Read Karbi LEVI 2 Bible Online

LEVI 2 - Karbi bible

LEVI 2

¹Mane jongsi HEMPHU aphan isi soksang athok pajirlote, alangli la koi paduk-i nangjilang. La along alangli jit ajangthu lapen hijung bidun nangji,

²lapen la Aaron aro akurusar atum along van nangji. Adeng kedo akurusar abang chikip isi ahim aduk lapen jangthu ensi lapen hijung kedo-an HEMPHU aphan kepanong athok pusi la dovan athak thorpo. Laso kecho athok angnim HEMPHU aphan aning pangsamlo.

³Ahin sok-sang athok anke kurusar atum apharmanlo. Lake ingthir-et-lo, pima lake HEMPHU aphan kepitang athok pensi ke-en lo.

⁴Jongsi longthu along kedangtang ahim si kepiji pulote, la thap avepin pensi ke selam abang nangji. La jit ajangthu pen kepangvui karthatklui ahim tame, mate jit ajangthu kehi ahim seta me.

⁵Jongsi phule pen kedang ahim athok pulote, la jit ajangthu pen kepangvui ahim masi, bonta thap avepin nangji.

⁶La athok kepajir ahut bengra la athak jangthu dung nangji.

⁷Athok jongsi phule pen kedangtang ahim pulote, la jit ajangthu pen kepangvui ahim aduk nangji.

⁸La HEMPHU aphan isi athok ason vannon lapen la kurusar aphan pinon, alanglisi la dovan along ponpo.

⁹HEMPHU aphan kepanong angthek ephar kurusar abang ensi alangli la dovan athak phrinpo. HEMPHU aphan laso akecho athok angnim aning pangsamlo.

¹⁰Ahin athok anke kurusar atum apharmanlo; la ke ingthirpik-lo, pima la HEMPHU aphan kepajirtang pensi ke-enlo.

¹¹Nangtum HEMPHU aphan kepi soksang adan an thap pen selamri; HEMPHU aphan kepi athok along thap mate pijo-alang kaita pangvui dun nangnelo.

¹²Aningkanvang nangtum atikong adan HEMPHU along van nangpo, bonta la ke dovan athak phrin nangnelo.

¹³Soksang adantin along ingti bidunnon, pima ingti ke nangtum lapen Arnam angbong kechejok aloh along nangkedodun angthek-lo. (Nangtum athok asontin along ingti bidun nangji.)

¹⁴Nangtum kerot-kerim atikong adan HEMPHU along kevan ahut, karnu athe mate aduk ahim adansi pinangji.

¹⁵La aputhak jit ajangthu lapen hijung batnangji.

¹⁶Laso akecho amar kurusar abang jangthu lapen hijung kedo-an penpen ajehak me phrinpo, la HEMPHU aphan isi kecho amar athok asonpo.