Read Karbi ISAIAH 55 Bible Online

ISAIAH 55 - Karbi bible

ISAIAH 55

¹HEMPHU pulo, “Vangnon, kangit atum an dak lang dolo! Nangtum tangka kave atum an, vangnon nangtum vang-ra chonon! Vangnon! Drakha-ahorlang lapen chulang chonam non. La nangphan anam nang en-e det po!

²Nang ningchepajang longle amar aputhak kopisi nang tangka pakon nangpo? Nang kam keklem atangka chepakon pen pisi kangchir donangpo? Nelam arjunon lapen ne kepu aling klem non, lapen nang kemenei a-an chosi ning chepajang longji.

³Ne rat-atum, non nelam arjunon lapen nelong vangnon; nelong vangnon, lapen nangchethe longji! Nangtum pen ne kedover akechejok aloh pathikpo, lapen David aphan kechak ahirjume ne nangpipo.

⁴Alangliphan ne jalin, lapen det-heihei hukum kepi abang paplangji, alangli pen ajok ne halatum aphan nejakong paklangpo.

⁵Non nangtum bidet asor aphan hangpo; ehut isi latum nangtum aphan nangchinine, bonta latum nangtum pen kejelangjisi katsi vangpo! Ne, nang Arnam HEMPHU, Israel Arnam Kangthirsi la paplangpo; nangtum aphan man lapen anong ne nangpiji.”

⁶HEMPHU anat pangnora, alangliphan ardom non, non alangli ketebok-het ako.

⁷Kehingno abang halatum, akehingno akai atovar pache-o nang lapen halatum akematha pachelarnang. Latum HEMPHU, netum Arnam anat pavang nang; alangli kangjinso pen plengset lapen kediya prappik.

⁸“Ne kematha ke nangtum ason kali lapen ne tovar ke nangtum ason kali” pusi HEMPHU pulo.

⁹Sining-heihei kangtui pirthe athak pen kangtui-o asonsi ne tovar-heihei lapen ne kematha-heihei ta ingtuiving.

¹⁰“Nelam ke ar-e kelok lapen arve ason la sining pen nangklosi pirthe lang pachampo. Lahei sok arong pavang lapen ke-eji aphan chili lapen an kechoji aphan him pipo.

¹¹Lasonthotsi ne keningje alam plangpo ne kemang ason lapen ne la ketoi akam tangtetik an ne o-elo.”

¹²“Ning-arong pen nangtum Bebilon opo, ningingsamjin pen nangtum aphan, rongsopi pen nangpabar longpo. Inglongpi lapen inglongso-heihei lun kelun hangjo po. Lapen thengpi-thengphrang ta ning arongsi hangjopo.

¹³Saipras athengpi ingsu ajo adim arong vangpo; Myrtle arong-heihei bapsudo ajo vangpo. Lahelo kedoverji angthek lo, Ne, HEMPHU keklemtang alam pachemathathuji aphan.”