Read Karbi ISAIAH 57 Bible Online

ISAIAH 57 - Karbi bible

ISAIAH 57

¹Mesen arat atum thi-lo, lapen baduta kechiniji mate ke-oraji, ninghanghe. Bonta latum kethi ahut thangnat avur ta phangno un-e lo.

²Mesen pen akai chepajang atum ningkangsam long-lo lapen thisi sangjoilo.

³Nang papi atum, kangsai aphanle dak vangnon! Nangtum sanglang atum apar beisapo lapen beisapi atum apar langmeme.

⁴Nangtum komat aphansi kechongthuilo? Nang chobei atum komat aphansi nangtum kelangremlo?

⁵Nangtum keche-enthap akam nangmethang athengpi arum-heihei along keklem pen ajok kechan arnam-heihei aphan archolo. Longku lapen longdang ajo nangtum nangsomar aphan thulo.

⁶Hadak pen nangtum arlong kenai-heihei ponsi lahei arnam pusi ardomlo. Athok lo pusi nangtum hor-heihei lahei aputhak dung-lo lapen sok-sang athok-heihei ta pilo. Nangtum matha ma la pen ajok nening dok-o puma?

⁷Nangtum inglong kangtui-heihei along damra athok-heihei pidam non lapen hadak keche-enthap akam choklem damnon.

⁸Kehijim akumlin nang inghap arlo angden bilo. Nangtum ne-o tang-lo; nangtum pe-ri chephloksi hongplangthepi nang ningkedok a-arloso pen arludamlo bangpi aphan nangtum nangkepa-i dunji tangka pilo lapen hadak nang un an mek-langno ok-akam klem nangning chepajang-lo.

⁹Molek arnam aphan karcho damjisi jangthu nempru lapen jangthu chehi ponlo. Arnam-heihei aphan karchojisi, nang pherangke kehelo adim-heihei paridamlo, ha kethitang atum apirthe anta.

¹⁰Akaprek a-arnam aphan keriloksi nang chepachungkreng-lo, bonta nang kaita o-elang, nangmatha kehijimmeme nangkumlinsi nangphan jakong nangpipo, lapen nang aininelo pusi matha.

¹¹HEMPHU pulo, “La-heihei a-arnam komat-lo, nangtum aphan la an nang kepherejunang, la apotsi nephan nang pachobeilo lapen nephan tengnebub khangjang-lo? Ne kedojoi apot tong nangtum nephan man pipe det poma?

¹²Nangtum keklem aling chokpet lo pu matha ma, bonta nangtum a-ot an ne paklang dakji lapen nangtum akumlin nangrap dun thekthe lo.

¹³Nangtum kerap kechohang ahut, halahei akumlin le nangtum aphan nangpajok lonang! Halahei aphan tomon vangsi pangjar ponchorpo! Bonta nephan kechikilang atum det dolongji, lapen ne Kardomhemthepi arlo ne archoji.”

¹⁴HEMPHU pulo, “Nerat-aso atum nelong pachevoinang. Halatum atovar akhamkhe do-an pen tereknon! Tovar buinon, lapen la sik non!”

¹⁵Ne helo Kangtuinei lapen Kangthir Arnam, kaike kedover abang. Ne Kangtui lapen Kangthir adimsi kedo, bonta ne ke chepabihek lapen ningkecherui arat ajosi kedo, anke ne halatum aningkethi pathithupo.

¹⁶Nerat-aso aphan ne chethe pilo, lapen latum aphan ne dinvervelo mate kaike ningthiver-velo .

¹⁷Halatum apap-heihei lapen kecho kehung apotsi ne ningthilo, lapotsi ne aduk pilo lapen latum aphan o-bub lo. Bonta latum buikluihak lapen latum amethang atovarsi dam bomlang.

¹⁸Latum kosonsi keklem ma ne thek long-lo, bonta ne halatum aphan pameji. Ne latum aphan jaji lapen rapji, lapen ningduk atum aphan ne ningpapliji.

¹⁹Kadokave aphanta ningkangsam ne pilo, tebok lapen helo atum aphanta! Nerat aphan keso ne pameji.

²⁰Bonta kehingno amonit atum kesangse atalo ason, kaita adihu dojoije, kesa-ur ason lapen hi-phe vanlo.

²¹Papi atum aphan akejokvan ave pusi HEMPHU pulo.