non lapen halahei kopi kepuma nethan non.

²³Netum aphan mo aphi kopi dojima nangthan non- anke nangtum arnam-heihei lo pu netum chini po! Akeme akam ajehak klemnon, mate ajehak akehingno van non; netum aphan kephere paplengset non!

²⁴Nangtum lapen nangtum keklem an thangta kali; nangtum aphan karcho atum nang hijim lo!

²⁵‘Nihang kedo inut amonit aphan Ne ingvaitang-lo; nirep pen kepatengkhengjisi laphan Ne vanpo. Inghan kepatekung asonsi, la pangribang atum aphan patekungpo, tebuk kethip abang inghan kedong ason.

²⁶Laso angbong kolo abangsi keplang poma, nangtum than-mek-et tang-lo, anke nangtum kepu mesenlo pu netum nangpu longpo! Laso aputhak nangtum ethe ta ningje je; nangtum keningje baduta arju longle.

²⁷Ne, HEMPHU-si, Zaion aphan birta kethancheng abang-lo;’ ” Kepathanjisi Ne Jerusalem anat pherangke toilo, “Nangrat atum vangbomlo! Latum hem chevang-lo!

²⁸Arnam-heihei angbong Ne kelang ahut halatum ethebak ta keningjeji thek longle; latum inutbak ta ne karju alam nangthak damthek abang ave.

²⁹Lahei kedo-an arnam amovangve; latum thangnat ta klemthekthe, lahei akumlin ainihak lapen jakong avepin.”