Read Karbi ISAIAH 43 Bible Online

ISAIAH 43 - Karbi bible

ISAIAH 43

¹Israel nangphan nangkepinchong abang a-HEMPHU pulo, “phereri- Ne nangpajokji. Nangphan Ne nangmen nanghang-lo-nang nemarlo.

²Langkarnuk le nang hat seta, Ne nanglong nangdodunji; nangkesung nangphan nanghai un-e lo. Me angkang angbong nang hatnang seta, nangphan nangchoche; Kesung nei asat vang seta nangphan thangta phangno un-e.

³Athema Ne nang Arnam HEMPHU lo, nangphan nangkepajok Israel a-Arnam Kangthir abang-lo. Nangkepajokjisi Ne nangphan Ijip nangparap det po; Sudan lapen Seba aphan nanglar pidet po.

⁴Nangchethe nangkepajokjisi khei atum aphan o-et po, pima nang nephan ador sopik lapen pima ne nang chinghon-o, lapen nangphan man nangpi-o.”

⁵Phereri! Ne nanglong do! “Nihang kehelo pen nichi kehelo an, Ne nangrat aphan hem nangvanpiji.

⁶Nirep aphan Ne pupo, latum aphan padam long non lapen nitur ta latum aphan khangri pupo. Nerat-aso atum kehelo adet pen pachevang longnang, pirthe atok-anotin pen.

⁷Latum nemethang arat, lapen nenong kepavanji aphansi Ne latum aphan pinchong lo.”

⁸Arnam pulo, “Kangsaihem nerat hang non. Latum amek-heihei do, bonta latum thek-longle; Latum ano-heihei do, bonta arjulongle!

⁹Det-heihei aphan kangsaiji le hangpet non. Mo-aphi akai alam komat a-arnam atumsi pumek thekji? Non kopisi plang-loma latum angbong komat abangsi pumek-lo? Lahei a-arnam latum chok lo pu ahaki pachevanpet lonang, halatum alam ahok lo pu haki kepiji aphan.

¹⁰‘Israel arat, nangtum ne haki lo; Neban keplangji aphan Ne nang-ingvai lo, ansi nang nephan chini po lapen kroipo lapen Ne si Arnam chot pu chini po. Ne pen apar anut kaprek a-arnam avelo; aphrangta ave lapen aphi ta avelo.’ ”

¹¹“Ne inutpet si HEMPHU chot. Nangtum aphan kepajok-un abang.

¹²Kopi plangjima Ne than mek un, lapen Ne nangtum aphan nangrap lo. Bidet arnam inut ta lason klem un-e; nangtum nehaki lo.

¹³Ne ke Arnam lapen kaiketa plangverpo. Nejakong pen baduta chepajok un-e; ne keklem ason baduta lar un-e.”

¹⁴Israel a-Arnam Kangthir, nangkepajok abang HEMPHU-si, pulo, “Nangphan kepajokjisi, Bebilon abe thursi Ne ron-armu nangtoi po; ne rongsopi anghap-heihei phripo, lapen halatum akehangjo kechirujo paplangpo.

¹⁵Ne HEMPHU, nang Arnam Kangthir. Nang Ne nangpinchong lo, Israel, lapen ne nangrecholo.”

¹⁶Hako ahut talo ajo HEMPHU tovar pinchong-lo. Langthepi angbong isi atovar.

¹⁷Isi jakongthedung aron-armu aphan alangli pavirtoi lo, isi ronhemkonglong lapen losei-heihei aron-armu. Latum pip-et lo lapen thurthekthe det lo, melur ade kepamep chok asonsi vir-et lo.

¹⁸Bonta HEMPHU pulo, “Hako ahut keplangtang aputhak otthip-ri mate hako keplangtang alam ton-e ri.

¹⁹Ne akemi keklemjilang asonle cholang ding non. La plangbomlo la nang non thek-longpo! Kejejangtang ajo angbong ne tovar selampo lapen hadak nangtum aphan langroiso-heihei nangpiji.

²⁰Nampi api jok ta nephan man nepiji; Kejejangtang ajo ne kangvaitang arat aphan lang kepijisi langroi alang kepali ahut serung lapen ostrik avo ta nephan roji.

²¹Latum nemethang aphan kepinchong arat lo, lapen latum nephan kero alun lunpo!”

²²HEMPHU pulo, “Bonta Israel, nang nephan nanglang selet huilo; Nang nephan ne-archoche det lo.

²³Biresak kephrin athok nang nelong vanve; Nang athok-heihei pen nephan manpipe. Athok-heihei kehang pen ajok ne nangphan pasungse mate methek-heihei kehang pen ajok nang pajut-rang-re.

²⁴Nang nephan hijung namra thorthe mate nangpi-athu-heihei pen nephan ningpangsamse. Bonta nang pap-heihei pen nephan arbok hup lo; nang kechokche akam keklem pen nepajok-lo.

²⁵Tebonta, ne ke nangpap-heihei kediya a-Arnam lo; pima ne ke Ne lo apotsi la klemlo. Nangpap-heihei nening chebiverve.

²⁶‘Kangsaihem eli damlonang; nangkebokji an chevan non! Nang ahokpet pu aporman chepaklangjile nang kekhinde chevan non!

²⁷Nangphrang nangphusar atum pap klemlo; nangjalin atum nephan langplotsi pap klemlo.

²⁸Ne Kangthirhem nang pangri atum pasa-ur lo. Lasi Israel aputhak ne kevir vanlo; nerat aso aphan ne pangton-pangthi long-lo.’ ”