Read Karbi ISAIAH 65 Bible Online

ISAIAH 65 - Karbi bible

ISAIAH 65

¹HEMPHU pulo, “Nerat-aso atum a-Kardom kethakjisi ne chesikding lo, bonta latum ardomde det ke. Halatum nephan kelangjisi Ne chesikding-lo, bonta latum bor-i-e det ke. Ne kethakji chesik seta adet pen nephan ardom de det ke”, “Ne ladak dolo; Ne nangtum aphan nangrap po.”

²Aningkangtang pen kechokche akam keklem lapen amethang atovar kedam nerat aphan ne kedengji kaike chesikding-lo.

³Latum therak-repin pen nening papung bomlo. Latum karchotap adim athok pilo ha kangthir aberi arlo-heihei lapen karchotap adovan-heihei athak hijung thorlo.

⁴Ajo latum longku lapen thiri-heihei along damsi kethitang akarjong pen chingki damlo. Latum phak-a-ok cholo lapen karchotap athok-heihei a-ok alang junlo.

⁵Lapen latum bang aphan pulo, “Netum pen pahelo non; netum ingthirpik, nang paphori!” Lason arat nelang un-e nening kethi kechemitme ame asonsi latum aphan chopo.

⁶Ne halatum aphan aduk-kepiji chesik et-lo lapen halatum aphan loh tok-det lo. Halatum kopima keklemtang ne langkrang un-e, bonta ne alar latum aphan huivekji,

⁷pima halatum apap-heihei lapen halatum aphusar atum apap-heihei pen ajok. Latum karchotap anglong-heihei adim hijung thorlo lapen nephan lamjuno ningjelo. La apotsi latum aphrang akam-heihei apot kephonangji avi asonsi ne latum aphan aduk-pivekji.

⁸HEMPHU pulo, “Baduta kemesen adrakha pavirve; bonta latum lahei pen ahor selamji. Ne ta nerat kedo-an aphan pavir-et-e nephan nekangduk abangphan ne pajokji.

⁹Ne Judah akhei angbong kedo a-Israel aso aphan pahirmeji lapen latum asumar-atum inglongpi-heihei alongle chepa-hemphuji. Ne kangvaitang nerat-atum, nekangduk atum an hadak dolongji.

¹⁰Latum nephan archoji lapen nichi ahin Sharon athoi lapen nihang ahin kesung Arlok alang halatum abiresak lapen achainong-heihei japonsi pachopan damji.”

¹¹Bonta nephan ke-o-atum an aphan ke prekvi po, Zaion, ne inglong Kangthir aphan ketengne abang lapen Gad lapen Mene, Alekha lapen Abaha arnam-heihei aphan karcho atum an.

¹²Kesungpik pen kethinangke nangkopai lo, pima ne nangkehang ahut mate keningje ahut nangtum nangthakthe mate arjuje. Nangtum kekroikrejisi chongvailo lapen kehingnosi klemlo.

¹³La apotsi ne nangthan lo, nephan karcho lapen kekroi abang dorphlup cho lapen jun longji, bonta nangtum ingchirji lapen ingitji. Halatum aning-arong po, bonta nangtum theraknangpo.

¹⁴Halatum aning-arongsi lun-lunpo, bonta nangtum ke nangning ingjirsi chirupo.

¹⁵Ne kangvaitang arat-atum nangtum aphan hirjuno amen pusi hangpo. Ne Muluk-a HEMPHU-si nangtum aphan pathipo. Bonta nephan kekroi atum aphan ne amen kemi hangpo.

¹⁶Det adang hirjume kechohang abang aling kekroithirklong Arnam pensi hirjume chohang po. Kedamtang akesung-heihei damjui po lapen tengne det po.

¹⁷HEMPHU pulo, “Ne pirthe kemi lapen siningkemi-heihei pinchongbomlo. Aphrang kedamtang alam-heihei an tengne-et po.

¹⁸Ne kepinchong along kaike chehok non lapen ning cheparong non. Ne kepinchongji Jerusalem kemi ke ning-arong plengsetji, lapen bangpi arat atum rengdok-rengniji.

¹⁹Jerusalem lapen bangpi arat ajok ne methang amat ta ning-arong plengsetji. Kechini pavedetji, kerap kehang avedetji.

²⁰Oso thi-i ahut osomar atum thithe detji, lapen monit atum an akai jang pameji. Ningkan pharo kechok abang phan risolang pusi pupo. Laso aphrang kethitang pulote nesi halabangso aphan aduk kepilo.

²¹Rat-atum hem-heihei kimpo, lapen halahei along amethangsi dopo hala anut kaprek dode lo.

²²Latum drakharikang epo, lapen ahorlang junlongpo-la anut kaprek jun pipe detpo. Thengpi ason nerat achethe dingpo. Latum keklem athe checholong pamepo.

²³Latum keklem akam an chunpo, lapen halatum asomar kevir chetong nangnelo. Kevangji arni anta latum aphan lapen latum asumar aphan ne pahirjumepo.

²⁴Latum nephan kardom jutje ako, halatum akardom-heihei ne thakpo.

²⁵Mahar lapen biresak-aloso chorappet po; chainong asonsi hingho atum ta sokpun chopo, lapen pherui-heihei pherememe api kalidetpo. Zaion ne inglong kangni athak hadak kephangno amar mate kehingno amar avedet po.”