Read Karbi ISAIAH 45 Bible Online

ISAIAH 45 - Karbi bible

ISAIAH 45

¹Sairas recho kepachojisi HEMPHU ingvailo! Det-heihei aphan kehaithorjisi laphan alangli bat lo; laphan recho atum halatum ajakong kepavedetjisi alangli toilo; la aphan HEMPHU-si rongsopi-heihei anghap ingpu pipo. Sairas aphan HEMPHU pulo,

²“Nemethangsi nangtovar nangsikpiji, inglongpi lapen inglongso-heihei paklam etji. Tam anghap-heihei ne vung dakji lapen halahei abarlon ingdi etji.

³Kangting ajo pen, lapen kepatu adim-heihei pen khi-heihei Ne nangpiji; anke Ne helo HEMPHU pu nang chinipo. Lapen Israel a-Arnam nangmen nang hang-lo pu chinipo.

⁴Neban Israel Ne kangvaitang arat aphan keparapjisi ne nangphan nangbat lo. Nang nephan nangchinine-lang seta Ne nangphan aman kethe nangpilo.”

⁵“Ne helo HEMPHU, nepar anut kaprek arnam avelo. Nang kenangji ajakong nang nechini ne-lang seta nangpipo.

⁶Ne la keklem ke, pirthe ehin pen ahin kaprek abangphutin ta anut kaprek arnam avelo pu chini po.

⁷Kethe-ang lapen kangting ta nesi pinchong-lo; hirjume lapen kepavir ta nesi vanlo. Ne, HEMPHU-si lahei kedo-an ta klemlo.

⁸Sining-anghun pen arve ason kehai nangtoipo; La kedengjisi pirthe chingpupo lapen kejok lapen ahok-akangsai pangpharpo. Ne, HEMPHU-si la paplangpo.”

⁹Ipum atibuk, akaprek kedo-an atibuk pen isinat lo, la longletibuk kethip abang pen lam chedan unjima? Kethip abang kopi klemloma la longletibuk arjuma? Thipbang thang asai thekthe pu longletibuk pasimu ma?

¹⁰“Nangtum nephan lason kopisi kepinchong-loma” pu inutbak apo-apei aphan charju haiji ma?

¹¹Israel Arnam Kangthir HEMPHU, aphi akai ke-ot abang pulo; “Nesomar aputhak mate ne kopi klemji ma pu nephan nekethanji nang jakong ave.

¹²Nesi pirthe kepinchong a-Bang-lo lapen hadak kepadojisi monit akhei pinchong-lo. Ne jakong pensi ne sining-heihei sangjoilo; Arni, chiklo, lapen chiklolongso-heihei aphan nesi khang-lo.

¹³Ne kemang kepaplangji aphan lapen kam kepame ponji aphan Sairas aphan ne ingthursi paklempo. La kedam atovar an ne paklampo. Nerongsopi Jerusalem la kimthupo, lapen kenep kepontang nerat-aso aphan pajokpo. La keklemji aphan baduta laphan reng-re mate tangka pipe.” Jakongkethe HEMPHU-si ningje lo.

¹⁴Israel aphan HEMPHU pulo, “Ijip lapen Sudan akhi nang chepahemphupo, lapen Seba amonit ajonkeding atum nang ban plangpo; Ingchin ari chekoksi nangphi-phi latum nangdunpo. ‘Arnam nanglong do, alangli inut petsi Arnam chot’ pu latum nang ardomji lapen chekobirji.

¹⁵Israel a-Arnam, arat aphan pajok abang, ke amethang kechepatu Arnam.

¹⁶Kumlin keselam atum an therak nangji; halatum kedo-an aphan pinrempo.

¹⁷Bonta Israel ke HEMPHU pen ajok jokpo, lapen la akehai kaike doverji; la arat kaiketa pinrem longle detji.”

¹⁸Sining-heihei HEMPHU-si pinchong-lo- alangli ke inut a-Arnamlo! Alanglisi pirthe padolo lapen pinchong-lo la alangli pathirlo lapen adin padolo. Alangli la kepinchong parongman pajoi aphan kali, bonta monit aphan isi kedo adim. Alangli lasonsi pulo, “Ne HEMPHU lo, lapen ne pen apar badu a-arnam ta avelo.

¹⁹Ne ningje chonghuhe mate ne kemang alam patute. Rongman ajo Israel atum nephan nang ri nangne det lo. Ne HEMPHU lapen ahoksi ne ningje; kopisi akechokma ne pachini lo.”

²⁰HEMPHU pulo, “Vangnon khei kedo-an arat atum, det kevir ahut renglang atum an; kangsaiji kekhinde alam van non! Thengpi akumlin-heihei pen kecharjap-rep arat an lapen halatum aphan kepajok un-e a-arnam-heihei aphan kardom atum an, laso arat thangta chini ne!

²¹Vang-ra Kangsaihem kepho alam van non; Kechedan pi abang inut inut parju lonang. Aphrang kopi plangjima komatsi kepu mek lo? La Ne HEMPHU kalima, Arat aphan kepajok Arnam kalima? Akaprek Arnam baduta avelo.

²²‘Non ne nat nangpangno non lapen chepajoknon, pirthe adang kedo arat an atum. Ne si Arnam chot.

²³Ne kechak lake ahokpet lapen la chelarle lo. Ne kedo-an pen ne chechak lo: Abangphutin ta ne ingno vangji lapen akengphu patongji lapen nephan kroipamepo pu chechakji.

²⁴Ne pensi kehai lapen nelongsi jakong longchotji pu latum puhurji; bonta nephan kehijim abang therak nangji.

²⁵Jakob asomar an aphan ne HEMPHU-si pajokji, lapen latum nephan ropo.’ ”