Read Karbi LEVI 21 Bible Online

LEVI 21 - Karbi bible

LEVI 21

¹Aaron aro akurusar atum aphan kepathanjisi HEMPHU Moses aphan hukum pilo, “Donrap kethi ahut arlengkethi along keklemdun pen ajok aron ateng pen nangtum chepangthirthe nangnelo,

²jongsi la apei, apo, asopo, asopi, akorte mate angjirpi hem isi dorappet kalite klemdun nangne,

³mate alangli angjir ‘Bangpi alangli pen kechepho abang apenan ave; bangpi ajoine pen alangli chepasa-urdet thek.’

⁴Piso ke-en pen ajok kechepho adon kethi pen ajok la chepangthirthe nangnelo.”

⁵Badu akur-asarta aphu chesoi nangne, angmum chesoi nangne, mate aning keduk angthek abang chesiridak nangnelo.

⁶Alangli ingthir-et nangji lapen Ne men patherak nangnelo. Alangli thesere athok Nephan pipo, lapen alangli ingthir-et nangji.

⁷Inut beisapi mate okarjang ingthir-et kali, mate ketitang arloso aphan kurusar atum piso en nangne; alangli ke ingthir-et.

⁸Rat atum ta kurusar ingthir-et pu matha nangji, pima alangli thesere adan Nephan pilo. Ne ke HEMPHU-lo; Ne ingthir-et lapen Nerat atum aphan Ne pangthir.

⁹Kurusar asopi jongsi beisapi plang-lote, bangpi apo aphan patheraktang-lo; bangpi aphan me phrindutsi pathilot nangpo.

¹⁰Kurusarkethe abang kehi ajang-thu aphu along chedung nangji lapen kurusar apindeng kechingthangji aphan chepangthir-et nangji, la apotsi alangli chu chingsoksera donangnelo mate ape chingsek-ra aning ke-oi chepaklang nangnelo.

¹¹Alangli ke nephan nehodaitang-lo lapen aron kepu atengpen chepangthirthe nangnelo mate Pehem kangthir ke-o pen ajok lapen apo, apei ahem tame,

¹²arleng kethi ahem kelutdam pen ajok la pasa-ur nangnelo.

¹³Alangli ke okarjang-kangthir aphansi piso en nangji,

¹⁴hemepi aphan kali, mate ketitang a-arloso aphanta kali, mate beisapi a-arloso aphanta kali. Alangli amethang kechepho adon pen a-okarjang-kangthir aphansi piso enchot nangji.

¹⁵Kalite, alanglisomar, kangthir-et nangji atumlo, aron ateng pen ingthirthe detpo. Ne ke HEMPHU-lo lapen Kurusarkethe keplangji aphansi Ne la aphan paprekvilo.

¹⁶Aaron aphan kepathanjisi HEMPHU Moses aphan hukum pilo,

¹⁷“Hop-ru-honghap nangso-nangsu atum angbong baduta Nephan him athok Nepipedetpo. La ke mo kevangji arni antalo.

¹⁸Badu amonit ta hop-ru-honghap lo pulote athok nepipedetpo: Amekkave abang tame, kengkok tame, kehop-ru abang tame, mate apunpe abang tame;

¹⁹badu tame ari, akeng ketekok abang;

²⁰amoi chingkirang mate ajonthipik abang; amek ehinvet kave abang, mate areng amek kedo abang, lapen kasi-entang abang Nephan athok pilonglelo.

²¹Aaron aso-asu angbong hop-ru honghap atum Nephan him athok nepipedetpo.

²²Lason amonit atum Nephan Nekepajir ahim pachonang, kangthir-et ahim adan lapen kangthirpik ahim adanta pachonang.

²³Bonta alangli abang honghap-hop-ru apot, alangli ke kangthir-et kebeng ape adung vangvedetpo, mate dovan adung vangvedetpo. La kangthir amar alangli pasa-ur-edet nangji, pima Ne ke HEMPHU-lo lapen Ne si lahei aphan pangthirlo.”

²⁴Ansi Aaron, Aaron asomar aphan lapen kadokave Israel arat aphan Moses than pamelo.