Read Karbi LEVI 24 Bible Online

LEVI 24 - Karbi bible

LEVI 24

¹Israel atum aphan lahei aron kepapijisi HEMPHU Moses aphan hukum pilo:

²Pehem along amelur aphan akemenei aju-kavepin ajit ajangthu vannon, anke kaiketa me karverpo.

³Adapvangta Aaronsi lahei keipo lapen lahei ha adap anta pakarverpo, hadak kebeng ape angtan HEMPHU kedo adim, Kechejok Asinduk athengno, la ke Kangthirnei Adim. Laso aron ke mo kevangji arni anta kekroinangjilo.

⁴Ser amelur archok along amelur Aaronsi langpo lapen ke HEMPHU angno kaiketa kekarverji aphan langpame nangpo.

⁵Linkrehini ahim aduk ponnon lapen him plangkrehini paplang non.

⁶Him parenni binon, arentin plangthrok throk ser pen kebang atebul athak batnon, la ke HEMPHU angnosi dolo.

⁷Arentin aju-kavepin amehi kelok ahijung binon, him adim HEMPHU aphan kecho athok angthek-lo.

⁸Kesang-arnitin, kevangji arni anta, him ke HEMPHU angno si binangji. La ke Israel atum kaike keklem nangji akamlo.

⁹Him ke Aaron lapen la aso-asu atum apharmanlo, lapen latum la kangthir adimsi chonangji, pima la ke kurusar atum apharman HEMPHU aphan kepi kangthirpik akecho mate ahim athok-lo.

¹⁰Inut amonit dolo, apo ke Ijip aso lapen apei ke Israel aso,

¹¹amen ke Shelomith, Dan akhei pen Dibri asopi. Mukam arlo laso amonit Israel aso pen chebohong-lo. Kechebohong ahut la Arnam aphan hirjuno hang-lo, la apotsi laphan latum Moses along pondet-lo,

¹²laphan tondingnon lapen labangso amonit aphan kopisi keklem nangjima HEMPHU kepathanjisi chonghongding-lo.

¹³Moses aphan HEMPHU pulo,

¹⁴“Laso amonit aphan mukam pen ingtan pondetnon. Ahirjuno kehang pu karjudunlong atum an bangso amonit aphu athak ari batsi la adai dolo pu ahaki chopo, lapen rat atum laphan arlong pen varbop-po.

¹⁵Anke Israel aso aphan thanpo, badutame Arnam aphan kangton atum an lason ale phopo,

¹⁶lapen pathilot po. Israel aso tame mate bang adet aso tame, HEMPHU aphan kepinrem aling abangphan rat atum arlong pen varbop-po.”

¹⁷Badutame pran karmut atum an aphan ke pathilotpo,

¹⁸lapen mane jongsi bang api pathilot-lote la alar chepi nangji. Chethe alar chethe kepinang aronlo.

¹⁹Mane jongsi bang aphan areng pasolote, bang aphan kosonma keklem la aphanta lasonthotsi klempo.

²⁰Mane jongsi arrepi palok lote, la aphanta isi arrepi palokpo; alangli jongsi amek ehin pavedet-lote, la aphanta amek ehin pavedetpo; alangli jongsi so ehong pajok-lote, la aphanta aso ehong pajokphlotpo. Bang aphan kopisi areng kepasoloma, laso alar lasonthotsi la aphanta klempo.

²¹Mane jongsi pi pathilote la alar pinangpo, bonta mane jongsi monit pathi lote kepathi abangphan pathilotpo.

²²Laso aron ke nangtum kadokave aphantalo, Israel atum anta lapen nangtum angbong kedo bang adet aso atum aphantalo, pima Nesi HEMPHU nangtum a-Arnamlo.

²³Israel atum aphan lahei pu det aphi, latum halabangso amonit aphan mukam ingtan pondet-lo lapen arlong pen varbop-lo. Lasonsi Israel atum HEMPHU Moses aphan kopisi hukum kepima la klemlo.