Read Karbi LEVI 22 Bible Online

LEVI 22 - Karbi bible

LEVI 22

¹Aaron lapen asomar atum aphan kepathanjisi HEMPHU Moses aphan hukum pilo,

²“Nangtum Ne men kangthir aputhak nongjuno van nangnelo, la apotsi man kepi penle Israel aso Nephan kehodai athok kangthir aputhak chere pamenon. Ne HEMPHU-lo.

³Nangso-nangsu atum angbong mane jongsi, aron ateng kangthirthe abang, kangthir athok Nephan Israel atum kehodai amar adung vang-lote, alangli puthot kaike seta dovan along Ne ingdukde detpo. Laso alam ke mononphi kevangji arni an aphantalo. Ne HEMPHU-lo.”

⁴Aaron aso-asu atum angbong si-i-arok kecho abang mate atini kebu abang tame aron atengpen alangli ingthirthetik an kangthir ahim pachochedet nangji. Badu akurusar tame jongsi kangthirthe amar kethitang arpum mate achili kebu amonit aphan ot-lote,

⁵mate alangli kangthirthe api mate amonit aphan ot-lote ingthirthetang-lo.

⁶Kangthirthe akurusar abang arnikangsam anta ingthirthesi donangji, lapen la-an seta alangli lang chingluletik ke kangthir ahim chochedet nangji.

⁷Arnikangsam aphi alangli ingthirpo, lapen alangli an, kangthir ahim alangli chotamelo.

⁸Amethang kethi api mate marat api kepathi api a-ok alangli cho nangnelo; la alangliphan pangthirthedetpo. Ne HEMPHU-lo.

⁹Ne kepitang aron-heihei an kurusar atum an talon nangji. Kalite, latum adai dopo lapen thipo, pima latum kangthir-et aron kroikrelo. Ne helo HEMPHU lahei kepangthir abang-lo.

¹⁰Kangthir ahim ke kurusar ahemtun abangphu atumsi cholongchotji; kaprek atum la chochedet nangji, kurusar atum along kedodun atumta chochedet nangji mate alangli kerong amonitta chochedet nangji.

¹¹Bonta inut kurusar aban, alangli methang atangka pen kenamdet aban mate alangli hem mahang-kethek abang kurusar kechodeng ahim chotame.

¹²Inut kurusar asopi bang kurusar kali abang aphan penan kedo seta kangthir ahim chochedetsi akeme.

¹³Bonta inut ahemepi mate ketitang asopi seta asomar ave lapen nangchevoisi apo ahem kedo dunjisi kevang abangpi apo kurusar kechodeng ahim pachotame. La kurusar ahemtun abangphusi chochot nangji.

¹⁴Inut amonit alangli kurusar ahem-tun abangphu kali, mathathe pinpen kangthir ahim chodet-lo, alangli kurusar aphan la anam kangthim chetuvek nangji lapen pharo pen phan 20 abat pi nangji.

¹⁵Hukum kelongle atum aphan kangthir ahim kepacho pen ajok kurusar la pasa-ur nangne;

¹⁶la apot halabangso amonit aphuthak ado lapen aduk vangpo. Ne helo HEMPHU lapen Nesi him-heihei pangthirlo.

¹⁷Aaron lapen asopomar aphan lapen Israel arat kedo-an aphan kepathanjisi HEMPHU Moses aphan lahei ahukum pilo.

¹⁸Israel angbong mate Israel along kedodun bang adet aso atum badu setame kephrin athok kepi ahut, methang kechechak kechepachok setame mate ning-kehang athok setame, pi abang thangnatta kehingno avedet nangji.

¹⁹Kedengmeji aphan, la alo akehingno avepin nangji.

²⁰Kemesense api jongsi nangtum pilote, HEMPHU nangdengde detpo.

²¹Mane jongsi HEMPHU aphan kejelang athok pajirlote, kechechak kechepachok mate ningkehang kepi athok tame, pi abang thangnat akehingno avedet nangji la jongsi dengvek nangji pulote.

²²Amekkave, kengkok, mate kehingno, mate angthum kedo, mate jangkhung kecho, mate chipru kecho api HEMPHU aphan pinang ne. Lason api kecho athok pura dovan along pi nangne.

²³Ningkehang athok aphan nangtum pi akeng chingdonde ason ke pitame, bonta la ke kechechak kechepachok athok aphan dengmeme kali.

²⁴HEMPHU aphan ati keler, kelik, mate kerotpet, mate kechingsekdak api dan pi nangne. La ke nangtum alongle along ahukum ave.

²⁵Bang adet aso pen kelong api kecho adan pi nangne. Lason api ke kemesen kali pusi mathapo, lapen dengnolo.

²⁶Chainong aso, biresak aso, mate bi aso kephi ahut, la ni throksi an apei pen terek-redet nangji,

²⁷bonta laso aphi si kecho adan aphan dengmeji.

²⁸Chainong api, lapen la aso mate biresak api lapen la aso, mate bi api lapen la aso arnisi angbong pathiri.

²⁹Nangtum HEMPHU aphan Kero athok kepi ahut, aron atengpen klemnon, anke nangdengpo;

³⁰arnisi angbong chonon lapen puthot adap an echetta biri.

³¹HEMPHU pulo, “Ne hukum-heihei kroinon; Ne HEMPHU-lo.

³²Ne men kangthir aputhak anong pajunorinon; Israel atum kedo-anta Nephan ingthir-et pu chini nangji. Ne HEMPHU-lo lapen Ne si nangtum aphan pangthirlo;

³³lapen nangtum a-Arnam keplangjisi Ne nangtum aphan Ijip adet pen nangvanlo. Ne helo HEMPHU-lo.”