Read Karbi LEVI 14 Bible Online

LEVI 14 - Karbi bible

LEVI 14

²la aber ketok-heihei inut amonit areng along si-i akeso kemedet aphi kechepangthir nangji aron pilo. Labangso amonit aphan ingthirtang-lo pu pachethang arni, alangli phan kurusar adung van nangpo,

³lapen kurusar abang alangliphan mukam angtan kelangjisi pondetpo. Jongsi keso melo pulote,

⁴kurusar abang aron atengpen kangthir avo jonni kepavanji aphan hukum pipo, laso along kedar athengpi ebeng, honjeng arri-ke-er, lapen “thengphrang” abap van-nangji.

⁵Anke kurusar abang kangbop alang kedo alongle aharlung isi along vo ejon pathipo.

⁶Alangli akaprek avo ensi, la kedar athengpi abeng, honjeng ari ke-er, lapen “thengphrang” abap penpen kepathitang avo avi along nim po.

⁷Areng a-si-i akeso kecholong pen kechepangthirji pu abangphu aphuthak alangli batai throksi vi arsipo, la ansi alangli ingthirtang-lo pu pachethangpo. Anke alangli kerenglang avo aphan hidi ajo lophlotpo.

⁸Bangso amonit ape-ari chechokpo, achu do-anta chesoipo, lapen lang chinglupo; anke alangli aron atengpen ingthir-etpo. Alangli mukam arlo lutdamtahai, bonta alangli methang apehem angtan nithroksi donangji.

⁹Throksi arni alangli phu achu chesoi nangji, angmum lapen amekkung anta lapen abang along kedo-an areng angmi anta chesoi nangji. Alangli ape-ari chechokpo lapen lang chinglupo, ansi alangli aron atengpen ingthirpo.

¹⁰Ninerkep arni alangli jonni abiresak aloso lapen aju-kavepin abiresak api ningkan isi arta ejon, jit ajangthu pen kepangvui him aduk linthom, lapen powa isira ebeng ajit ajangthuta vanpo.

¹¹Kurusar abang laso amonit lapen lahei amar athok HEMPHU kedo a-Pehem amangho along ponpo.

¹²Anke kurusar abang biresak aloso ejon lapen jit ajangthu powa isira ebeng la preng kechetu athok pusi pajirpo. Alangli la HEMPHU anat kurusar apharman isi kepanong athok pajirpo.

¹³Biresak aphan alangli ha kangthir adim pap lapen kephrin athok aphan pi kethat adimsi pathidampo. Alangli la klemvek nangji athema pap athok ason-thak-thaksi preng kechetu athokta kurusar apharman lapen ingthirpik chenam.

¹⁴Kurusar abang biresak avi ajehak ponsi aron ateng kechepangthir abang ar-e anonam along, ari ar-e achimunpo along, akeng ar-e achimunpo along la hipo.

¹⁵Kurusar abang ajehak jit ajanthu ponpo lapen aripak arvi along dungpo,

¹⁶la along ari munjong ar-e nimpo lapen hadak HEMPHU kedo adim batai throksi ajehak la arsipo.

¹⁷Ajehak ajangthu alangli ripak along ensi, lapen ajehak biresak avi ensi ano ar-e anonam along, ari munpo ar-e along, lapen akeng munpo ar-e along aron atengpen kechepangthirji pu amonit aphan hipo.

¹⁸Aripak along ahin kedo-an ajangthu ke halabangso amonit aphu along patip-etpo. Lasonsi alangli aron pen kepangthir akam klempo.

¹⁹Anke kurusarsi pap athok lapen aron ateng pen chepangthir akam klempo. Laso aphi, dovan athak kephrin athok aphan

²⁰sok-sang athok penpen alangli pi pathipo. Lasonsi kurusar abang aron ateng pen kepangthir akam klempo lapen halabangso amonit ta aron atengpen kangthir plangpo.

²¹Jongsi inut amonit dukvok, lapen ajakong ave pulote, alangli kechepangthirji aphan ejon biresak aloso prengkechetu athok, isi HEMPHU anat kurusar aphan kepanong adan vanpipo. Alangli sok-sang athok aphan elin jit ajangthu pen kepangvuitang ahim aduk, lapen jit ajangthu powa isira ebeng vanpo.

²²Alangli jonni avothung mate thungpharlo vanpo, ejon ke pap athok aphan lapen ajon kaprek ke kephrin athok aphan.

²³Chepangthir nerkep arni kurusar along alangli lahei Pehem kelut anghap along vanpo.

²⁴Kurusar abang biresak aloso lapen jit ajangthu ponsi kurusar aphan HEMPHU angno isi kepanong adan ponpo.

²⁵Alangli biresak aloso ponsi pathipo lapen ajehak avi ponsi halabangso amonit ar-e anonam along, arimunpo ar-e along, lapen ar-e akengchimunpo along la hipo.

