Read Karbi LEVI 18 Bible Online

LEVI 18 - Karbi bible

LEVI 18

¹Israel arat aphan kepathanjisi

²Moses aphan HEMPHU pulo, “Ne ke nangtum a-Arnam HEMPHU-lo.

³Nangtum aphrang kedo, Ijip atum keklem ason nangtum klemri, mate nangtum aphan ne nangkeponbom adet asor Kanaan arat ason klemri.

⁴Ne aron-heihei kroinon lapen ne kopi ma hukum nangkepi la klemnon. Ne ke nangtum a-Arnam HEMPHU-lo.

⁵Ne nangtum aphan nangkepi aron-heihei lapen ahukum-heihei klemnon; la keklem ajok nangtum achethe jokji. Ne HEMPHU-lo.”

⁶HEMPHU lahei aron pilo. Nangtum adon chepho-chero atum pen dim-tar pasiri.

⁷Nangpei pen dim-tar kepasi pen ajok nangpo aphan langremri. Nang nangpei aphan langrem nangne.

⁸Nangpo apiso atum pen dim-tar kepasi pen ajok nangpo aphan langremri.

⁹Nang ingjir atum pen mate ingjir pateng pen dim-tar pasi nangnelo, nangpen hem isi therap-pet tame therap-petpe tame.

¹⁰Nangsu atum pen dim-tar pasiri, lake nangphan aman damphak akamlo.

¹¹Angjar angjir pen tame nang dim-tar pasiri, bangpi seta nang ingjirlo.

¹²Nangni pen dim-tar pasiri,

¹³alangli nangpo angjir setame mate nangpei akorte setame.

¹⁴Nang ong apiso pen dim-tar pasiri, bangpi ta nangnilo.

¹⁵Nangmun pen dim-tar pasiri, mate

¹⁶nangkorte apiso pen dim-tar pasiri.

¹⁷Nang pen keche-en a-arloso asopi mate asupi pen dim-tar pasiri; latumta nang pen chepholo, lapen la ke kehingno akamlo.

¹⁸Nang piso rengtik ke nangkorpi aphan enri.

¹⁹Achiklo avi kechonbom a-arloso pen dim-tar pasiri, pima bangpi aron ateng pen ingthirthelang.

²⁰Bang amonit apiso pen dim-tar pasiri la ke nangphan aron atengpen pangthirthelo.

²¹Molek a-arnamso aphan karchoji pura nang somar hodai nangne, pima la ke Arnam amen, HEMPHU aphan anong pajunolo.

²²Pinso hijan baduta dim-tar pasi nangne; Arnam la hijimpar.

²³Pi atum pen badu apinso mate a-arloso tame mek plengple akam klem nangne; lason akehingno akam nangphan aron ateng pen pangthirthelo.

²⁴Lahei akam pen ajok nangmethang chepasa-urri, athema kekroikrelang atum lasonsi amethang chepasa-urlo, lahei atum det along nangtum aphrang dolo, lapen latum aphan HEMPHU-si phlung-et-lo, la pen ajok nangtum hadak dodam longpo.

²⁵Latum akam pen det pangthirthelo, la apotsi det aputhak HEMPHU aduk pilo, lapen hadak kedo arat atum aphan la padengmolo.

²⁶Latum la hijim meme an klemlo, lapen det pangthirthelo, bonta nangtum lahei klem nangnelo.

²⁷Nangtum kedo an, Israel aso tame mate bang adet aso tame nangtum HEMPHU aron-heihei lapen ahukum-heihei kroinon,

²⁸lapen anke det nangtum aphan nangdeng-momelo, hadak nangtum aphrang kedo kekroikre atum aphan la kedengmo ason.

²⁹Nangtum chininon, lahei kehijim meme akam keklem atum an Arnam arat aso lo pu lakha ponpelo.

³⁰Lapen HEMPHU pulo, “Ne nangkepi ahukum-heihei kroinon, lapen nangtum aphrang det along kedo arat atum keklem akam nangtum klemri, lapen lahei keklem pen ajok nangtum methang chepasa-urri. Ne nang Arnam, HEMPHU lo.”