Read Karbi ISAIAH 59 Bible Online

ISAIAH 59 - Karbi bible

ISAIAH 59

¹Nang kepajokji aphan HEMPHU ari thihek mate nang kerap kehang ase karjulongji aphan ano ingthong pik pu tong nang kematha ma!

²La ke nangtum apap-heihei apotsi alangli nang-arjuje det lo. La nangtum apap si Arnam lapen nangtum aphan karcho ahut thakdak lo.

³Nangtum kechobei, kephangno lapen pran karmut apot nangdai dolo.

⁴Kangsaihem nangtum damlo, bonta nangtum ahok akangsai longle. Nangtum lam kehaiji aphan kephangnojisi nangtum kam mang-lo.

⁵Nangtum kehingno akemang akamheihei ke ruiphe ati ason abi kedo, ati panghang lote pherui si nangbarpo!

⁶Bonta nangtum akemang nahokta lele- lahei jo-ir pen keselam ape asonpo!

⁷Nangtum kaita kehingnosi mangverlo, lapen la keklemji aphan nangtum asapta chonghong un-e. Adai kave amonit apran karmutji nangtum asapta chak-hik-he. Nangtum kedam aling parulo lapen pavirlo,

⁸lapen nangtum keklemji ahut baduta jokvanve. Nangtum keklem ason an ahok-hepin lo. Nangtum kekek atovarsi hung-lo, halaso atovar kedam aling abang jokvanve.

⁹Rat-atum, “Non netum chinilo, kopi athesi Arnam netum aphan kechenek atum arideng pen nepajokje det ma. Kedamji aphan netum kethe-ang ningthelo, bonta kangting saide,

¹⁰lapen netum mek-kave atum asonsi phereilo. Ajo kangting asonsi, kethitang atum apirthe kangtingkuk asonsi netum anerlo chittim seta patekung-lo.

¹¹Netum pherelo lapen ningduk lo. Kechenek atum lapen kechokche pen kejokjisi netum Arnam aphan cholangding-lo, bonta thangnat ta plangple det lo.”

¹²HEMPHU, netum ado nang ingno ongdung. Netum apapsi netum aphan nedin lo. Lahei netum chechini pame lo.

¹³Netum nangbe thurlo, nangphan obub-lo, lapen nangphi dun molo. Netum bang aphan chenek-lo lapen nang pen suilo. Netum akematha ahok-he saidelo; netum alam kechobei saidelo.

¹⁴Ahok-akangsai aphan phlungjui lo, lapen akechokpet adung vang un-e lo! Ahok alam rat-achetai along patekuk lo, lapen athikpet hadak adim longle det lo.

¹⁵Hadak lapu-an athikpet kave, kehingno akam keche-o aling, abang arideng kesung phonang lo. HEMPHU la thek long-lo, lapen ahok-akangsai avedet apotsi alangli aningdokde lo.

¹⁶Kechenek kepho atum aphan kerap abang avedet thek longsi alangli mong-loilo. La apotsi halatum aphan kepajokjisi lapen kechehaidetjisi alangli amethang ajakong chesikpo.

¹⁷Ron achoi asonsi ahok-akangsai alangli chingthangpo lapen phu-aden asonsi kepajok ajakong alangli chepindengpo. Kepamesenji lapen kesung arat aphan kechokche keklem aphuthak alar kehuijisi alangli aninghangpik chepindengpo.

¹⁸Halatum keklemtang ateng pen alangli ahotur-atum aphan aduk pipo, kehelo adet kedo aphan jokta.

¹⁹Nihang pen nichi abangphutin ta alangliphan lapen alangli thedung ajakong aphan phereripo. Alangli ke langroi alang ali ason, tomonpi asonsi vangpo.

²⁰Arat-aso aphan HEMPHU pulo, “Nangtum aphan keraijisi lapen nangpap-heihei pen kesui atum an aphan kepajokjisi ne Jerusalem vangpo.

²¹Lapen ne nangtum pen isi kechejok aloh chepathikpo: Nejakong lapen nekethe-ang-heihei nangtum kechibijisi ne nangtum aphan nangpitang-lo, lapen non pen apar nangtum nephansi nangkroi nangpo lapen kevangji arni anta nangso-nangsu atum nephan kekroiver thekjile than non.”