Read Karbi ISAIAH 42 Bible Online

ISAIAH 42 - Karbi bible

ISAIAH 42

¹HEMPHU pulo, “Ne jakongkepi aban daksi do, Ne kangvaitang abang, laphan Ne ning chingsampik. Alangliphan ne karjong paplengset lo, lapen alangli akheitin aphan ahok akangsai van pipo.

²Alangli hangserse det po mate ningje jelo, mate tovarpi-heihei along hangprak-pre detji.

³Kekurtang a-arpik alangli ingdide detji mate kemep-ri amelur vut thipthe detji. Alangli ajirkeding ahok-akangsai vanpo.

⁴Alangli ningkechethe mate angthin chepatheo-e detpo; pirthe athak ahok-akangsai alangli sengpo. Kehelo kedo adet-heihei atum alangli akethan chonghongphrong po.”

⁵Arnamsi sining-heihei thip lo lapen lahei sangjai lo; pirthe lapen hadak kedo an aphan alangli selam alon pilo; arat kedo-an aphan alangli chethe lapen parengphunlo. Lapen non aban aphan HEMPHU Arnam pulo,

⁶“Pirthe athak ahok-akangsai kepaklemji aphan Ne, HEMPHU-si nangphan nanghang-lo, lapen jakong nangpitang-lo. Nang pen ajok Ne kedo-an rat-atum pen kechejok aloh chetok po; nang pen ajok khei-heihei aphan kethe-ang Ne vanpo.

⁷Amek kave abangphan nang amek ingpupo, lapen kangting kebeng adim kangni atum aphan nang pajok po.

⁸Ne HEMPHU inut petsi nang Arnam chot. Badu a-arnam ta nedak-netur nang chethak dun longle; Nephan kero, kumlin-heihei nangchethak dun longle.

⁹Ne kepu-mek alam non chekok lo. Non, Ne nangtum aphan akemi ason nangthanpo, lahei keplangji alam aphrang nangthanpo.”

¹⁰HEMPHU aphan lun kemi lun non; pirthe adang, alangli kero lun pet non! Alangliphan ropet non, nang talo kevek atum; alangliphan ropet non, talo api kedo-an! Kehelo adet-heihei lapen hadak kedo atum an lun pet non!

¹¹Sangtimili lapen la arong an Arnam aphan ropet non; Kedar arat atum ta alangliphan ropet non! Sela arongsopi asor inglongpi-heihei angton pen ning-arong ase pathenang!

¹²Kehelo kedo adet-heihei atum HEMPHU aphan kero lapen anong pathe non!

¹³Ron kechedan abang asonsi HEMPHU bartang-lo; alangli chesikding-lo lapen ron kechedanji ingtung lo. Ron akehang alangli hangser lo, kechedan akehang; alangli hotur atum aphan alangli jakong paklang-lo.

¹⁴Arnam pulo, “Penang an arni ne dojoilo; nerat aphan Ne thakthe det lo. Bonta non keklem nangji apor nangle tang-lo; arloso osochepathe kar-em asonsi Ne hangser lo.

¹⁵Inglongso lapen inglongpi-heihei Ne pavirpo lapen bap lapen thengpi arong-heihei pakrenghak po. Arlok-heihei alangroi sangtimili paplangpo lapen langteng alang pakrenghak po.

¹⁶Halatum kaita kedamdelang atovar-heihei nerat aso aphan Ne japo. Halatum akangting pathe-angpo, lapen kesophrokjok alongle halatum angno panailun po. Lahei helo ne kechechak lo, lapen lahei paphlutphle pin pen Ne lam chebipo.

¹⁷Kumlin-heihei aphan kechiki an atum, kumlin-heihei aphan a-arnam kechepu atum an aphan patherakpo lapen pinrem det po.”

¹⁸HEMPHU pulo, “Nang no-kangthong arat-atum arjutha! Patebok-het ra langtha, nang mek-kave atum!

¹⁹Mane neban apar amek-kave dolangma, Ne ketoi apherangke apar anokangthong dolangma?

²⁰Israel, nang thek-long pik lo, bonta la nangtum aphan kopi pulo? Karjuji aphan nangtum nangno do pet, bonta ahokpet nangtum kopisi karjulong-lo?”

²¹HEMPHU ke kepajokji aning kehang a-Arnam, lasi alangli ason-heihei lapen alangli akethan-heihei pathelo, lapen alangli rat-aso atum halahei aphan, mankepiji alangli aninghang-lo.

²²Bonta non alangli rat aphan phangno pi-et lo; hi ahilik ajo halatum aphan bengchok lo lapen kebeng adim chepatu nangjoi lo. Latum aphan thipon lo lapen phangnopilo, latum aphan kepajokji abang baduta vangve.

²³Laso alam nangtum angbong arjuji ma? Non pen nangtum arjupame poma?

²⁴Komatsi Israel aphan kangtui arideng hodai lo? Lake HEMPHU amethang amat lo, alangliphansi eli chopap lo! Alangli ephan aningkehang ateng eli dopi thekthe det lo mate alangli ephan ekethan alam kroipi thekthe det lo.

²⁵Lasi alangli aningkethi ajakong ephan pachini toilo lapen ron kephangno akesung pache-chaktoi lo. Israel adang bithe me asonsi alangli ningkethi cholo, bonta kopi plang-loma eli che-chini ne det lo; la pen eli thangnat ta charliledet lo.