Read Karbi ISAIAH 53 Bible Online

ISAIAH 53 - Karbi bible

ISAIAH 53

¹Rat-atum thak-lo, “Netum non kethan alam komatsi kroipo? La HEMPHU akamlo pu komatsi thek-longpo?

²HEMPHU aban thengpi arongle kekrengtai ajo angkur chesak pen kethe ason la alangli aninghang-lo. Alangliphan kar-i meme mate eli kelangphrongji kelangmeme arje ave lo. Alangliphan kelangmeme ason thangnat ta ave, eli alanglinat kevungtoi ason thang ta ave.

³Alangliphan eli hijimlo, lapen dunde det lo. Kesung lapen keso alangli chechak nang-lo. Baduta alangliphan lang abang ave- alangli thangnat ta kalidet asonsi eli alangliphan lakhakhe det lo.

⁴‘Bonta eli kechechak nangji akesung alangli chechakding-lo, eli kechechak nangji akeso. Alangli kesungnang ke Arnamsi aduk-kepilo pusi eli mathabom.

⁵Bonta eli pap-heihei apot alangli avi-aphik donang-lo, eli keklem kehingno pen apotsi alangli areng sonang-lo. Aduk-kepi alangli kechechaknang pen apot eli keso metang-lo, alangli rengkesonang pen ajok eli pran methudet lo.

⁶Eli kedo-an biresak asonsi ingbotang-lo, abangphutin ta amethang atovarsi chesuirep lo. Bonta HEMPHU si alangli phuthak aduk-kephonangji aduk.

⁷Alangliphan chenek-ot lo, bonta la chepabihek pen chechak lo; alangli lam ethe ta ningjeje det lo. Biresak aso aphan la kethuji kepon ason, biresak aphan angmi kangtipji ason, alangli lam ethe ta ningjeje.

⁸Alangliphan nep chek-lo lapen kepathijisi hukum pi pen ponlo lapen baduta alangli kopai alam mathadunde pin. Etum arat apap apotsi alangliphan pathilot lo.

⁹Kehingno amonit atum penpen alangliphan thiri along bilo, keplang amonit penpen alangliphan pip lo, alangli kehingno klemklepin mate pachereirepin seta.’”

¹⁰HEMPHU pulo, “Kesung kephonangji lake neningkehang lo; kethi ke diya kevanji aphan isi athok lo. La apotsi la aso-asu chethek longpo; la achethe ding-o ji, lapen alangli pen ajok ne kemang akam pachunpo.

¹¹Akai isi kesung chechak det aphi la aning-arong chelongthuji la kesung kechechaknang ale avedetji pupe pu la chinipo. Nekangduknei aban, la aphansi nening chedoknei lo, ongdung atum aduk alangli chechakji lapen alangli pen apot halatum aphan ne diya po.

¹²La apotsi la aphan man kedo kangtang lapen kengsak amonit atum angbong anghoi ne pipo. Alangli aningkehang pen apran chepi det lo lapen kehingno amonit atum penpen lakha det lo. Ongdung amonit atum apap inghor lo lapen latum diya kehangjisi ardom pilo.”