Read Karbi LEVI 20 Bible Online

LEVI 20 - Karbi bible

LEVI 20

¹Israel arat atum aphan kepa-thanjisi Moses aphan HEMPHU pulo,

²“Nangtum angbong badutame mate nangtum angbong kedo bang adet aso atum tame, Molek a-arnam aphan keparchojisi nangsomar chepidun lote, rat pen halabangso aphan arlongpen varbop-po.

³Mane jongsi asomar inutbak Molek aphan pilote, lapen Ne kangthir A-pehem pasa-urlote lapen Ne men langrop-lote, Ne la abe thurpo, lapen la aphan Nerat atum angbong pen inut-lo pu lakhakhelo.

⁴Bonta rat atum jongsi la kopi klemloma langlelo lapen la aphan pathithelo pulote,

⁵bangso amonit abe Nemethangsi thurpo, la ahemtun isi, Nephan kekroithipthe anat la along kejelangdun atum an aphuthak Ne thurpo lapen Molek aphan karcho atum an abe Ne thurpo. Ne latum aphan Nerat aso-lo pu lakhakhelo.”

⁶Mane jongsi kethi akarjong aphan karju atum along kepareji aphan damlo pulote, Ne la abe thurpo, lapen la aphan Nerat asolo pu lakhakhelo.

⁷Nangmethang chepangthir-et-ra donon, pima Ne ke nang Arnam HEMPHU-lo.

⁸Ne aron-heihei kroinon, pima Nesi HEMPHU, nangphan kepangthir a-Bang-lo.

⁹Lahei aron HEMPHU pilo. Badutame apo mate apei aphan ahirjuno kepi abangphan pathilotpo; la amethangsi amethang kethi apot adai dolo.

¹⁰Mane amonit jongsi akorte Israel atum apiso pen beisa akam choklemdet-lote labangpo lapen a-arloso aphan pathilotpo.

¹¹Inut amonit jongsi apo apiso pen dim-tar pasidet-lote, la apo aphan langrop-lo, lapen banghini aphanta pathilotpo. Latum kethi ke amethangsi adai dolo. Latum kam-langnosi choklemlo, lapen latum akethi apot amethangsi adai dolo.

¹²Mane abang jongsi amunpi pen dim-tar pasitang lote, latum banghini aphanta pathilotpo, latum banghinita kehingno akamsi keklemlo apot, latum kethi ke amethangsi adailo.

¹³Inut amonit jongsi anut kaprek amonit pen mek-langno akam choklem lote, latum kehijimnei akam si keklemlo, lapen banghini aphanta pathilotpo. Latum akethi amethang si adai dolo.

¹⁴Inut amonit jongsi inut abangpi aphan lapen bangpi apei aphanta endet pulote, bangkethom aphanta me phrinsi pathipo, pima latum man kedamphak akam kechoklem apot-lo; lason akam nangtum angbong paklem longledet nangji.

¹⁵Inut amonit jongsi pi pen mek-langno akam choklem lote, bangpo lapen pi aphan pathilotpo.

¹⁶Inut a-arloso jongsi pi pen mek-langno akam keklemji aphan bor-ilote, bangpi lapen pi aphanta pathilotpo. Latum akethi amethangsi adai dolo.

¹⁷Inut amonit jongsi angjir mate angjar angjir aphan enlote, alanglitum aphan rat pen patherak nangji lapen rong pen phlungjui nangji. La angjir pen dim-tar-pasilo apot athe pho-longvek nangpo.

¹⁸Mane apinso jongsi inut a-arloso pen achiklo avi kechon ahut dim-tar-pasidet pulote, latum banghini aphanta rong pen phlungjui nangji, pima latum aron ateng pen kangthirthe aron ingditang-lo.

¹⁹Inut amonit jongsi ani pen dim-tar-pasidet-lote, latum banghini ta kangthirthe akam apot athe phonangpo.

²⁰Mane apinso jongsi a-ong apiso pen dim-tar-pasilote, la a-ong aphan patherak-lo, lapen bangso amonit lapen a-arloso adai tu nangji; latum banghinita aso ave-detsi thinangpo.

²¹Mane amonit jongsi akorte apiso aphan enlote, la aso avepinpen thinangpo. La aron atengpen kangthirthe akam klemlo, lapen akorte aphan patherak-lo.

²²HEMPHU pulo, “Ne aron-heihei lapen hukum-heihei an kroinon, anke Kanaan alongle nangtum aphan nangdeng-momelo, hadaksi Ne nangtum aphan nangkeponpo.

²³Hadak kedo arat atum aron-atang rimdunri; nangtum halaso adet kelutdam longji aphansi Ne lahei kekroikre arat aphan kephlung-lo. Latum kehingno akam-heihei keklem pen ajok Nephan pahijim pik-lo.

²⁴Bonta laso along ke keme lapen aho-or kedo alongle nangtum kechepahemphuji aphansi Ne chechak-lo, lapen la Ne nangtum aphan nangpidetpo. Ne ke nang Arnam HEMPHU-lo, kaprek akhei pen Ne nangtum aphan paprekvitang-lo.

²⁵Lasi nangtum pi lapen vo angbong aron atengpen kopisi ingthir-et-loma ingthirtheloma paprek nangpo. Kangthirthe api mate avo chori. Lahei ingthirthelo pu Ne pachethangtang lo, lapen lahei kecho pen ajok nangtum ingthirthe paplang-lo.

²⁶Nangtum ingthir-et nangji lapen Nelong si dochot nangji, pima Ne HEMPHU lapen Ne ingthir-et. Ne nangtum aphan akaprek akhei atum pen paprekvilo, anke nangtum Nemar plangverpo.”

²⁷Badu apinso mate arloso tame kethitang akarjong aphan karju abangphan arlong pen varpop nangji; badutame lason keklem aling abang kethi apot amethangsi adai dolo.