Read Karbi ISAIAH 58 Bible Online

ISAIAH 58 - Karbi bible

ISAIAH 58

¹HEMPHU pulo, “Nangtum un an hangcharbu non! Nerat-aso Israel aphan halatum aphan than non!

²Latum nephan arnivang ta archobom, latum netovar-heihei lapen ne Aron-heihei kechiniji kekroiji aninghang pusi chepu. Latum pulo latum nephan ason-heihei papiji lapen latum aning hang-an pen nekarchojisi aning-chepajangji aninghang-lo.”

³Rat-atum arjulo, “Etum aphan HEMPHU elongle te kopisi eli an kehumji nangjima? Alangli jongsi e-arjujete kopisi an kechoche pin pen eli donangjima?” Halatum aphan HEMPHU pulo, “Ahok alam ke lahelo nangtum an-kehum ahut nangtum methang ale aphansi klemchot lapen nangkam keklem atum aphan chenekbom.

⁴Nangtum a-an kehumsi nangtum aphan pathurkhrap-lo, lapen nangtum chebohong-lo, chedanlo. Lason a-an kehum tong nangtum akardom ne arjuji putong kemathama?

⁵Nangtum an kehum ahut nangtum methang aduk chinghoi lo; bap kedom asonsi nangtum aphu patongki lo, lapen pe thoila che-umsi thek-lo ta enlo kebebeji aphan. La tong nangtum an kehum lo pu kepuma? La hei pen tong ne ningdok-o pu matha ma?”

⁶Neningkehang a-an kehum ke lahelo; kechenek angchin ari phrinon lapen ahok-akangsaise anghor phlok non, lapen kechenek kepho abang pajok non.

⁷Nang an kangchir atum pen chethak non, lapen hemkave keduk aphan nanghem ingpunon. Kechingthangji kavepin atum aphan pe-ri pinon, lapen nangdon aphan kerapji aphan monangne.

⁸Adap arni kevang asonsi nangtum aputhak ne ningkehang atur the-angpo, lapen nangreng amek medapprang po. Nangtum aphan kepajokjisi ne kaike nangtum along doverji; ahuttinta nangphan nedak-netur pen neraipo.

⁹Nangtum ardomlote, Ne nangthak po. Nangtum nephan Nehang ahut Ne nangthak po. Nangtum jongsi kechenek akam pajut lote, kepinrem athetin, lapen kechejong-seroi lapen lamjuno athetin che-o lote; lapen

¹⁰nangtum kangchir atum aphan an pilote lapen kedorde-kephophe atum aphan kepi aningpangsam lote, nangdung-arei akungtin an anerlo chitim akethe-ang ason plangpo.

¹¹Nangphan ne kaiketa nangjapo lapen akeme ason pen nangphan nangpangkrangji. Nangphan ne pangtangrakji lapen nangbi pamesenji. Nangtum lang dorphlup kedo aberi ason plangpo, kekrenghak-he alang amek ason po.

¹²Aphrang kerutang nangrat atum kimthupo, aphrang aputah adim hem parjapthupo. Nangtum ke paisong-heihei kekimthumi arat, keru ahem-heihei keparjap arat-atum pusi chethangpo.

¹³HEMPHU pulo, “Kesang-arni nangtum do pangthir lote, lapen halaso arni nangtum nangmethang ale ri-re lote, ne kangthir-arni nangtum hok lote lapen kedam akam keklemkle, mate lam kejoi halaso arni ningjeje pin pen ajok man pilote,

¹⁴anke nangtum nephan kangduk pen kevang aning-arong longpo, pirthe adang an nangtum man nang papipet po lapen nangphusar Jakob aphan kepi alongle along nang do rengme longji.” Ne HEMPHU-si ningjelo.