Read Karbi ISAIAH 44 Bible Online

ISAIAH 44 - Karbi bible

ISAIAH 44

¹HEMPHU pulo, “Non arjutha, Israel, neban, ne kangvaitang arat, Jakob asomar.

²Nangphan kepinchong abang HEMPHU nehelo; nangmahang kethek ahut pen, ne nangrap lo. Phereri; nang neban, ne kangvaitang ne kechinghon arat.”

³“Kangit adet aphan ne lang piji lapen kekrengtai ajo langjeng paliji. Nangsomar aphuthak ne karjong dungji lapen nangpoton aphuthak ne hirjumepiji,

⁴Latum langkelong abap ason chingjokji, keli alangkung ajo ason thak-thakji.”

⁵“Inut-nut, rat-atum pupo, ‘Ne HEMPHU amarlo.’ Latum Israel arat along chelang dunpo. HEMPHU amen abangphutin ari long angthek chebipo, lapen Arnam arat angbong inut lo, pu chepupo.”

⁶Israel aphan kepangri lapen kerai abang HEMPHU, Jakongkethe HEMPHU la kepuji do. “Ne helo, kecheng lapen kejutsi, inutpet a-Arnam Ne pen apar badu a-Arnam avelo, bonta ne chot.

⁷Ne keklemtang akam ason mane klemthekji ma? Kecheng pen kejut an komatsi kopi plangjima than mek unji?

⁸Nerat atum, phereri! nangtum chini ne hako ahut pen nonpu an kopi plangjima ne than mek lo lapen nang nehaki lo. Anut kaprek Arnam dolangma? Jongsi anut kaprek jakongkethe arnam dolang pulote ne arjulonglelang?”

⁹Kumlin keselam an amovangve atum lo, lapen ador kedo-o pu latum kepathe ta amovangvelo. Lahei arnam aphan karcho atum an amek-kave atum latum chininelo, lapen latum aphan pinrem det po.

¹⁰Inut a-arnam aphan karchoji aphan tasam pen kumlin kethip ke la kemesen kali!

¹¹La karcho abangphutin aphan patherak po. Kumlin-heihei keselam atum monit chot la pen apar thangta kali. Latum pavang ra asat kelangjile parjapnang-latum pherepiksi pinrem cholongpo.

¹²Tasam kepachor atum isi tasam enpo lapen me along la klempo. Kepachorjisi la kangtangrak ari kebu otsi tasam aputhak thengpo. La klembomsi la ingchirlo, ingit-lo, lapen lak-huilo.

¹³Thengpi akimbang thengpi pun. Saini-arlong pen la ang-ang siri po, ajohton-heihei pen la hangpo, lapen monit arje ason selampo, kelangmesen monit arje, ha ahem kechebiji aphan.

¹⁴Ke-en ji aphan la kedar athengpi rim tahai mate phongrong longpoh mate saipres athengpi ingnam ajo pen kalite thengjangthu arong epen kepatheji arve chonghong dingpo.

¹⁵Inut amonit ajehak athengpi ke theng en po, lapen ajehak ke kumlin keselam aphan la enpo. Ehin anat ke amethang chepar-omjisi me thorpo, lapen him dangpo, lapen ahin kaprek pen la arnam selampo lapen la ardom po.

¹⁶La ajehak athengpi pen me chethor lo; ok pakreng-si urlo, la cholo, lapen aning chepangsamlo. La chepar om-si pupo, “Ko-an akeme, lapen kar-om! Ko-an kelangme ame-akar!”

¹⁷Ahin athengpi ke la kumlin selampo, lapen la angphun patongki lo, lapen la ardomkhrup po. La aphan ardomsi pupo, “Nang ne Arnamlo- Ne pajok non!”

¹⁸Lason amonit atum jok-lu-ong latum kopima keklem chechinine. Latum ahok anat amek lapen aning chingpupe det lo.

¹⁹Kumlin keselam abang aphir-aphar mate la an kepuji kematha ajakong ave, “Ajehak atheng ke ne me phrindut lo. La athak ne ajehak ahim pangdang-lo lapen ok urlo lapen la cholo. Lapen ahin atheng an ne kumlin selamlo. Ladak ne theng abeng aphansi kecho-ardom!”

²⁰La thek lo kecho le aning kavedet ason. Laphan lapu an palu lo, la amethang cherap thekthe det an lo. Ari ke-otdong akumlin ke arnam kali pin pu la chekrongkre.

²¹HEMPHU pulo, “Israel la ning chemathatha; nang neban nang chemathatha. Neban keplangji aphan si ne nang pinchong-lo, lapen ne nangphan tengnene.

²²Inghun athan asonsi nangpap-heihei ne arkok et lo. Nelong vangnon; nangphan nangpajok abang ne chot.”

²³Chehok ra hangser non, nang sining-anghun! Pirthe karnuknei adim-heihei hang non! Chehok ra hangser non, inglongpi-heihei, lapen ingnam athengpi arongtin ta! Arat Israel aphan kepajok pen ajok HEMPHU ajakongkethe paklang tang-lo.

²⁴“Ne helo HEMPHU, nang pajok-abang; netoilo nangphan nangpinchong-abang. Ne inutpetsi sining-heihei seng-lo; ne pirthe kethip ahut, baduta nephan nerap dunde.

²⁵Ripak-ang-ang kelang atum aphan ne palulo lapen chiklolongso kelakha atum akethanmek, ne pachekok-ke lo. Giani atum alam-heihei pachokche lapen ajok halatum abidi ke kelulo pu pachinilo.

²⁶Bonta neban akethanmek lote, ne kemang alam kepaklangji aphan ne pherangke toi lote, ne halahei akemang lapen akethan mek-heihei pachekok po. Ne Jerusalem aphan pupo, hadak monit dothupo, lapen Judah arongsopi-heihei ta halatum chekimthupo. Halahei arongsopi-heihei keru pen thurpo.

²⁷Talothepi aphan ethe ahukum pen ajok ne pakrenghak lo.

²⁸Sairas aphan ne pulo, ‘Nephan nangsi nang-pangripo; Nangphan ne kopima nangpaklemji, nangklempo: Jerusalem pakimthuji aphan nang hukum pipo, lapen Kardomhemthepi aputah epo!’ ”