Read Karbi LEVI 23 Bible Online

LEVI 23 - Karbi bible

LEVI 23

¹Dhorom arong-aje aphan Moses aphan HEMPHU

²lahei aron pilo, Israel arat atum karchoji aphan kechingrumpet ahut aphan.

³Nangtum kam keklemji aphan ni throk dolo, bonta chemathanon, throksi arni, Kesang-arnilo. Laso arni ke kam klemri, bonta karchoji aphan chingrumnon. Kesang-arni ke HEMPHU apharman, nangtum nahok-le dotame.

⁴Athik apor ahut lahei arong-aje pachethang non.

⁵Kejok amei ke, HEMPHU aphan aman kepijisi talon nangpo, kecheng achiklo krephli arnikangsam pen chengpo.

⁶Krepho arni ke Thapkave Ahim Arong-aje Amei chengpo, lapen ni throksi an nangtum thapkave ahim cho nangnelo.

⁷Laso arni angbong kecheng arni nangtum kechoji aphan chingrumpo, lapen thangnat akamta klemkledetpo.

⁸HEMPHU aphan nithroksi him adan pinon. Throksi arni nangtum puthot karchoji aphan chingrumthupo, bonta nangtum methang akam thangnatta cheklemkledetpo.

⁹HEMPHU nangkepi adet arlo nangtum kevang ahut,

¹⁰lapen nangtum sok chorotpo, kerotcheng apeng ke kurusar along le ponnon.

¹¹Alangli la HEMPHU aphan isi kepanong adan panongsi pipo, anke nangphan nangdengpo. Kurusar abang la Kesang-arni aphi la pajirpo.

¹²Sok adan nang kepi arni, ejon mesen biresak aloso ningkan isi arta ta isi kephrin athok pidunpo.

¹³La along nang linni jit ajangthu pen kepangvui ahim aduk isi him adan ason pipo. Laso athok angnim HEMPHU aphan aningpadok-lo. Laso along nang elin adrakha alang adan pidun nangji.

¹⁴Sok kemi chori, akevai tame, karnu tame, mate ahim kepangdang tame, lahei adan Arnam along vanvetik-ke chori. Laso aron ke nangso-nangsu atum mo kevangji arni anta klembom nangji.

¹⁵HEMPHU aphan sok adan kepijile sok apeng kevan arni. Kesang arni aphi rui throksi pachok-lim lakhanon.

¹⁶Phokep arni, throksi a-Kesang arni. HEMPHU aphan akemi asok adan pinon.

¹⁷Adontinta him dumni vansi lapen lahei HEMPHU aphan isi kepanong adan pinon. Him adumtinta linni ahim aduk thap kepangvuitang pen kedang ahim lapen HEMPHU aphan kerotji asok kepathecheng adan panongsi pipo.

¹⁸Him penpen rat atum ningkan isi abiresak aloso jon throksi, chainong alo ejon, biresak alo jonni, thangnatta hingnone pin pen van-nangpo. Lahei isi kephrin athok asonsi HEMPHU aphan, sok-sang adan lapen drakha-ahorlang adan penpen pirappetpo. Laso athok angnim HEMPHU aphan aning padok-lo.

¹⁹Lapen pap athok aphan ejon abi alo pinon lapen kejelang athok aphan ningkan isi arta abiresak alo jonni pinon.

²⁰Kurusar atum apharman kurusar abang him lapen biresak aloso jonni penpen HEMPHU aphan isi kepanong athok pajirpo. Lahei athok ingthir-et-lo.

²¹Laso arni nangtum methang akam thangnatta cheklemri bonta karchoji aphan chingrumtu. Nahok-le do seta nangso-nangsu atum mo kevangji arni an seta lahei aron klembom nangji.

²²Nang hidi sok cherot lote, hidi akung asok abu amat rot-ri, lapen ke-otang aser puthot kerotdamji aphan damthurinon; lahei keduk lapen bang adet aso atum aphan otekangnon. HEMPHU ke nangtum a-Arnamlo.

²³Throksi achiklo kecheng arni isi kesang arni panongnon, lapen

²⁴Pong-ut but-lote karchoji aphan chingrumpetnon.

²⁵HEMPHU aphan him athok pajirnon lapen nangtum methang akam thangnatta klemrinon.

²⁶Throksi achiklo kep arni ke rat atum apap kedo-an kepaponji aphan aron ateng pen ningkan esek pen keklem arnilo.

²⁷Halabangso arni ke ajat asonta chori; karchoji aphan chingrumpetnon, lapen HEMPHU aphan kecho athok pajirnon.

²⁸Ha-labangso arni thangnat akamta klemri, pima laso arni ke aron ateng pen pap kepapon akam keklemji arnilo.

²⁹Halabangso arni pine kecho aling abangphan Arnam arat aso lo pu lakhakhelo.

³⁰Halabangso arni mane pine akam klemlote, HEMPHU amethang amatsi bangso amonit aphan pathilotpo.

³¹Lahei aron ke nangso-nangsu atum an aphantalo, latum nahok-le do setame.

³²Achiklo sirkep arni arnikangsam pen kep arni arnikangsam an isi kepanong arni kesang aphan talonnon, laso ahut thangnatta cho nangnelo.

³³Kechepachong Arong-aje amei throksi achiklo krepho arni pensi chengpo

³⁴lapen ni throksi an dopo.

³⁵Lahei angbong kecheng arni karchoji aphan chingrumpetnon lapen nangtum thangnat akamta klemri.

³⁶Arnivang ni throksi an nangtum him athok pi nangji. Nerkep arni karchoji aphan nangtum chingrumpetnon lapen kecho athok pajirnon. La ke isi karcho arnilo, lapen nangtum kam klem nangnelo.

³⁷(Nangtum karchoji aphan kechingrum lapen kecho athok, ke-phrin athok, sok-sang adan kepi, karkli, drakha ahorlang athok arni arni akenang ateng pen kepi pen ajok lahei dhorom arong-aje-heihei along nangtum HEMPHU aphan aman pilo.

³⁸Lahei arong-aje ke kedover Kesang-arni apar abat akamlo, lapen lahei-hei athok ke nangtum kepibom adan-heihei apar abat-lo, nangtum kechechak kechepachok athok-heihei, lapen ningdakdak adan HEMPHU aphan kepi adan-heihei abat-lo.)

³⁹Nangtum ahidi sok-rot-et-lote, laso arong-aje nithroksi an talonnon, throksi achiklo krepho arni pen chengnon. Kecheng arni ke isi kesang kepanong arnilo.

⁴⁰Halabangso arni bari athengpi pen kemenei athe ponnon, sotele aro-heihei ponnon lapen arvo kedo athengpi aro ponnon lapen nang Arnam HEMPHU aphan aman kepijile dhorom arong-aje chengnon.

⁴¹La ni throksi an talonnon. Laso aron ke nangso-nangsu atum mo kevangji arni anta kerim nangji akamlo.

⁴²Israel atum kedo-an ta kechepachong adimsi ni throksi donangji,

⁴³anke Ijip adet pen HEMPHU Israel atum aphan keja ahut jungjung kechepachong adimsi kedo pu alam nangso-nangsu atum chinipo. Alangli ke nangtum Arnam HEMPHU-lo.

⁴⁴Lasonsi HEMPHU aphan aman kepijile dhorom arong-aje aputhak Israel arat atum aphan Moses aron-heihei pilo.