Read Karbi ISAIAH 9 Bible Online

ISAIAH 9 - Karbi bible

ISAIAH 9

¹Zebulun lapen Naphtali akhei aphan alangli ephong patherak lo, bonta mononphi lahei adim anongtheji. Mediterran anihang anat pen ha Jordan parai ahin kaprek anat lapen ha Galili anat hadak bang adet aso atumsi dolo.

²Kangting ajo kedam arat atum thedung akethe-ang thek-long-lo. Latum isi abin adet si kedo, bonta non ke latum aphuthak arni turlo.

³Latum aphan nong kethenei-a ning-arong pilo, HEMPHU; latum aphan nang pachehok lo. Monit atum asok athe kerot kerim ahut ning arong ason mate kelongtang akhi kechethak ahut nang keklemtang apot latum aning arongparlo.

⁴Pima latum aphan nang kepi anghor arphang lapen latum aphang kelap-vor angchin ingdipi tang-lo. Ehut isi Midian atum aron-asong aphan nang keparem ason thak thak si nangrat aso aphan kechenek lapen ban kebi atum akhei aphan nang parem pi det lo.

⁵Ketengkheng aron-asong akeng-op-heihei lapen latum avi-aphik kero ape-ari me pen pavir-et po.

⁶Sopo inut ephan mahang thektang lo! Sopo inut ephan epitang-lo! Lapen la epangri abang-lo. Alangliphan “Manghumeme Thanpare Bang,” “Nokbe Arnam,” “Dover Apo,” “Ningkangsam Arecho,” pusi hangpo.

⁷Alangli recho ajakong kaike theponbom po; alangli det ningkangsam dover po; David aphi adular asonsi alangli pangripo, Akeme lapen ahok-akangsai aputhak paklangsi alangli jakong pathirpo, non pen ha kaike anta. Jakongkethe HEMPHU-si la kedo-an keklemji mathathip-lo.

⁸Israel adet Jakob asomar aputhak HEMPHU kangsaiji alam pulorlo.

⁹Israel arat kedo-an, Samaria arongsopi kedo an atum chinipo la alanglisi klem lo. Non latum anethepik lapen cheparoka-o.

¹⁰Latum pulo, “Ita ahem ru tang-lo, bonta netum arlong pen laso adim hemkimdetji. Ingle arong pitang-lo, bonta lahei adim netum kedar athengpi kemenei biji.”

¹¹Latum aphan ketengkhengjisi latum ahotur aphan HEMPHU aning parung-lo.

¹²Israel aphan kejoilutjisi nihang anat Siria lapen nijang anat Philistia atum angho ingko phrang-lo. Seta HEMPHU aningkethi hamhelang, aduk kepijisi alangli ri chejar ding-lo.

¹³Israel amonit atum aning cherui-relang; latum aphan HEMPHU aduk pilo seta alangli anat latum cheruirelang.

¹⁴Arnisi angbong Israel ajalin lapen la arat aphan HEMPHU adukpiji; Alangli latum aphan aphu lapen arme ingthan et po.

¹⁵Arlengkesar lapen aman kedo atum ke aphu lo, lapen kechobei amontri atum ke arme lo!

¹⁶Latum aphan keja abang chodet lo lapen latum aphan pamanghulo.

¹⁷La apot inutbak ariso aphanta HEMPHU pajokje lo, lapen heme-jangreng aphan ta kangjinso paklang-lo, pima kedo-an amonit ta Arnamkave lapen kehingno saide lo, lapen latum keningje an alam lamjuno saide lo. Seta HEMPHU aningkethi hamhejilang, bonta alangli aduk kepijisi ari chejarding lo.

¹⁸Rat-atum kehingno-ong bapsudo lapen bap anta kepavir anorde ason la mechosi angsong an mehi pasumonpo.

¹⁹Jakongkethe HEMPHU aningkethi apotsi alangli aduk kepi me ason det adang karsi rat pavirlo, lapen lake abangphutin ta amonit amethang apot lo.

²⁰Det alongtin monit atum chethisei lo, lapen kopi ma latum kelong, la cholo, bonta latum akangchir kaita hamhe. Latum amethang asomar anta checho lo!

²¹Manasseh lapen Ephraim arat atum chetengkheng seroi lo. Lapen chingrumpetsi Judah latum tengkheng. Seta HEMPHU aningkethi hamhelang, bonta aduk kepijisi ari chejardinglang.