Read Karbi LEVI 11 Bible Online

LEVI 11 - Karbi bible

LEVI 11

¹HEMPHU lahei aron Moses lapen Aaron aphan pilo,

²Lahei Israel atum aphanlo. Nangtum bam api a-ok la akeng kemo an mate kechephlak an chotame,

³lapen ahiso kechehejemai api an chotame.

⁴bonta latum angbongpen ka-ut, ahiso cheheje seta akeng kechephlak kalidet apot la nangtum aphan ingthirthelo.

⁵Coney pu arlong along kedo api ahiso cheheje seta akeng chephlakphle apotsi nangtum aphan la kangthir kalidet-lo.

⁶Lapen mengserang ahi cheheje seta akeng kemo kechephlak kali, lata nangtum aphan kangthir kalidet-lo, la apotsi lahei chonangnelo.

⁷Phak a-ok chori. Lahei ingthirthelo; latum akeng kemo chephlak dak seta ahiso chehejejelo.

⁸Lahei api chori lapen lahei kethi arpum ot-ri; lahei ingthirthelo.

⁹Abeng lapen alip kedo alang a-ok an nangtum chotame,

¹⁰bonta lang along kedo abeng lapen alip kave a-ok cho nangnelo.

¹¹Lason api ke kangthirthe pura lakha nangji. Lahei nangtum cho nangnelo, mate lahei kethi arpum papho nangnelo.

¹²Lang arlo kedo abeng lapen alip kave api nangtum cho nangnelo.

¹³Vo atum angbong nangtum lahei cho nangnelo: Lahei ke vomu, vo-inghu, takun-heihei,

¹⁴lapen ason ason avomu lapen atakun-heihei an.

¹⁵lapen vo-akpi ajat an,

¹⁶lapen ostrik avo, vohamlam, lang avokak ajat an, vomu ajat an,

¹⁷volangjak, volongkom, vo-dudu,

¹⁸kethoichobei avo, vojarong lapen takun aphu ke-er,

¹⁹vochokang , volongkom piban, volongkom ajat an, lapen vo-arplak-heihei an helo.

²⁰Arveng kedo apipli-phelong an ingthirthelo,

²¹seta arveng kedo api angbong jongsi akengpak athak akeng asek kedo lapen longle athak chonhop-hop pulote nangtum chotame.

²²Phelong angbong longvur, phelong ajat ajat lapen longchojai-heihei nang-tum chotame.

²³Bonta akaprek ajer-jer arveng kedo api an keklim api an ke kangthirthelo, pusi matha nangji.

²⁴Lapen la pen ajok nangtum ingthirthe plangpo; halahei kethi arpum ke-ot abang aling ha arnikangsam an ingthirthelo,

²⁵lapen badu setame lahei abang arpum ephar kepon aling abang ape-ari chechok nangji lapen arnikangsam an ingthirthelo.

²⁶Akeng kemo chephlakdet bonta chephlakdak khangjang kalilang lapen ahiso chehejeje api an nangtum chokertang lapen ke-ot aling abang ta ingthirthelo.

²⁷Lapen akengchipu pen kedam, lapen akeng hongphli api an nangtum cho kertang; lapen badu tame lahei kethi arpum ke-ot abang aling arnikangsam anta ingthirthelo,

²⁸lapen la arpum kepon abang aling ape-ari chechok nangji, lapen arnikangsam an ingthirthelo; lahei nangtum aphan ingthirthelo.

²⁹Lapen pirthe athak keklimjam api atum angbong pen la-heihei nangtum aphan ingthirthelo; jukingthai, jukingso, bilit, ureng ajat an,

³⁰lapen kako, hang-et, hanglu ajat an, lapen bam atemong ajat ajat an.

³¹Lahei keklimjam api angbong nangtum aphan ingthirthelo; lahei kethi ahut ke-ot abang aling ha arnikangsam an ingthirthelo.

³²Lapen la kethitang arpum jongsi mane aphuthak mate amar aputhak klolo pulote la arnikangsam an ingthirthelo, lahei kopine amar tahai, thengpi abeng, pe-ri mate ok-reng mate thoila, lapen ke-en bom ketun-kedang aphule setame lahei aputhak klolote arnikangsam an ingthirthelo; aphi ansi la ingthirji.

³³Lapen jongsi latum kethitang abang arpum inghan atebuk athak klolote, la arlo kedo ason anta ingthirthelo, lapen nangtum la ingthurai masi.

³⁴Jungjung kechobom a-an, lason aputhak jongsi halason atebuk pen lang dung-ilo pulote ingthirthelo, lapen lason arlo kedo kejunme alang setame ingthirthelo.

³⁵Kethi arpum keklo aputhak amar an ke kangthirthelo; inghan alongthu adang tame mate me akri kepon-i aharlung tame paphuk-rai nangji,

³⁶bonta lang amek lapen langtuk-heihei ingthirverpo, jonghele kethi arpum kepho an ingthirthedet lo seta.

³⁷Kerikji achili aputhak jongsi lahei klolo pulote chili ingthir-etverji.

³⁸Bonta lang kenim achili aputhak jongsi kethi arpum klolo pulote la nangtum aphan ingthirthelo.

³⁹Kechome api jongsi thilot pulote badutame la ke-ot abang aling arnikangsam an ingthirthelo.

⁴⁰Mane jongsi pi arpum athan cholo pulote, alangli ape-ari chechok nangji, seta alangli arnikangsam an ingthirthetang-lo; badutame kethi arpum kepon abang setame ape-ari chechokvek nangji, lapen ke alangli jonghe seta arnikangsam an ingthirthetang-lo.

⁴¹Longle athak keklimjam bihek api angbong nangtum cho nangne,

⁴²latum angbong apok pen keklim lapen akeng hongphli pen keklim api tame mate ongdung akeng-pen keklim api setame.

⁴³Lahei angbong nangtum kecho pen ajok nangmethang chepasa-ur nangne.

⁴⁴Ne nangtum Arnam HEMPHU-lo, lapen nangtum chepangthir-et-le dotu, pima Ne ingthir-et.

⁴⁵Ne ke nangtum aphan Ijip pen nangkevan a-HEMPHU-lo, anke Ne nangtum a-Arnam plangpo. Nangtum ingthirvek nangji, pima Ne ingthir-et.

⁴⁶La, helo pi lapen vo aputhak, lang arlo kedo api aputhak, lapen longle athak keklimjam api-an aputhak aronlo.

⁴⁷Nangtum kopi pisi aron atang pen kangthirma kangthirthema, kechome api lapen kechono api bahak thek vek nangji.