Read Karbi ISAIAH 66 Bible Online

ISAIAH 66 - Karbi bible

ISAIAH 66

¹HEMPHU pulo, “Sining ke ne inghoi lo, lapen pirthe ke nekeng kebat-anghoilo. Koson ahemsi nangtum nekimpi unjima, ne kedo adim koson poma?

²Sining pirthe nesi pinchong-lo! Kechepabihek lapen nephan phere pen kekroira ning kecherui abangphan nening dok-o.”

³Rat-atum halatum aninghang alingsi klemlo. Latum athok ajir aphan chainong alole thu seta mate monit-le thu seta isinat lo; latum biresak alo thu seta mate methan angphun ing-lokbub seta; Sok-sang athok latum pi seta mate phak-avi athok pi seta; hijung adan latum pi seta mate kumlin aphan ardom seta isinat lo. Latum kehijimmeme akarchosi aning cheparong lo.

⁴La apotsi Ne latum aphuthak akevir vanpo, latum kepherenei ason-pima Ne kehang ahut baduta nangthakthe det-lo mate Ne keningje ahut ano chedende det lo. Latum Nephan kekroikrejisi chongvailo lapen kehingnosi klemlo.

⁵HEMPHU kopisi keningje ma arjudun-tha, nang alangliphan kephere lapen kekroi atum an: “Pima nangtum nephan kekroithirklong lo, nangmethang arat ajehak atum nangphan hijimlo lapen nangpen thangnat akamta avedet lo. Latum nangphan ingnekchoilo lapen pulo, ‘HEMPHU ajakong chepaklang-ra nangphan nangpajoknang, anke nangning-arong netum nangthek longpo! Bonta halatum amethangsi therak nangpo!

⁶Arjutha! Hala rongsopi along kehorisei, hala Kardomhemthepi along arki, la ke ahotur atum aphan HEMPHU aduk-kepi arki lo!’ ”

⁷Ne rongsopi kangthir ke inut a-arloso duk nangnepin pen menmen oso mahang pathek-phlot ason.

⁸Lason mane thek-long loma mate arjulong-loma? Khei isi arnisi angbong mahang thek-loma? Khei mahang kethek aphrang Zaion kesung chechak-o nangnelo.

⁹Nerat-aso aphan mahang kethek an ne kevanji lapen mahang pathekthe detpo pu nangtum mathaji, “HEMPHU-si ningjelo.

¹⁰Jerusalem pen ningcheparongnon; bangpi pen apot chehoknon, nangtum laso arongsopi kechinghon atum an! Non bangpi pen chehok non, bangpi aphan ningkeduk atum an!

¹¹Bangpi kechingthur nang ingkranglimpo, osole apei amok kechu ketongphok ason.”

¹²HEMPHU pulo, “Ne nangphan ajir dingklui akechingthur nangvan pipo; Kaita kekrengkre alangroi alang keli ason det-heihei akhi nang nat vangtoi po. Nang ke oso aphanle apei lana si karbak lapen kanghon lason plangji.

¹³Aso aphan apei aningkepangsam asonsi Jerusalem along ne nangphan ningpangsampo.

¹⁴Nang la thek-long-lote, nangchehokpikji; la nangphan pangtangpo lapen ok-pamepo. Anke nephan kekroi abangphan lapen nehotur aphan neningkethi paklang-lo pu nang chini po.”

¹⁵Me pen HEMPHU vangpo. Alangli ningkethi atum aphan aduk-kepijisi alangli tomonthepi arveng-heihei athak ardonpo.

¹⁶Me pen lapen nokjir pen pirthe adang kedo-an ado kedo arat aphan alangli aduk pipo, lapen ongdung atum aphan pathi po.

¹⁷HEMPHU pulo, “Karchotap aphan kechepangthir atum, beri kangthir anat kejangtoi atum, lapen phak-a-ok lapen phiju a-ok lapen akaprek kehijimmeme a-an kecho atum akejut tebok-het lo.

¹⁸Halatum akematha lapen akam-heihei ne chini . Det-heihei arat kepangrumjisi ne vangji . Halatum vang-rappet ahut, nejakong kopi klem un ma latum thek-longpo,

¹⁹lapen Nesi halatum aphan aduk-kepi abang lo pu chini po.” Bonta ajehak aphan Ne pareng-longji lapen det-heihei anat toisi lapen nenong mate ne kethe lapen nejakong kethek-longle pin kehelo adet: Spein anat, Libia anat, lapen Lydia anat la thai ke-apthek amonit pen pen, lapen Tubal lapen Grik anat toiji. Lahei det angbong latum Ne kethe alam pachethangpo.

²⁰Nephan dan asonsi latum det-heihei pen nang korte atum aphan vanthupo. Latum Ne inglong kangthir Jerusalem along halatum aphan losei athak, gadha athak lapen ka-ut-heihei athak, ronhemkonglong-heihei athak lapen hemkonglong-heihei athak, Israel aso le kangthir aton pen sok-sang adan-heihei Kardomhemthepi along kevan ason vanpo.

²¹Latum aphan ajehak Ne kurusar lapen Levi pinchongpo.

²²Pirthekemi lapen sining-heihei kemi ajakong pen kedover asonthotsi nangso-nangsu lapen nangmen doverpo.

²³Chiklo-kemi Arong-aje tin, lapen kesang-arnivang ladak Jerusalem along nephan karchojisi det arat tin vangpo, pusi HEMPHU pulo.

²⁴“Halatum ke-o-tekang amat nebe kethur an kethi abang arpum-heihei latum thek-longpo. Latum aphan kecho angthan-heihei kaita thithelo lapen latum aphan kecho ame kaita mep-melo. Latum aphan kethek-long pen monit akhei kedo-an hijim rip po.”