Read Karbi ISAIAH 54 Bible Online

ISAIAH 54 - Karbi bible

ISAIAH 54

¹Jerusalem, nangke aso-kave a-arloso asonlo, bonta non nang lun unlo, lapen ning-arong ase pathe-unlo. Non ke nang ke-o-e pin a-arloso ansose nangsomar ongmuchot po!

²Nangpehem angkang pathenon; la ari-heihei pading muchot non, lapen kurdang-heihei sakpathir non!

³Atok-anotin anat ta nang ahoi-heihei parpo; kaprek adet atum non kechevoi alongle, nangrat aso atum chelongthupo. Kangsamri arongsopi monitsi plengset po.

⁴Phereri nangphan pinrem thuthe det po; nangphan patherak-re det po. Penan kedocheng ahut asonsi, nang kekroithekthe an lapen hemepi ason nangchor-nang-lok kave nang tengne-et po.

⁵Nangphan kepinchong abang nangpenan ason plangpo, Jakongkethe HEMPHU helo alangli men. Israel a-Arnam Kangthirsi nangphan pajok po, alangli ke pirthe adang kepangri abang.

⁶Israel, nangke penan kedomi apiso ason lo, apenan ke-otang lapen ningke-oi abang. Bonta alangli HEMPHU nangphan hangthulo lapen pulo;

⁷“Malomso aphansi ne nang-o lo; inghonpik pensi nangponthupo.

⁸Ne malomso aphansi ne ningthichot, bonta nangphan ne kaike aphan kanghon paklangverpo.” Lasonsi nangpajok abang HEMPHU pulo.

⁹“Noah amen pen ne semetang-lo pirthe puthot langthepi kepavangve detji aphan. Non, ne nangphan ningthithe detjisi semetang-lo; ne nang ingchekchelo, mate aduk nangpipe lo.

¹⁰Inglongpi lapen inglongso-heihei chinghang tahai, bonta ne kanghon nangphan kaiketa jutje lo; ne ningkangsam aseme phriphrelo.” Nangphan kechinghon a-Hemphu-si lason pulo.

¹¹HEMPHU pulo, “O Jerusalem nang kesung kepho abang, ning chethe athai avepin arongsopi, nangphan ningpangsam abang baduta ave, nangputah-heihei adorkeso a-arlong-heihei pen ne kimthuji.

¹²Nanghem chardon-heihei, ne rubi arlong abor-heihei pen kimthupo, nang inghap-heihei arni abor-heihei pen lapen paisong komchen dorson-heihei pen alon pipo.”

¹³“Nangmethangsi nangrat aso aphan thanpo, lapen halatum aphan kechingthur lapen ningkangsam pipo.

¹⁴Ahok akangsai lapen akeme akam nangphan pangtangpo. Nang kechenek lapen kepherememe pen jokpo.

¹⁵Nangphan bang tengkheng-lote, la nephan arjuje pensi klemlo, nangpen kechedan abang aling krepji.”

¹⁶“Hemai kanghor aphan nesi thip-lo, la methorsi risim-heihei selamlo. Ron-aso aphan ta nesi thip lo, kepathiji risim kerim abang.

¹⁷Bonta nangphan badu arisimta nangphangno un-e lo; nangphan nangkebok atum an aphan nang kethakji ason doji. Neban atum aphan ne raipo lapen halatum aphan pahaiji,” pu HEMPHU ningje lo.