Read Karbi LEVI 17 Bible Online

LEVI 17 - Karbi bible

LEVI 17

¹Moses aphan HEMPHU hukum kepapijisi

²Aaron lapen alang-lisomar atum aphan lapen Israel arat atum aphan lahei aron pilo.

³Israel atum angbong inutbak jongsi chainong api mate biresak mate bi HEMPHU aphan athok kepi ahut HEMPHU Kedo A-pehem pen apar along kaprek adim pathilo bonta vanve lote la Aron ingdilo.

⁴Alangli vi pabulo lapen Arnam arat atum angbongpen inut-lo pu lakha ponpedetpo.

⁵Laso ahukum athe ke lahelo, Israel arat atum ingtan kepathi api HEMPHU along van nangji. Latum non Kurusar along van nangpo ha Pehem along lapen kejelang athok-lo pura lahei pathi nangpo.

⁶Pehem ajakan adovan akung along kurusar abang vi arsipo lapen angnim HEMPHU aning padokjin ji aphan athu phrinpo.

⁷Israel arat atum bi-ahi-i aphan athok kepira kepathi pen ajok alanglitum HEMPHU angno kekroithipthe abang kalidetpo. Laso aron Israel atum kevangji arni anta keklem-ponbomji aphan binangpo.

⁸Israel atum angbong badutame mate rat angbong kedo bang-adet aso tame kephrin athok mate

⁹jat athok tame HEMPHU aphan kepi ahut Pehem ajakan along apar along kaprek si pilo bonta vanvedet-lote Arnam arat atum angbong inut-lo pu lakha ponpedetpo.

¹⁰Israel angbong tame mate rat angbong kedo bang adet aso tame jongsi avi kedo a-ok cholo pulote alangliphan HEMPHU aningthihak po lapen arat atum angbong inut-lo pu lakhakhedetpo.

¹¹Kereng api an apran achethe ke vi alongsi do, la apotsi rat atum apap kepahelojisi vi kedo-an dovan along kedung-etji aphan HEMPHU hukum pilo. Vi alongsi chethe, la pap ponlo.

¹²La apotsi Israel atum mate latum along kedo bang adet aso setame vi kedo a-ok ke cho nangne.

¹³Israel aso tame mate bang adet aso tame aron ateng pen kangthir api mate vo cho-ap-lote la avi latum longle athak dung-et nangji lapen la longle aduk pen orthip nangji.

¹⁴Kereng-et api an achethe ke vi alongsi do, la apotsi Israel atum aphan vi kedo a-ok chori pu HEMPHU pulo, lapen badutame la keklem aling abang alangli rat lo pu lakhakhelo.

¹⁵Badutame, Israel atum mate bang adet aso tame, amethang kethi api mate kaprek marat api atum kepathitang pi a-ok cholote alanglitum ape chechok nangji, lapen lang chinglu nangji, aron atengpen chepangthirthe aphrang arnikangsam an chonghong nangji.

¹⁶Alangli jongsi klemkle pulote ale pho nangpo.