Read Karbi ISAIAH 49 Bible Online

ISAIAH 49 - Karbi bible

ISAIAH 49

¹Kehelo adet-heihei, nelam arjutha, nang kehelo kedo arat-atum an! Ne mahang kethek aban keplangji aphan nebat-lo.

²Nelam nokjir ason kere alangli pinchong-lo. Alangli methang ari pen nerai lo . Thai aso ason alangli nepinchong-lo, repik lapen ke-enji aphan sik-koi.

³Alangli nephan pulo, “Israel nang neban; nang ajok, monit atum neroji.”

⁴Ne pulo, “Ne klemtang-lo, bonta la ningchethe no! Ne jakong an pen ne klemlo, bonta thangnat asonta chunche.” Seta nephan nekeraiji aphan ne HEMPHU aphan chiki lo; ne kopima keklem alangli nong-e nephan piji.

⁵Ne mahang kethek aphrang pen nephan HEMPHU nebat lo; alangli rat kevangthujisi Israel kepratsei arat kevanthuji si alangli nephan ban nepinchong-lo. Nephan HEMPHU man nepilo; alangli ke nejakong atiri lo.

⁶Nephan HEMPHU pulo, “Nangphan ne thedung akam dolang, neban. Israel kerenglang arat-atum kepathejile parengchot lo lapu kali, bonta det-heihei aphan isi akethe-ang ne nangpaplangji anke pirthe adang arat-atum jok-o tahai.

⁷Kehijimhurnei det-heihei atum kehijim abang lapen kepangri atum aban aphan, Israel a-Arnam Kangthir lapen kepajok abang pulo, ‘Nang kejok recho atum nang thek longpo lapen halatum thurpetsi nangphan man nangpiji; rechoso atum la kethek long abang nangphan man kepijisi halatum angphun chingdilo.’” Lason plangji pima HEMPHU-si aban aphan ingvailo; Israel a-Arnam Kangthir kechechak alam chebi.

⁸Arat-aso aphan HEMPHU pulo, “Nangtum aphan kepajok apor nangkele ahut ne nangtum abe si doji, lapen nangtum kerap aphan keningri nangthakji. Ne nangtum aphan ton si raipo lapen nangtum pen ajok kedo-an arat pen kechejok aloh chetok det po. Non kerongmantang nangtum alongle along ne puthot nangpado longji.”

⁹Kebengtang atum aphan ne pulo, “Jok-ra dam non! lapen kangting ajo kedo abangphan, ‘kethe-angle vangnon!’ pupo. Lapen inglong-heihei athak kechopan abiresak abi asonpo.

¹⁰Latum kaita ingchirche mate ingit-e lo. Latum aphan arni lapen sangtimili aluk tame phangno un-e det po, pima latum aphan lang amek ajok an ja ponpo.”

¹¹“Inglongpi-heihei ajo tovarpi ne selampo lapen nerat-aso atum kedamjile tovar isi ne selampipo.

¹²Nerat-aso kehelo adet pen vangpo. Nirep lapen nijang anat pen nitur ahin Aswan”

¹³Sining-heihei lun non! Pirthe, ning-arong pen hang non! Inglongpi-heihei lun kelun hangprak non! Arat aphan HEMPHU aning pangsampo; kesung arat aphuthak alangli jinsopo.

¹⁴Bonta Jerusalem arat-atum pulo, “HEMPHU netum aphan ne-otang lo! Alangli ephan tengne tang-lo.”

¹⁵Ansi HEMPHU thak lo, “Inut a-arloso a-oso aphan tengne unjima lapen mokkechu chopathevek a-oso aphan bangpi chinghonhe det unjima? Jongsi apei abang aso aphan tengne seta ne ke nangtum aphan kaita tengne ne.

¹⁶Jerusalem, nangphan kai seta ne tengne ne! Nangmen neripak-heihei along ne chetok-ang lo.”

¹⁷“Nangphan kekimthuji atum prapjin pen vangbomlo, lapen nangphan kepavir atum otekangpo.

¹⁸Adung-arei chelangtha lapen langnon kopi plang-loma! Nerat atum chepangrum bomlo latum hem chevang po! Ne kereng-et Arnam binong asonthot nang nerat-aso apot nang ningchethepikji, piso le apindeng pen apot kechehok ason.”

¹⁹“Nangdet ruhup lapen rongman et lo, bonta non hadak kedoji kevang atum aphan la bi-ong chotji. Lapen nangphan keparuhup atum nangpen kehelosi terek tang-lo.”

²⁰Ban kedo adim mahang kethek nangrat aso atum arnisi pupo, “Laso alongle ke bi-ong-kedoji aphan, netum angdeng nang-oji!”

²¹Anke nang nangmethang chepupo, “Komatsi nephan la-an osomar pado-lo! Ne osomar chepangbo tang-lo lapen dodelo. Neban damnang-lo, lapen nephlungjuilo, komatsi lahei a-osomar pangreng-loma? Nephan inutpetsi ne-otekang-lo. Lahei a-osomar konat pensi kevang-lo?”

²²Arat aso aphan muluk a-HEMPHU pulo, “Det-heihei aphan Ne asin pipo, lapen latum nangsomar hem vanpo.

²³Recho atum nangphan po atum asonthot plangpo. Rechopi atum pei atum ason plangpo. Latum nang ingno angphun chingdisi nangphan man pipo. Latum nangphan chepadisi halatum aman kepi nangphan paklangpo. Anke nang chinipo, Ne HEMPHU-lo. Ne kerap kechonghong abangphutin aning runlongledetji.”

²⁴Aron-aso kethipon amar nang pondet haijima? Kehaijai arideng pen kebengtang atum aphan nang pajok unjima?

²⁵HEMPHU thak-lo, “Lasonthotsi chokpet plangpo. Ron-aso atum kebeng amonit atum aphan pondetpo, lapen kehaijai kethipon amar khanglongpo. Nang pen kechedan abang pen Ne chedanpo, lapen nangsomar aphan Ne pajokpo.

²⁶Nangphan kechenek atum aphan lahin lahin Ne pachepathi-seroipo. Chepathi lapen avi-aphik pen latum ingripo. Anke monit an Ne HEMPHU lo pu chinipo. Nangphan kerai abang lapen kepajok abang-lo pu. Ne Israel Jakongkethenei a-Arnam pu latum chinipo.”