Read Karbi ISAIAH 8 Bible Online

ISAIAH 8 - Karbi bible

ISAIAH 8

¹Neliphan HEMPHU pulo, “Ketok-i amar kethe ponra hadak amek kethe pen toknon: ‘Inghuponserak, Thiponserak.’

²Ningkechetheklong kurusar banghini Uriah lapen Jekariah, Jeberekiah asopo, pon ra isi ahaki pacheplangnon.”

³Penang an aphi nepiso oso chopathe po. Netum asopo mahang thek ahut, neliphan HEMPHU pulo, “Laphan ‘Inghuponserak-Thiponserak,’ pule amen irnon.

⁴Pima oso ‘pei’, ‘po’ pu hangthekthe ako Damaskas along kethi amar kedo-an lapen Samaria along kethipon amar kedo-an Assiria arecho vangsi pon pi et po.”

⁵Neliphan HEMPHU puthulo,

⁶Alangli pulo, “Pima Shiloah pen kelijoi alang laso arat-atum dengde det apot lapen Rizin Recho lapen Pekah Recho angno klemhur apot,

⁷Ne HEMPHU-si Assiria arechokethe lapen la aron-aso do-an vansi Judah patengkheng po. Latum Euphratis aroi alangthepi kora kedo-an kangbak asonsi vangpo.

⁸Latum langthepi kevang asonsi angsong aphang chirungpo lapen asontin ta dip-phlirpo.” Arnam elong dolo! Alangli kechepur arveng det raipo .

⁹Kephere pen, nangtum khei kedo-an chingrumnon! Pirthe kehelo adang an arju pet non. Kechedan jile chesik non, bonta pherehurnon! Ahok-lo, chesiknon, bonta phererinon!

¹⁰Nangtum mangnon! Bonta lahei kaita chunche. Nang ninghang-an chethan non! Bonta lahei kedo-an ale ave, pima Arnam netum along do.

¹¹Ajakongkethe pen rat atum kedam atovar dunri pusi neliphan HEMPHU pacheretoilo. Alangli pulo,

¹²“Rat-atum kemang akam along chelang dunri lapen latum kephere ason aputhak pheredunri.

¹³Chemathatha Ne Jakongkethe HEMPHU, ingthir-et; Nephansi nang pherechot nangji.

¹⁴Ne Kangthir-et apot rat aphan isi patekung a-arlong plang-lo; lapen Judah, Israel lapen Jerusalem arat aphan kenep-i aphan plang-lo.

¹⁵Ongdung atum patekungji, latum krep-po lapen sorlampo, latum isi apham along chedanchek po.”

¹⁶Nangtum, ne sangho atum, nephan Arnam kepi abirta aphan honnangji lapen langnangji.

¹⁷HEMPHU ke arat aso pen chepatu joi lo, bonta alangli phan ne chiki lo lapen alangliphansi ne ningchethelo.

¹⁸Ladak nephan HEMPHU nekepi a-osomar atum pensi do. Jakongkethe HEMPHU, alangli inghoi lake Zaion Anglong athak, alanglisi ephan Israel arat aphan kereng abirta epilo.

¹⁹Bonta nangtum aphan kepaludep atum pen, se kelang atum pen, kepasimu atum pen birta kepa-en dam jisi nangpuji. Latum pupo, “Jat seta kedo-an arat atum kerenglang arat aphan chamburuk akarjong aphan arju nangji.”

²⁰Halatum aphan nangtum thak dun nangpo, “HEMPHU nangtum aphan kopisi nangkethan jima lale arjudun non! Kepaludep atum alam arjuri latum nangkethan alam thang akeme ave .”

²¹Det adang rat-atum damtapji, ningbiji lapen ingchirji. Kangchir lapen aning jangje si latum arecho lapen a-Arnam aphan ington po. Latum inghun sining anat langtahai

²²mate longle athak lang-lor tahai bonta latum thangnat ta thek longle detji, bonta kesung lapen kangting, latum aphan kephlung pon kepherememe akangtingsi thek longpo. Latum aphan laso akesung pen kejokji atovar avelo.