Read Karbi ISAIAH 50 Bible Online

ISAIAH 50 - Karbi bible

ISAIAH 50

¹HEMPHU pulo, “Inut amonit apiso keti asonsi Nerat aso aphan Ne toi-juipo pu nang mathama? Tangte konatsi piso kecheti aloh kedoloma? Inut amonit asomar aphan ban kechojor ason Ne nangphan ban nangjorlo pu nang mathama? Kali, nangtum apap-heihei apotsi nangtum ban damnang-lo. Nangtum pran karmut apotsi damnang-lo.

²Ne rat aso aphan Ne kepajokdam ahut, latum kopi athesi nang chinidun thekthedet-loma? Ne kehang ahut, kopisi latum nangthak dundedet-loma? Ne latum aphan kepajokji aini-oma? Hukum kepi pen Ne talo pakrenghak-un, lapen langroi-heihei sangtimili paplang-un, laso apot lang kave pen lahei arlo kedo alang a-ok thipo.

³Ne sining-inghun pangtingkuk-un, kethi aputhak la keningri ason.”

⁴Muluk a-HEMPHU si nephan kosonma keningje nangji nethanlo, anke akelak atum aphan Ne pangtangthekpo, adapvangta alangli nephan kopima nekethanji aphan alangli nening pahangverlo.

⁵Kechini ajakong nephan HEMPHU nepitang-lo, lapen ne abethurthelo mate alangli pen suiselo.

⁶Ne kerap atum aphan nenung chepikok-lo, latum ne ingmum nangkephu lapen nemahang nekangthok ahut, latum nephan nekepinrem ahut Ne khangkhedet-lo.

⁷Bonta halatum kepinrem nephan thangta phangno un-e, pima muluk a-HEMPHU nephan nerap-lo. Lahei kechepaningdingjisi ne cherap-het-lo. Ne chini ne therak jok phlotpo,

⁸Pima Arnam tebok-het lapen alangli nephan adai ave aporman pipo. Mane nebe thursi nebokhaiji abang doma? Kangsaihem damrap-rap-lonang! La akebok pavannang!

⁹Muluk a-HEMPHU amethangsi nephan nechedanpipo tangte nephan komatsi nephan adaido pu aporman kepipo? Ne kebok atum an kat-etpo. Ingki kecho ape asonsi latum avedetpo.

¹⁰Nang HEMPHU aphan man kepi atum an lapen la aban alam-heihei kekroi atum an, nangtum kedam atovar ingtingkuk tahai, bonta HEMPHU aphan chikinon, lapen nang Arnam aphan charchaknon.

¹¹Nang bang aphan kepavirji kemang atum an, nang methang akemang-heihei pen virji. HEMPHU amethangsi la paplangji, nangkopai kelangno akesung phoji.