Read Karbi ISAIAH 5 Bible Online

ISAIAH 5 - Karbi bible

ISAIAH 5

¹Nangphan laso alun nangkelun pi ahut no chedenduntha, inut nejirpo lapen adrakha aberi alun: Nejirpo isi drakha aberi do, isi ho-or kedo anglong.

²Alangli longle tak-lo, arlong terek lo, kemenei alongle along adrakha elo. Kehonji aphan hemtap kimlo, drakha kelanaji aphan langtuk hut lo, drakha kemen an alangli chonghong-lo, bonta drakha athetin thordak lo.

³Lasi non nejirpo pulo, “Jerusalem lapen Judah asor nangtum methangle ne drakha aberi lapen netum angbong ingsai non.

⁴La aphan ne pine keklem-kle dolang ma? Tangte la kopi athesi athe-kethor patherong-lo, lapen ne ningkethe ateng athe-keme pathethe det lo?”

⁵Lasonsi ne drakha aberi aphan klempo; la kekompet ingsu apai an ne phur et si la aphan kerai apai phri et po, lapen ingnam api le la pacho ra la padong et-lonang.

⁶La along bap pavangthip lonang. Ne drakha ingprunprelo mate longle tak-telo, la alar ingsu abapsi pavangthip po. La aputhak arve kejangje detji aphan ne inghun khangpo.

⁷Israel ke Jakongkethe HEMPHU adrakha aberilo; Judah arat ke alangli ke-e adrakhasi klang-lo. Akeme akam kepaklemjisi alangli ningchethe lo, la kalile si latum pran armut lo. Kopima akeme keklemjisi nening thelo, bonta latum kechenek ot abang ahok-akangsai kelongjisi hangkong-lo.

⁸Nangtum kevirlo! Kedo-o atum kedo lethotjisi nang ongdung ahem lapen hidi-heihei namlo. Prapjin pen baduta kedo athai ave det po, lapen det along nang inut vet po.

⁹Jakongkethe HEMPHU keningje alam ne arjulong, “La hemthepo, hemkeme kedo-an ru-etsi avedetpo.

¹⁰Pima haphre kep alongle along kepathe adrakha lin 8 drakha alang si longchot ji. Lin 180 achili asok lin 18 longchot ji.”

¹¹Nangtum kevirlo! Nang kejun jisi adap thur dap prang-lo, lapen ajo penang an apor an dosi chepangrikong.

¹²Nangtum rong-kachepi arni kumbe-leng-heihei lapen prakso, lapen pongsi lapen hor pado. Bonta HEMPHU kopisi keklem ma nang chinine,

¹³lasi nangphan ta kebengpon atum ason nangpon det po. Nang jalin atum kang-chir lok thipin po, lapen jung-jung arat atum kangit lok si thipo.

¹⁴Chom ke latum aphan ingchir lo, lapen la angho chingpudang-lo. La jungjung arat-atum penpen Jerusalem a-arlengkethe atum aphan joilut po.

¹⁵Abangphutin aphan patherak po, lapen anekethe abangphan pabihek ji.

¹⁶Bonta Jakongkethe HEMPHU kopima akeme keklem pen ajok alangli kethe chepaklang-lo, lapen alangli arat-aso aphan kangsai pen ajok alangli ingthir-et pu paklang-lo.

¹⁷Rongsopi-heihei keru along biresak aso bap chore longpo lapen bi-aso atum chopan adim longpo.

¹⁸Nangtum kevirpo! Nangtum nang-methang apap-heihei pen kechepajokji un-e.

¹⁹Nangtum pulo, “Paprapjin pen HEMPHU kopima keklemji paklem lonang, anke la eli langdun lonang. Israel kangthir-et Arnam kemang ateng paklem lonang; Alangli ning arlo kopima kedo paklem lonang.”

²⁰Nangtum kevirlo! Nangtum kehingno aphan mesen pulo, lapen mesen aphan hingno pulo. Nangtum kangting pathe-ang-lo, lapen kethe-ang pangting-lo. Kopisi kehoma nangtum padok-lo, lapen dok-jok ason paho lo.

²¹Nangtum kevirlo! Nangtum reset pusi chemathalo, lasi resak binong-lo.

²²Nangtum kevirlo! Hor anokbe! Angthin kethe lapen kephere thekthe, la hor ingri lote!

²³Bonta tangka chosi adai kedo abangphan pajok lo lapen adokave atum aphan ahok akangsai pipe lo.

²⁴Lasi non, sok anar lapen bap kekreng le me kephrin dut asonsi nangkurthuji lapen nangmir apu krenghaksi vutphit po, pima ephan Israel a-Kangthir-et Jakongkethe HEMPHU ekethan alam nang dengde det lo.

²⁵HEMPHU ke arat aphuthak aning solo lapen latum aphan aduk kepijisi arichejar lo. Inglong klemhurpo, bun asonsi kethi arpum tovarpi tiche po. La pu anta HEMPHU aningkethi hamhe ji lang, bonta aduk kepijisi alangli ri chejar ding jilang.

²⁶Keheloving adet aphan HEMPHU kephajisi angthek pilo. Latum aphan pirthe kejut pen kepavangjisi alangli pasi-i vot lo. Lapen ladak latum vang-lo, chatpik, prappik pen!

²⁷Latum lak un-e; latum baduta patekungke. Latum mek-i-e lapen amek ta jangje. Avamkok isi bak ta setorte; akeng-op hingno ne.

²⁸Latum athai-aso repik, lapen latum athai ke-apjisi chesikding. Latum alosei akengkemo arlongkangtang ason ingtangrak, lapen halatum ronhemkonglong adang-heihei mongve ason charting-lo.

²⁹Latum aron-aso marat api kechonep lapen baduta kethipon un-e adim kepon ahingho atum ason.

³⁰Anerlo nanglelote, latum Israel aputhak ase talo leletik an hangpo. Laso adet langtha! Kangting lapen kesung! Kangtingsi kethe-ang aphan joilut lo.