Read Karbi ISAIAH 60 Bible Online

ISAIAH 60 - Karbi bible

ISAIAH 60

¹Thurnon, Jerusalem, arni ason turnon. HEMPHU adak-atur nangputhak nangklotang-lo!

²Akaprek adet an aphan kangtingsi bin po, Bonta nangphuthak HEMPHU akethe-angsi tur po; Alangli kedo akeklar nanglong dopo.

³Nangkethe-ang anat det-heihei vangpet po, Lapen recho-atum nang arni kemi adap anat vangpetpo.

⁴Adung-arei chelangtha kopi plang-loma: Nangrat atum hem kechevangjisi chingrumpet lo! Nangsopo-atum kehelo adim pen vangpo; Osomar asonsi nangsopi-atum aphan vandetpo.

⁵Nang lathek longsi nangning-arong plengsetji; Nangtum ning-arongpiksi klemhurji. Det-heihei akhi nangtum along vanpet po; Talo parai pen halatum akhi-heihei vangpo.

⁶Thedung ka-ut ahemkonglong vangji, ha Midian lapen Ephah pen. Halatum Sheba pen vangsi ser lapen hijung vanpo. HEMPHU kopisi klemtang-loma rat-atum birta keme nangthanpo!

⁷Kedar lapen Nebaioth abiresak an nanglong athok aphan vanprepo lapen HEMPHU aphan aning-dokjisi dovan athak arklipo. Aphrang ansose HEMPHU a-Kardomhemthepi adak-atur pado po.

⁸Inghun ason vothung hem kechevoi kangjar ason kedamthu-un lahei atelongpi kopi?

⁹Lahei heloving adet pen kevang atelongpi lo, Arnam arat hem kevanlo. Latum along ser-rup, HEMPHU amen man kepijisi chevanlo, Israel a-Arnam Kangthir aphan, Alanglisi arat-aso aphan det kedo-an atum man papi lo.

¹⁰Jerusalem aphan HEMPHU pulo, “Nangpaisong bidet-aso atum kimthuji; Lapen halatum arecho nangphan ingdukji. Neningthisi ne nangphan aduk nangpilo, Bonta non ne nangphan nekanghon lapen kangjinso paklang-lo.

¹¹Ajo-anerlota nang inghap-heihei chingpuverpo, Anke det-heihei arecho-atum akhi nanglong vanpo.

¹²Bonta nangphan kangdukde arat ke virklungji.”

¹³“Thengjangthu athengpi, juniper, lapen Saipres athengpi, Lebanon angnam-heihei pen akemenei, athengpi vansi Jerusalem kimthuji. Ne Kardomhemthepi kepalangmeji aphan Ne rongsopi adak-atur kepadoji aphan vanpo.

¹⁴Nangphan kechenek asopomar atum vangji, lapen halatum nangphan man kepijisi angphun chingdipo. Ehut isi nangphan kelangselet abang nangkengri ardomkhrupji.” Nangphan halatum “HEMPHU Arongsopi”, “Zaion Israel a-Arnam Kangthir Arongsopi”, pusi hangpo.

¹⁵“Nangphan nang-o-elo lapen hijimjelo, Isi kangsamri lapen samphridang arongsopi. Nangphan ne pathepo lapen palangmepo, kaike isi ning-arongver adim.

¹⁶Det-heihei lapen recho-atum nangphan lana po aso aphan apei kechelana ason. Ne, HEMPHU-si nangphan pajok-lo pu nang chechini po, Israel a-Arnam Jakongkethe abangsi nangpajok phlot lo.”

¹⁷“Tam alar ser ne nangvan piji, ingchin lapen thengpi alar rup lapen tam lapen arlong alar ingchin nang vanpiji. Nang kepangri abang nangphan kaita chenek nelo; Ne halatum aphan ahok-akangsai, lapen ningkangsam pensi papangritoipo.

¹⁸Kephangno kehangjo arki arjulongle det po; Kevir nangdet puthot thakthe lo. Paisong asonsi ne nangphan raipo lapen nangchedanpipo; Ne nangpajok apot nang nerovekji.”

¹⁹“Anerlo arni kethe-ang mate ajo chiklo atur nangphan akethe-ang kalidetpo; Ne, HEMPHU-si kaike aphan nangkethe-ang plangpo. Ne dak-atur si nangputhak-

²⁰Nang ningduk arni jutkok po. Ne, HEMPHU-si nang kethe-ang manpo. Chiklo-arni apar adin kedo.

²¹Kopima akemesi nangrat-atum an klempo, lapen longle kaike aphan chepahemphu longpo. Latum aphan nesi elo nesi latum aphan pinchong-lo, Ne kadokave aphan kethedung kepaklangji aphan lo.

²²Nanghemtunheihei angbong kebinei lapen kechepabinei abang seta jakongthepik adet plangpo. Apor nangchok-lote, la ne paplang dapprangpo, Ne HEMPHU lo!”