Read Karbi ISAIAH 63 Bible Online

ISAIAH 63 - Karbi bible

ISAIAH 63

¹Edom adet Bozrah arongsopi pen la komatsi kevang-lo? Komatsi la-an keprung-ang ape chingthangsi kangtang kangsak pen kedamlo ? La HEMPHU lo, kepajok ajakong do, Alangli kehai pachethangjisi vang-lo.

²Alangli kopi athesi la an keprung-ang ape chingthang-lo, drakha kesi abang ason?

³HEMPHU thak-lo, “Det-heihei aphan nesi drakha kesi ason si lo, lapen baduta nephan nangrap dunde. Neningthisi ne halatum aphan dongrui lo, lapen halatum avi ape-ari nangro-ang lo.

⁴Nerat-aso aphan kepajok apor nangle tang-lo pu ne matha lo; halatum ahotur aphan aduk-kepiji apor nangle lo.

⁵Nephan baduta nangrap dun abang ave thek longsi ne mong-loi lo. Bonta neningkethi nephan pangtang-lo, lapen nemethangsi kechedan hailo.

⁶Neningthisi ne det-heihei aphan donglam lo lapen dongpet-pet lo. Halatum achethe avi longle athak ne dung lo.”

⁷HEMPHU chemitme akanghon alam thanpo; Ephan alangli lapu-an keklem apot alangliphan ne rolo. Israel arat aphan alangli un-an pahirmelo, pima alangli kangjinso lapen kanghon apot.

⁸HEMPHU pulo, “Latum nerat-aso lo, latum nephan pachobeibe lo.” Lasi alangli halatum aphan pajok lo,

⁹latum akesung an pen. La pherangke kali, bonta HEMPHU amethangsi latum aphan pajok lo. Alangli kanghon lapen kangjinsosi halatum aphan alangli pajok-lo. Hako pen ta latum aphan alangli kaita ora lo,

¹⁰bonta latum Alangli Karjong Kangthir aphan aning pa-oi lo. Lasi HEMPHU ke halatum ahotur plang-lo lapen halatum abe thursi chedanlo.

¹¹Bonta latum aphrang alam chema-thalo, HEMPHU aban Moses arni, lapen latum charjulo, “Non HEMPHU konat-lo, talo pen arat ajalin atum aphan kepajok abang? Moses aphan akarjong kepi a-HEMPHU konat lo?

¹²Moses pen ajok ajakong pen thedung akam keklem a-HEMPHU konat lo, talo alang phlaksi arat-aso aphan lang karnuk angbong kejapon abang, amethang aphan kaike anong kepadoverji aphan?”

¹³HEMPHU pen jalote, latum ingnam alosei ason dongthip, patekungke.

¹⁴Chainong aphan aho-or kedo arlok anat kejapon ason thakthak, lasonsi arat-aso aphan HEMPHU pasanglong-lo. Alangli arat aphan jalo lapen amen aputhak anong chevan lo.

¹⁵HEMPHU, sining angsong pen netum aphan nelangtha, nangkedo Kangthir lapen adak-atur adim pen. Netum aphan nang akematha konat lo? Nang kanghon lapen akangjinso konat? Netum aphan nelangmo ri.

¹⁶Nangke netum a-Polo. Netum aphusar Abraham, Jakob atum netum aphan nelangle, bonta nang HEMPHU, ke netum a-Polo, nang helo netum aphan kepajokver a-Bang-lo.

¹⁷Nangtovar pen pisi netum aphan nang pasuilong loma? Kopisi netum aphan la an ningpangtangsi nangpen pasuilong loma? Vangthunon, nangphan nangkangduk atum pen apot, nangrat nangso pen apot, vangnon.

¹⁸Netum nangrat Kangthir lo, ma-lomso aphan hotur atum netum aphan nephlungjui lo. Latum nanghem-Kangthir dongphangno lo.

¹⁹Nang netum kepangri abang kalidet ason-thot lapen netum nangrat-aso kalidet asonthot si nang netum aphan chekamlo.