Read Karbi LEVI 10 Bible Online

LEVI 10 - Karbi bible

LEVI 10

¹Aaron asopo Nadab lapen Abihu, latum abangphutin ta methek aharlung cheponrep-lo, la arlo me akri bilo, methekta bidunsi HEMPHU aphan pidamlo. Bonta laso ame ke kangthir-et kali, pima latum aphan HEMPHU pinon pu hukum pipe.

²HEMPHU menmen amat me nangtoi lo, lapen latum aphan hadak HEMPHU angno amat me chodetsi pathilot lo.

³Anke Aaron aphan Moses pulo, “HEMPHU kepu ahut lasonsi pulo, ‘Kadokave Nephan kangduk atum an Ne kangthir-et aphan aman pi nangji; nerat atum aphan Nedak-Netur Ne chepaklangji.’” Bonta Aaron ke dojoilo.

⁴Aaron apunu, Uzziel asopomar Mishael lapen Elzaphan aphan Moses hang-lo, lapen latum aphan pulo, “Ladak vang-ra nang-ik asomar atum aphan Pehem kangthir pen ponnon, lapen latum aphan mukam angtan bidam non.”

⁵Ansi latum vang-lo, lapen kethi arpum ape otsi latum aphan mukam angtan pon-lo, latum aphan Moses hukum kepi ateng-lo.

⁶Anke Aaron lapen asopomar Eleazar lapen Ithamar aphan Moses pulo, “Nangtum achu chingsoksedet-ri mate ningke-oi kechepaklangji pura nangchoi chingsek-ri. Nangtum jongsi klemlote nangtum thiji, lapen rat kedo-an aphuthak HEMPHU aningthihakpo. Bonta nangtum chepho-chero adon arap atum HEMPHU me nangketoi pen laso kethinang apot Israel atum an chirulong.

⁷Pehem ajakan o-ri, kalite nangtum thinangji, pima nangtum aphan HEMPHU kepatip ajangthu pen nangpangthirtang-lo.” Lasi latum Moses kepu ateng klemlo.

⁸Aaron aphan HEMPHU pulo,

⁹“Nang lapen nang sopo atum drakha ahorlang jundet aphi ne kedo A-pehem arlo lut-rinon; nangtum klemlote nangtum thiji. Lake nangso-nangsu atum anta kekroiver nangji aronlo.

¹⁰Nangtum Arnam amar kopima lapen kepanongne amar kopima, lapen aron atengpen kopisi kangthir lapen kangthirthema pharthek nangji.

¹¹Moses pen ajok nangtum aphan ne nangkepi aron-heihei an Israel arat atum aphan nangtum than-pachinivek nangji.”

¹²Aaron lapen kedolang asopo banghini Eleazar lapen Ithamar aphan Moses pulo, “HEMPHU aphan kecho amar kepi ahin pen sok-sang adan ponnon, la pen thap kave ahim selamnon, lapen dovan akungle chonon, pima laso athok ke ingthirpik.

¹³La kangthir adimle chonon; HEMPHU aphan kecho amar athok angbongpen la nang lapen nangsomar atum apharmanlo. Lahelo HEMPHU nephan kepi ahukumlo.

¹⁴Bonta nang lapen nanghemtun-heihei atum kepanong adan lapen HEMPHU aphan kechirung adan kepi kurusar atum apharman adan aningthang lapen aber akeng chotame. Nangtum la aron pen kepangthirtang adimle chonon. Israel arat pen kepajir kejelang athok pen laso adan-heihei ke nang lapen nangsomar atum aphansi apharman nangkepilo.

¹⁵Latum aber akeng lapen aningthang HEMPHU aphan kecho amar athok athu kepi ahut van-nangpo. HEMPHU hukum kepi ateng lahei athan ke nang lapen nangsomar atum aphan kaike aphan apharmanlo.”

¹⁶Pap athok aphan kepiji abi alam Moses arjulo, lapen la phrin tang-lo pu chinilo. Lasi Eleazar lapen Ithamar atum akam alangliphan aning pathilo, lapen alangli hang-lo,

¹⁷“Kopi apotsi nangtum pap athok kangthir-et adim chochedet-loma? La ke ingthirpik, lapen rat atum apap kechamdetji aphansi HEMPHU-ke nangtum aphan la nangkepilo.

¹⁸La avi kangthir apehem arlo vanvedet-lo apot, nehukum nang-kepi ateng nangtum hadak amat athok nangtum chodet nangji apot-lo.”

¹⁹Aaron thak-lo, “Ne jongsi pini pap athok chodet-lo pulote HEMPHU nangchedon dunjima? Rat atum pini HEMPHU aphan halatum apap athok pipo, lapen latum halatum kephrin athok-heihei chevanlo, bonta non-anta nephan lahei kepherememe ason nangplang-bomlang.”

²⁰Moses la arjulongsi alangli ning ingsampamelo.