²⁶Anke kurusar abang amethang arvi aripak along ajehak ajangthu dungsi,

²⁷arichimun ar-e pen la ajehak batai throksi HEMPHU angno arsipo.

²⁸Vi kehi adimthotsi ajehak ajangthu bangso amonit ar-e anonam along, arimunpo ar-e along, lapen ar-e akengmunpo along hipo.

²⁹Aripak along ahin kedo-an ajangthu ke bangso amonit aphu along hi-etpo lapen lasonsi aron atengpen kechepangthir akam klempo.

³⁰Anke alangli ejon avothung mate athungpharlo

³¹isi pap athok ason alangli pajirpo, lapen ajon kaprek ke sok-sang adan pen pen kephrin athok pipo. Lasonsi kurusar abang aron atengpen kechepangthir akam klempo.

³²La helo inut areng along si-i kesodet abangphan kepi aron bonta la ke alangli kechepangthirji aphan akenang athok kevan un-e abang aphanlo.

³³Moses lapen Aaron aphan HEMPHU lahei ahukum pilo,

³⁴“Nangtum Kanaan adet kevang ahut, nangtum kepacheraidetji aphan Ne nangkepi, lapen nangtum kecherai adim along Ne nangkepaman asi-i keso kepho adon mate ahem,

³⁵hem kechepahemphu abangphu kurusar along damra ‘Netum ahem along pine akeso longtang-lo’ pu than dam nangji.

³⁶Kurusar si-i keso kelangji aphrang hempen asontinta keterek-etji aphan hukum pipo; kalite hem arlo kedo amar an ingthirthelo pu pachethangpo. Ansi alangli hem arlo dampo,

³⁷lapen si-i akeso langdampo. Jongsi akelirseng mate ake-er angthek arpong along chobomlang pulote,

³⁸alangli hem obubpo, lapen nithroksi an ingkirchekpo.

³⁹Throksi arni alangli chevangthupo lapen langthupo. Jongsi si-i keso thebomlote,

⁴⁰si-i kepho a-arlong keterek-ra rongsopi angtan kangthirthe adim kevardamji aphan hukum pipo.

⁴¹Laso aphi alangli hem arlo arpong alongle pasoi-etsi kesoitang aduk an rongsopi angtan kangthirthe adim along vardam-etpo.

⁴²Anke keterektang alongle mate a-arlong alar akaprek a-arlong bithupo, lapen arpong kebangji aphan akaprek akemi bangsi vit-thupo.”

⁴³Hem a-arlong-heihei terekdet aphi lapen hem soidet pen inghan vitdet aphi puthot hem along arok akeso nangklang-lo pulote.

⁴⁴Kurusar abang damsi langdampo. La jongsi ingdaktang-lo pulote, hem ingthirthetang-lo.

⁴⁵La a-arlong-heihei, athengpi-heihei, lapen kevit arpong kedo-an phrisi rongsopi angtan kangthirthe adim pon-etnangji.

⁴⁶Mane abang jongsi hem kangkirkling ahut lutdamlo pulote ha arnikangsam an bangso abang ingthirthetang-lo.

⁴⁷Mane jongsi halaso ahem arlo tilailo, mate cholote, alangli pe-ri chechok-et nangji.

⁴⁸Jongsi, Kurusar abang nangkelang ahut, hem puthot kangnithu aphi arok akeso ingdakdelo pulote, alangli bangso ahem aron ateng pen ingthirtang-lo pu pachethangpo, pima arok akeso terek pamelo.

⁴⁹Hem kepangthirji aphan, alangli jonni avo, ajehak kedar athengpi, phamri ke-er, lapen hyssop abap esim ponpo.

⁵⁰Langjeng alang kedo longle aharlung aputhak ejon thatpo.

⁵¹Anke alangli kedar athengpi, hyssop abap esim, phamri ke-er, lapen kereng avo ponsi kethattang avo avi along lapen langkeme along nimpo. Anke alangli batai throksi hem aputhak arsipo.

⁵²Lasonsi alangli vo avi pen, langkeme pen, kereng-et avo pen, kedar athengpi pen, hyssop abap pen, lapen phamri ke-er pen hem pangthirpo.

⁵³Anke alangli rongsopi angtan hidi ajo kerenglang avo lophlotsi pangjarchorpo. Lasonsi alangli kepangthir aron atang pen klemsi hem pangthirpo, lapen la aron atengpen kangthir plangpo.

⁵⁴Laheihelo kepherememe si-i akeso,

⁵⁵chipru amek, ingthum-heihei akeso, mate amek kangdak-heihei,

⁵⁶lapen pe asi-i, hem asi-i aputhak aron-heiheilo.

⁵⁷Lahei aron pensi pine ingthirthe ason lapen ingthir-et ason aputhak phar-i-lo.