Read Karbi ISAIAH 51 Bible Online

ISAIAH 51 - Karbi bible

ISAIAH 51

¹HEMPHU pulo, “Kejokji ning kehang an atum, lapen kerap kelongji aphan nelong kevang an atum nelam arjutha. Nangtum kevang alongchong alam nangtum kehut arlong ahilik alam mathadamtha.

²Nangtum keplang nangphusar-nangphisar Abraham lapen Sarah alam mathadamtha. Ne Abraham aphan kehang ahut, la asomar ave, bonta laphan Ne pahirjumelo, lapen laphan a-somar pilo, Ne la asomar pa-ongdung-lo.

³‘Jerusalem aphan Ne kangjinso paklangji, lapen la keru along kedo-an atum aphan. Bangpi alongle kejejangtang ajolo seta, Ne la isi mir aberi paplangpo. Eden along ke-e aberi ason. Hadak ning arong lapen kechehok dopo, lapen nephan kero karcho alun lunpo.’ ”

⁴“Ne lam arjutha Ne rat atum, Ne kopima kepu arjutha: det atum aphan Ne thanji, Ne aron-heihei halatum aphan pathe-angpo,

⁵Ne vangdap-prangsi latum aphan pajokpo, Ne kehai apor tebok-het-lo, det-heihei aputhak nemethangsi pangripo, Kehelo adet atum ne kevangji chonghongding-lo, halatum aphan kepajokji aphan latum ningkethe pen chonghongding-lo.

⁶Sining-heihei langtha, pirthe anatta langtha! Mehi asonsi sining-heihei avedetji, peban asonsi pirtheta ingjepropji, lapen la amonit atum bitu asonsi thi-et khangjangji. Bonta Ne kevanji akejok lake kaiketa doverji, kejut-si Ne haivekji.”

⁷“Ahok kechini atum lapen Ne kethan alam nangning kechebi atum nelam arjutha. Monit atum nangpusit seta, lapen nangpinrem seta phereri.

⁸Latum ingki kecho ape ason avedetji! Bonta Ne kevan akejok ke kaiketa doverji, Ne kehai kaike ahutta doverji.

⁹Mek-prangnon, HEMPHU lapen nerapnon! Nangjakong chesekera nepajoknon. Hako ahut nang keklem ason klemnon, Nanghelo talo api Rahab aphan kangthan abang.

¹⁰Nangsi talo pakreng-lo lapen lang angbong tovar pinchong-lo, ansi nang kepajoktang atum damlong-lo.

¹¹Nang kepajoktang atum kechehok alun kelun lapen ning arong akehang pen Jerusalem le dampo. Latum kaiketa rengmeverpo, pima kaike aphan ningduk-ninglak pen joktang-lo.”

¹²HEMPHU pulo, “Nesi nangphan nangpangtang-lo, kopi athesi nang kevir amonit aphan phere nangjima, la bap-bi alonrekta ave kalima?

¹³Nangphan kepinchong abang HEMPHU sining-heihei kesang lapen pirthe aputah-heihei kepathir abangphan tengnetang-loma? Kopi athesi nang kaike nangphan kechenek-ot atum aphan nangphan kepavirji kechesik atum aphan pherejuma? Latum aningkethi nangphan thangnatta nang papho un-e.

¹⁴Kebengpon atum aphan lo dapprangpo, latum achethe dingpikji lapen latum kenangji an a-an longji.”

¹⁵“Ne ke HEMPHU nang Arnam, lang adihu padolo, lapen la arki padolo. Ne menke Jakongkethe a-HEMPHU!

¹⁶Sining-heihei Ne si sang-lo , lapen pirthe aputah-heihei pathirlo. Jerusalem aphan Ne pulo, ‘Nang nerat-lo! Nangphan Ne nangthanlo lapen nangphan Ne ri pen nangvarlo.’ ”

¹⁷Jerusalem mekprangnon! Chetevarra nangmethang thurnon! HEMPHU aningkethi pen nangpajuntoilo, aduk nang juntang-lo, nang la junlapsi lapen la nangphan pakrep-ring-lo.

¹⁸Nangtum aphan keja abang baduta ave. Nang rat angbong baduta nangtum aphan ari pen nangrire.

¹⁹Nangphuthak phanni akevir nangklotang-lo: ron pen ajok nanglongle samphridang-lo, lapen nangrat ingchirlo. Nangphan baduta kangjinso kepaklang abang avelo.

²⁰Tovarpi ano alongtin nangrat ke-aini pen krep-lo: Latum pham kechedan athijokpi asonsi latum HEMPHU aningkethi ajakong chomat-long-lo.

²¹Nang kesung kepho Jerusalem arat nangtum kangri kekrep-ring ason,

²²Nang Arnam HEMPHU nangrailo, lapen pulo, “Neningkethi pen nangkepi aharlung cheponthudet-lo, karjap kethirthetoi adrakha ahorlang nangtum jun nangnelo.

²³Nangphan kechenek atum aphan tovar-heihei along, nangpaklichei lapen longle aduk asonsi nangtum aphan, bang atum nang patekungpo.”