Read Karbi LEVI 16 Bible Online

LEVI 16 - Karbi bible

LEVI 16

¹HEMPHU aphan kangthirthe ame kehodai ajok Aaron asopo banghini thidet aphi Moses aphan HEMPHU ningjelo.

²Alangli pulo, “Nang ik Aaron aphan thannon, athik apor ahut-le kebeng ape anung Kangthirnei Adim arlo padam-longchotnon, pima hadak Kechejok Asinduk adip athak inghun along Ne kecheklang adimlo. Jongsi alangli kroikre lote alangliphan pathilotpo.

³Kangthirnei Adim kelutji aphrang alangli pap athok kepiji aphan chainong aloso ejon lapen kephrin athok aphan biresak aloso ejon van nangji.”

⁴Anke HEMPHU lahei pinkhat-lo. Kangthirnei Adim Aaron kelut dam aphrang, alangli lang chinglu nangji lapen kurusar ape-ari chingthang nangji: Pe kanglit achoi keding, rikong abeng, vamkok, lapen poho.

⁵Israel arat atum Aaron aphan bi alo jonni pap athok aphan pipo lapen biresak aloso kephrin athok aphan pipo.

⁶Amethang lapen hem isi apap kepachamji aphan alangli chainong alo ejon arklipo.

⁷Anke alangli HEMPHU kedo A-pehem ajakan along bi alo jonni ponpo.

⁸Hadak alangli arlong muni ensi khadot pathupo, elong abang ke “HEMPHU apharman” lapen along kaprek ke “Azazel apharman” pusi tokpo.

⁹Aaron abang khadot pen kangvaitang abi ensi HEMPHU aphan pap athok pipo.

¹⁰Azazel apharman keklo abi ke HEMPHU anat akereng si hodaipo, lapen Azazel anat akejejangtang ajo anat lophlotpo, la ke rat atum apap kepaponji aphanlo.

¹¹Aaron amethang lapen ahemtun apap aphan chainong alo athok pilote,

¹²alangli dovan pen methek aharlung plengset me akri ponpo lapen chikip hini ahijung ensi Kangthirnei Adim ponpo.

¹³Hadak HEMPHU angnosi alangli me akri along hijung thokpo, anke hijung amehi Kechejok Asinduk adip dipthippo, anke alangli la thek-longlelo lapen thithelo.

¹⁴Alangli ajehak chainong avi ponpo, lapen arichimun pen adip athengno arsipo lapen la ajehak Kechejok Asinduk athengno batai throksi arsipo.

¹⁵Laso aphi, rat apap athok aphan bi alangli pathipo, la avi Kangthirnei Adim vansi, adip athak arsipo lapen Kechejok Asinduk angno arsipo, la alangli chainong avi pen keklem asonthot klempo.

¹⁶Lasonsi alangli Kangthirnei Adim Israel arat atum kangthirthe lapen halatum apap-heihei kedo-an pen aron ateng pen kepangthir akam klempo. Peham along alangli la klemvek nangji, pima la mukam angbong chitim si kedo, la aron ateng pen ingthirthe.

¹⁷Aron ateng pen kepangthir akam keklemji aphan Aaron Kangthirnei Adim kelut ahut pen alangli nangkebar ahut an, inutbakta Pehem arlo avedet masi. Alangli pharman aron ateng pen methang aphan, ahemtun aphan lapen rat aphan klempi-et aphi,

¹⁸alangli kephrin athok lapen la kepangthir ji aphan dovan along nangbarvek nangji. Ajehak chainong avi lapen bi avi alangli ensi dovan anu lapen atengri bithe hipo.

¹⁹Ajehak avi alangli ri chimun pen dovan athak batai throksi arsipo. Lasonsi Alangli Israel arat apap pen la pangthirpo, lapen la pangthirlo.

²⁰Kangthirnei Adim HEMPHU kedo A-pehem, lapen dovan along aron ateng pen Aaron kepangthir akam klem patangdet aphi, Azazel apharman kangvaitang kereng-et abi, HEMPHU angno pon nangji.

²¹Bi anu hini athak alangli ri hongni batsi Israel atum kehingno an, apap-heihei an lapen rat atum kethurkrap apap do-an chekobirpo, lapen lahei bi aphu athak papon-etpo. Lapen inut kangvaitang amonit pen ajok bi aphan ha kejejangtang ajo phlungjuipo.

²²Monit kedodepin adim bi si halatum apap kedo-anta pon-etpo.

²³Anke Aaron ha Pehem arlo dampo, lapen Kangthirnei Adim along kelutdam aphrang kechingthang kurusar ape-ari alangli chephlokpo lapen lahei hadak chebipo.

²⁴Kangthir adimsi alangli langchinglu nangji lapen amethang ape-arisi chingthang nangpo. Laso aphi alangli ingtan damsi amethang lapen rat atum apap kechamjisi kephrin athok alangli pipo.

²⁵Dovan athak alangli pap athok api athu phrinpo.

²⁶Bi ha Azazel akejejangtang ajo anat kelo abang amethang amukam arlo nangchevoive ako ape chechok masi lapen lang chinglu et masi.

²⁷Chainong lapen bi pap athok aphan ke-en, la pap kepaponji aphan Kangthirnei Adim along kevan avi mukam angtan ponsi me phrin nangji. Areng, a-ok, lapen aphek-heihei me phrin nangji.

²⁸Lahei kephrin abang ape chechok nangji, lapen amethang amukam along kechevoi aphrang lang chinglu nangji.

²⁹Lahei aron ke kevangji arni anta ketalon nangjilo. Throksi achiklo kep arni Israel atum lapen latum along kedo bang adet aso atum anta anhum nangji lapen jat akamta klemkledet nangji.

³⁰Halaso arni halatum apap-heihei pen kepangthirji aphan aron ateng pen latum aphan pangthirpo, ansi latum aron ateng pen ingthirpo.

³¹Halabangso arni ke ingthirpik arnipo, la ke an-kehum lapen kam keklemkle arnilo. Laso aron ke kevangji arni anta ketalon nangjilo.

³²Kurusar Kethe aphan, kebat pame lapen apo alar kepaklemji aphan kepanong abang, aron atengpen chepangthir akam klem nangji. Alangli kurusar ape-ari chingthangpo,

³³lapen Kangthirnei Adim, HEMPHU kedo A-pehem an, dovan, kurusar atum aphan, lapen kedo-an rat atum aphan aron ateng pen kepangthir akam klempo.

³⁴Lahei aron ke kevangji arni anta talon nangpo. Labangso aron akam ke Israel arat apap anpen kepangthirji aphan ningkan isi pen ephongsi klem nangchotji. Lasi HEMPHU hukum kepi atengsi Moses klemlo.