Read Karbi ISAIAH 7 Bible Online

ISAIAH 7 - Karbi bible

ISAIAH 7

¹Jotham asopo lapen Uzziah asupo Ahaz recho Judah kepangri ahut, ron thurlo. Siria arecho Rezin lapen Remaliah asopo Pekah, Israel arecho atum Jerusalem tengkheng-lo, bonta cheraidet un-e det-lo.

²Siria aron-aso atum Israel arlo nangle tang-lo pu Judah arecho birta arjulong det aphi, alangli lapen rat atum pherepik lo, lapen thengpi arong tomon kejap asonsi klemhur lo.

³Isaiah aphan HEMPHU pulo, “Nang-sopo Shear Jemhub aphan pon ra Ahaz recho along dam non. Alangli phan nang pe-ri keroi adim tovar akung, athak alangteng pen lang kevan-i langtuk ano along thek longji.

⁴Alangliphan kedo pacheretoi non, padojoi tu, lapen papheretap-ri mate aning pasiksak-ri. Siria Recho lapen aron-aso atum lapen Pekah Recho aningkethi ke beni athengchum amehi kepherememe alonrek ta ave.

⁵Siria lapen Israel arecho atum isi mang-lo.

⁶Latum Judah tengkhengjisi, rat-aso aphan papheresi alangtum abe kepadunpetji aninghang-lo, lapen Tabil asopo aphan recho anghoi along padopo.”

⁷Bonta, ne HEMPHU pachethang-lo lason kaita planglongle det po.

⁸Kopi apot lo? Pima Siria ke Damaskas apar ingtangmunak kali, la det arongsopi, lapen Damaskas ta Rezin Recho apar kangtangmunak lapu kali. Israel aphan ke ningkan throkkep-ra pho angbong la isi akhei pu reng cheterokji.

⁹Israel ke Samaria adet arongsopi apar ingtangmuchot kali, lapen Samaria ta Pekah Recho apar ingtangmuchot kali. Nang akekroi jongsi chepaningding un-e pulote nangta chepaningding un-e lo.

¹⁰Ahaz aphan HEMPHU akaprek abirta ta lolo:

¹¹“HEMPHU nang Arnam aphan isi angthek kepapiji le hangnon. La kethitang atum apirthe karnuk pen mate kangtui sining pen tame.”

¹²Ahaz thak-lo, “Neli angthek hanghelo. Neli HEMPHU aphan asat langle.”

¹³Laso aputhak Isaiah pulo, “Non arjutha, David Recho akhei, monit aphan kepaningri bihek alam mathasi neli Arnam aphan ta paningrijilangma?

¹⁴Mesen lo, HEMPHU amethangsi nangphan isi angthek nangpipo: Inut kangthir-et animsopi oso chopathepo lapen amen ‘Immanuel’ pu hangpo.

¹⁵Alangli arta dosi lam kepharthek ahut an rat-atum mok-lang lapen pijo alangsi chobomjilang.

¹⁶Halaso apor nanglele aphrang, hala nangphan kepaphere arecho banghini atum adet avedetji.”

¹⁷Nangphuthak, nangrat-aso aphu-thak, lapen recho ahemtun aphuthak Israel pen Judah kechekak arni pen kepho akesung an sose akesung HEMPHU vanpo alangli Assiria arecho vanpo.

¹⁸Halaso apor nangkele ahut, Ijip aso atum bitu ason Nil Aroi kehelo pen lapen pijo atum ason Assiria atum adet pen kevangji aphan HEMPHU isi angthek ason pasi-i vot po.

¹⁹Halatum thepai angbong arlok-heihei lapen longku-longdang ajo lapen kechopan ajo-heihei bonpak po.

²⁰Halaso apor nangkele ahut, inut chukangtip abang ha Euphratis parai-Assiria arechokethe aphan HEMPHU vangpo, lapen alangli nang ingmum lapen nangli phu an chu lapen nangli bang angmi soi et po.

²¹Halaso apor nangkele ahut, inut saiklembang chainong animso ejon lapen bi jonni pajokthek lote,

²²lahei mok-lang pipik si alangli akenang an dorphlup po. Kalang det kedo ahin kereng-long det atum mok-lang lapen pijo alang junlong ji.

²³Halaso apor nangkele ahut, kemenei adrakha aberi, erong-rong along butung suri anam rup dum suri isi kelong adim bapsudo lapen rikangsi jirhup po.

²⁴Hadak rat-atum thai lapen aso ponsi sikar damji. Kalang det adang bithe rikang lapen bapsudo si plengthup.

²⁵Sok keklem anglong-heihei along lapu-an ingsu arong kedo, hadak baduta dam haihe det lo. Lake chainong lapen biresak kechopan adim plangchot po.